“Ala bele mabe ti ala pëpe”

JÉSUS CHRIST atene na adisciple ti lo: “Ngia ayeke na i, tongana azo azonga i, na ala sala ngangu na i, na ala sala tënë ti mvene sioni nde nde na li ti i, ngbanga ti Mbi.” (Matthieu 5:11). Laso, aTémoin ti Jéhovah ayeke na ngia ngbanga ti so, ti gue oko na fango ye nga na tapande ti Christ, “ala yeke ti sese so pëpe,” ala yeke bi tele ti ala oko pëpe na yâ poroso nga ala yeke ngbâ lakue be-ta-zo na Nzapa na gbe ti akpale nde nde kue.​—Jean 17:14; Matthieu 4:8-10.

A-Témoin ti Jéhovah na ngbele Union soviétique nga ala ti Estonie abele mabe ti ala pëpe. Na ndo ala, Toomas Paul, kota wandara ti Église Luthérien nga wakiringo peko ti Bible, asû tënë so na yâ ti mbeni buku ti lo na yanga ti Estonien, lo tene: “Gi kete wungo ti azo si amä tënë ti ye so asi na kota ndapelele ti lango 1 ti avril ti ngu 1951. A zia na sese mbeni kapa ti tombango aTémoin ti Jéhovah nga na azo kue so amû peko ti ala: azo kue so a gbu ala si a gue na ala na Sibérie ayeke 279 . . . Tongana ala ye si a gbu ala na a hon na ala pëpe wala a kanga ala pëpe, a mû na ala mbeni mbeti ti sû maboko ti ala na gbe ni ti fa so ala bele mabe ti ala awe. . . . Tongana a bungbi ala na azo so a gbu ala kozo, wungo ti ala kue asi 353, so na popo ti ala azo 171 so ayeke gue ti ala gi guengo na abungbi. Même na Sibérie ala bele mabe ti ala pëpe. . . . Tongana a bâ azo ti Église [Luthérien ti Estonie], gi kete wungo ti ala si ayeke na mara ti mabe ti aTémoin ti Jéhovah so.”​—Kirik keset küla.

A-Témoin ti Jéhovah ti Estonie nga na ti sese mobimba ayeke zia bê ti ala kue na Nzapa ti mû maboko na ala ti ngbâ lakue be-ta-zo nga ti mä yanga ti lo atâa a sala ngangu na ala. Ala yeke na ngia teti ala hinga so futa ti dutingo be-ta-zo ti ala ayeke kota.​—Matthieu 5:12.