“A sala ngangu na lo ndali ti mabe ti lo”

NA YÂ ti mbeni parc so ayeke na gbata ti Cernobbio, na banga ti Italie, a leke mbeni ndo kâ ti dabe na azo so akui ndali ti so a doro adroit ti ala. Mbeni oko ti awen so ayeke kâ na so a sû mbeti na ndo ni ayeke ti dabe na Narciso Riet. A dü Riet na kodoro ti Zamani, me babâ na mama ti lo ayeke azo ti Italie. Lo ga Témoin ti Jéhovah na popo ti ngu 1930 ti ga na ngu 1939. Na gbe ti Hitler, a sala ngangu na aTémoin ti Jéhovah ndali ti so ala ke ti yä Hitler na nduzu ahon tâ Nzapa, Jéhovah.

Tongana Gestapo aga ti hinga so Riet ayeke mû mbage ti lo lani na guengo na a-Tour ti Ba Ndo na hondengo ni na yâ akando ti sana, lo kpe lo gue na Cernobbio. Kâ a hunda na lo ti kiri peko ti Tour ti Ba Ndo na yanga ti Italien na ti tokua ni na amba ti lo wamabe so ayeke ndulu kâ. Akua so lo yeke sala lani na ngangu ti lo kue agboto lê ti azo na ndo ti lo. Mbeni turugu ti kota kamba nga na azo ti lo alï na ngangu na da ti Riet, ala gbu lo nga na ambeti so na lê ti ala afa so lo yeke sioni zo: a yeke Bible use na ambeni lettre. A tokua Riet na Zamani, a kanga lo na yâ kando ti sana ti Dachau nga a fâ lo ngoi kete kozoni si Use Bira so Amû Sese Kue ahunzi. Tënë so ayeke na ndo ti wen so ayeke na Cernobbio ayeke so: “A sala ngangu na lo ndali ti mabe ti lo.”

Mabe ti Narciso Riet nga na ti ambeni Témoin mingi so akui na gbe ti salango ngangu ti aNazi ayeke mbeni ye so ayeke mû ngangu na aChrétien ti laso ti ngbâ be-ta-zo na Jéhovah, oko Zo so na yâ ti dunia kue lo lingbi na vorongo ti ala (Apocalypse 4:11). Jésus atene: “Ngia ayeke na azo so azo asala ngangu na ala teti kusala ti mbilimbili.” Nzapa ayeke dabe ti lo ande na akusala ti ala nga lo yeke futa ala ndali ti salango ye ti ala na mbito pëpe.​—Matthieu 5:10; aHébreu 6:10.