Atënë so azo ahunda

Ngbanga ti nyen a zia lege na akoli ti Israël ti sala mariage na awali wande so ala gbu na ngbâa atâa so Ndia ti Moïse atene ala lë songo na awande na lege ti mariage pëpe?​—Deutéronome 7:1-3; 21:10, 11.

Nda ni so a zia lege na ala ti sala ni andu ambeni ye so ayeke nde. Jéhovah amû lani yanga na azo ti Israël ti futi agbata ti amara mbasambala so ayeke na Canaan na ti fâ azo kue ti yâ ti akodoro ni so (Deutéronome 20:15-18). Me ti ambeni mara nde, na popo ti azo so asö kuâ, ala so akono awe na so a lingbi ti gbu ala ayeke gi peut-être awali so ade ti hinga koli pëpe (Nombre 31:17, 18; Deutéronome 20:14). Mbeni koli ti sese ti Israël alingbi ti sala mariage na mara ti wali so gi tongana wali ni asala ambeni ye awe.

Na ndo aye so a hunda na wali ni ti sala, Bible atene: “Fade lo kio kuali ti lo, na lo fâ nzene ti li tïtî lo, na lo lungula bongo so lo yü tongana ala gbu lo, na lo duti na da ti mo nze oko kue ti toto babâ na mama ti lo; na nda ni, mo lingbi bungbi na lo, na mo ga koli ti lo, na lo yeke wali ti mo.”​—Deutéronome 21:12, 13.

A lingbi mbeni wali so ade ti hinga koli pëpe so mbeni koli ti sese ti Israël aye ti sala mariage na lo afâ kuä ti li ti lo kue. Fango kuä ti li aye ti fa so zo ayeke na mua wala vundu (Esaïe 3:24). Na tapande, na ngoi so amolenge ti Job akui nga amosoro ti lo ahon gi tongaso, lo fâ kuä ti li ti lo ti fa so lo yeke na vundu (Job 1:20). Wali wande ni afâ nga anzene ti lo, peut-être lo ‘fâ anzene ti lo ni ndulu’ si même tongana lo zia aye ti baba dä, maboko ti lo ni agboto nga lê ti zo pëpe (Deutéronome 21:12, Knox). “Bongo so lo yü tongana ala gbu lo” na so wali ni ayeke zi ni ayeke nyen? Na yâ salango ye ti awali ti agbata ti apaïen, tongana a ga ndulu ti mû kodoro ti ala, ala yeke yü bongo ti ala so ayeke pendere ahon atanga ni kue. Ti ala, salango tongaso ayeke sala si ala pika bê ti azo so aga ti gbu ala. Me ti wali so a gbu lo awe na so lo yeke na vundu, a lingbi lo zi bongo ni so.

Ti mbeni wali so agbu lo awe so lo yeke ga wali ti mbeni zo ti Israël, a lingbi lo toto kuâ ti asewa ti lo so lo ye ala mingi teti nze oko. Teti so a futi agbata ni tâ biaku biaku, lo yeke bâ nga lê ti akozo sewa ti lo nga na asongo ti lo mbeni pëpe. Même a-image ti anzapa ti lo, agbakuru so lo yeke voro nzapa na ni ayeke dä mbeni pëpe, ndali ti so aturugu ni afuti ni kue awe. Nze oko ti salango mua ni ayeke nga mbeni ngoi so na yâ ni a yeke sukula wali ngbâa so, na tongaso lo zia lege ti aye kue so andu angbele nzapa so lo voro.

Ye oko, ti tanga ti asenge wali wande, ye ni ayeke nde. Ge a hunda ti bata kpengba-ndia so: “Mo sala mariage na popo ti mo na ala pëpe; a lingbi mo mû molenge ti mo ti wali na molenge ti lo ti koli pëpe, wala mo kamata molenge ti lo ti wali ti ga wali ti molenge ti mo ti koli pëpe.” (Deutéronome 7:3). Nda ti gbanzingo ye so ayeke nyen? Deutéronome 7:4 atene: “Teti fade ala handa amolenge ti mo ti zia lege ti Mbi, si ala sambela ambeni nzapa nde.” Tongaso, nda ti gbanzingo ye so ayeke ti bata azo ti Israël si vorongo ti ala aga sioni pëpe. Me, wali wande so ayeke na yâ ti dutingo so a fa ni na Deutéronome 21:10-13 alingbi ti ga na mara ti kpale so pëpe, ndali ti so asongo ti lo kue akui awe, nga a futi a-image ti anzapa ti lo awe. Lo yeke na songo mbeni pëpe na azo so ayeke voro anzapa ti wataka. Ge la si a zia lege na mbeni zo ti Israël ti sala mariage na mbeni wande.