“Azo so ague na kota ngu ti ingo na yâ bateau”
NA GBATA ti Massachusetts na kodoro ti Amerika, mbeni ndo ti lutingo ti amangboko ayeke dä so a hiri ni Gloucester. Lê na lê na ni, a yeke wara mbeni statue ti zo so mo bâ mo tene lo yeke kpe na mangboko na ngoi ti kota pupu. Nda ti statue so ayeke ti dabe na awagingo susu saki mingi ti kodoro ti Gloucester so akui na lê ti ngu. Na gere ti statue ni nga na ndo mbeni tênë so ayeke ndulu na ni, a sû peko ti Psaume 107:23, 24, so atene: “Azo so ague na kota ngu ti ingo na yâ bateau, ala so asala kusala na lê ti kota ngu, azo ni so abâ kusala ti L’Eternel, na ala bâ, na yâ ngu so alï, ye so Lo sala si bê ti azo adö.”
Na lê ti kota ngu-ingo ti Atlantique, ambeni ndo ayeke so asusu ayeke dä mingi. Ye oko, kua ti gingo susu ni ayeke kete ye pëpe. Laso wungo ti azo so ayeke na Gloucester asi 30 000 tongaso. Azo atene so na yâ ti angu mingi so ahon ngbii ti si laso, akoli 5 368 tongaso si agirisa fini ti ala na ngoi so ala yeke gi susu na lê ti kota ngu so. Mbeni tënë so a sû ni nga ayeke so: “Ambeni zo akui tongana akota pupu ti mbage ti banga-to alondo gi hio tongaso na a sala si angangu mapo ti ngu-ingo ni amene ala. Ambeni akui gi ala oko na yâ ti mbeni kete ngö ngbanga ti so ala hon a yo na kota mangboko so aga na ala na ndo ti gingo susu ni. Ambeni akui ndali ti so ngu apika na pupu, na ye so asala si amangboko akpo tele na a linda ngu. Ti ambeni, na ngoi so ala ngbâ ti gi susu akota mangboko so ayeke hon na loro si akpo ala na ala kui.”
Statue ni ayeke mbeni ye so afa ngangu kua ti gingo susu nga na aye ti sioni so ayeke wara azo ti gingo susu ngbele ye giriri juska laso. Tara ti bâ vundu ti azo so agirisa akoli ti ala, ababâ ti ala, aita ti ala ti koli nga na amolenge ti ala ti koli na yâ ti kua so. Ye oko, Jéhovah Nzapa ayeke girisa pëpe awomua, anyindu nga na ala so akui na lê ti ngu. Bazengele Jean afa ye so ayeke si ande: “Kota ngu ti ingo azia na gigi awakinda so ayeke na yâ ni; na Kui na Ndo-ti-awakinda azia na gigi awakinda so ayeke na yâ ala.” (Apocalypse 20:13). Na lâ ni so ala zingo na kuâ, “ala so ague na kota ngu ti ingo na yâ bateau” ayeke bâ ande aye ti dongo bê so L’Eternel ayeke sala.