‘Na ngia teti fango ye so mbi wara’
TONGANA wafango mbeti ti lo atene na lo ti mû iri ti lo teti mbeni mandako ti salango tënë na gbele azo na yanga ti Anglais, bê ti maseka-wali Kazuna agi lo mingi. Mandako ni ayeke lani teti ala kue so ayeke na akota da-mbeti na kota zoa ti Hokkaido so ayeke na banga ti Japon. Me da-mbeti ti lo ade ti tokua mbeni zo lâ oko pëpe ti sala mara ti mandako so. Na lango ti mandako ni, bê ti Kazuna afâ ngbanga ti so lo na awamandango mbeti 50 tongaso si ayeke sala ni. Bê ti lo akiri afâ mingi tongana lo bâ awafango ngbanga ti mandako ni use ayeke azo so tâ yanga ti kodoro ti ala ayeke Anglais.
A fa iri ti azo so asö benda; a to nda ni na fango iri ti azo so awara kete matabisi ti si na kota ni. Na ngoi so a hiri Kazuna tongana kozo wasongo benda ni, li ti lo akpe. Lo na wafango mbeti ti lo so ayeke na tele ti lo, li ti ala kue akpe na ala yeke bâ gi lê ti mba. Atâa so bê ti lo angbâ ti dö, Kazuna ague na ndo so a leke ni teti awasongo benda, na lo wara kangu ti wen so a mû ni tongana kozo matabisi ni.
Na ngia na yanga ti lo, Kazuna afa ye so asala si lo sö benda: “A yeke gi ndali ti fango ye so mbi wara na Ekole ti Kusala ti aChrétien so bungbi ti Jéhovah azia na sese si mbi sö benda. Mbi yeke tâ na ngia mingi ti wara fango ye so.” Ekole ni, so Kazuna ato nda ti mû mbage ti lo dä na ngoi so lo de kete, ayeke mbeni oko ti abungbi so aTémoin ti Jéhovah ayeke sala. Ti leke tele ti lo ngbanga ti mandako ni, Kazuna abi bê ti lo mingi na ndo salango kusala na micro, salango tënë na wâ, salango maboko, bango lê ti azo so mo yeke sala tënë na ala nga na ambeni kota tënë so a fa ni na Ekole ti Kusala ti aChrétien.
E hunda mo ti yeda na tisango ndo ti e ti ga ti bâ ekole so aTémoin ti Jéhovah ayeke sala ni yenga oko oko na Da ti Royaume ti ndo so mo yeke dä. Mo mveni mo yeke bâ na lê ti mo ye ti nzoni so amaseka na ambakoro ayeke wara dä. Azo kue alingbi ti ga na bungbi ni. Ti wara ambeni tënë na ndo ekole ni so ayeke ndulu mingi na da ti mo, e hunda na mo ti bâ aTémoin ti Jéhovah ti ndo so mo yeke dä.