Mo yeke sala lisoro na sewa ti mo?

MBENI mbeti-sango ti Pologne (Polityka) atene so “kode ti e ti salango lisoro na sewa ti e akiri na peko ngangu mingi.” Na Amerika, a diko so akoli na awali so asala mariage awe ayeke mû gi apenze-ngbonga omene lango oko oko ti sala tënë nzoni na popo ti ala. Ambeni wakode ti tënë ti sewa abâ so ndambo ti akangbingo tele na ti surungo mbeti ti mariage kue asi ndali ti tënë so.

Ka ti lisoro na popo ti ababâ na mama na amolenge? Mbeti-sango ni atene so, mingi ni, “lisoro ni aga gi ahundango tënë na peko ti tele: Ekole ni ayeke fade tongana nyen? Ka ti akamarade ti mo ayeke tongana nyen?” Na lo hunda tënë so: “Tongana nyen si amolenge ti e amanda ti maï asongo ti ndoye?”

Teti so akode ti salango nzoni lisoro ayeke ga gi tongaso pëpe, tongana nyen si e lingbi ti maï kode ti e ti sala ni? Disciple Jacques amû na e kpengba wango so: “A lingbi azo oko oko kue amä ndo fade [fade], ala sala tënë fade [fade] pëpe, ala zingo fade [fade] pëpe.” (Jacques 1:19). Tâ tënë, ti sala mbeni lisoro so ayeke kpengba zo, a hunda na e ti dengi mê nzoni na ti mû tënë hio pëpe wala ti gboto tënë ti nda ni hio pëpe. Kpe ti kasa ndo ngbanga ti so a yeke sala si lisoro ni akaï. Na ndo ni, Jésus ayeke hunda lani atënë na kode, pëpe ti gbu zo na ngangu ti tene tënë, me ti gboto ye so ayeke na bê ti awamango lo na ti kpengba kamba ti ndoye na popo ti ala.​—aProverbe 20:5; Matthieu 16:13-17; 17:24-27.

Sala kusala na akpengba-ndia ti Mbeti ti Nzapa, na duti kozo zo ti sala lisoro na azo ti sewa ti mo. A lingbi ti sala si songo so akpengba angbâ teti angu mingi, même teti fini ti mo kue.