Mo yeke tongana keke ti lagani auna?

LANI na mbeni kete kodoro so ayeke na tere ti kota gbata ti Port Moresby, na Papouasie-Nouvelle-Guinée, awafango tënë use ti koli ayeke kiri na yanga-da na peko ti fango tënë. Tongana ala yeke tambela, ala bâ mbeni pendere keke. Kota zo ni atene: “Ah, mbeni lagani auna!” Lo turne lo tene na lo so ade maseka: “Iri so aye ti tene ‘keke ti ngu oko oko.’ Ngbanga ti so, nde na atanga ti akeke so ayeke sigigi na ando so ndowâ ayeke dä mingi, ngu oko oko akugbe ti lo kue ayeke tuku na lo kpa mbeni keke so akui awe. Ye oko, tongana ngoi ti ngu aga, lo zingo, akongö ti lo asigigi, na pendere ti lo akiri.”

E lingbi ti manda ye na ndo keke ti lagani auna, so azo mingi ahinga ni na iri ti flamboyant. Ti azo so ahinga ye na ndo ni, ala diko keke ti flamboyant so na popo ti apendere keke oku ti dunia so akongö ayeke sigigi dä mingi. Atâa so akongö ti lo na akugbe ti lo ayeke tuku na ngoi ti buru, keke ni ayeke bata ngu. Agunda ti lo akpengba na ayeke kono na tere ti atënê so alï mingi na gbe ti sese. Tongaso akota pupu ayeke sara ye oko pëpe na lo. Na nduru tënë, lo yeke sara kue ti bata tere ti lo na yâ aye ti ngangu.

Ambeni ye ti ngangu alingbi ti tara mabe ti e. Fade ye nyen ayeke mû maboko na e ti gbu ngangu? Legeoko tongana lagani auna, e lingbi ti nyon ngu so amû fini so alondo na Tënë ti Nzapa na e bata ni. A yeke nga nzoni ti tene e gbu ngangu “Tênë” ti e, Jéhovah, nga na bungbi ti lo (2 Samuel 22:3). Biani, lagani auna ayeke mbeni pendere ye ti dabe ti e so même na yâ aye ti ngangu, e lingbi ti bata ngangu ti e nga na pendere ti e na lege ti yingo tongana e sara kusala na aye kue so Jéhovah amû na e. Tongana e sara tongaso, fade e yeke ga “ahéritier ti zendo” ti lo, so mbeni ayeke fini ti lakue lakue.​—aHébreu 6:12; Apocalypse 21:4.