“A to nda ni laso, mbi mä na bê so Nzapa ayeke dä”

ALEXANDRA ayeke mbeni wali so lo yeke zo ti Ukraine me lo lango na Prague, na République tchèque. Mbeni lâ, tongana lo londo na kua ti kiri na kodoro, na place ti mungo kutukutu, lo bâ mbeni bata-monnaie so atï na so azo abâ ni pëpe na ala dö ni na gere. Na ngoi so lo mû ni ti bâ ye so ayeke na yâ ni, li ti lo akpe kue. Na yâ ni, lo wara mbeni wungo ti nginza so ahon kutu oku na ndo ni saki ngbangbo use! Na place ni so, lo bâ nga mbeni zo so ayeke gi bata-monnaie ti lo pëpe. Alexandra ayeke wande so aga gango na République tchèque, na ambeni ngoi a yeke ngangu na lo ti wara kobe ti yanga ti lo. Lo yeke sara nyen na nginza so lo wara so?

Tongana lo si na yanga-da, Alexandra afa bata-monnaie ni na molenge ti lo ti wali, Victoria. Ala gi yâ ti bata-monnaie ni me ala wara iri nga na adresse ti wa ti bata-monnaie ni pëpe. Ye oko, ala wara mbeni nduru mbeti so a sû ambeni numero na ndo ni. Na ndo ti lê ti mbeti ni, mo yeke wara numero ti mbeti ti nginza so a zia na banque, na mbeni mbage ni ambeni gbâ ti numero ayeke dä. A yeke wara nga mbeni mbeti so na lê ni a fa ndo so banque ni ayeke dä nga na mbeni tënë so a sû ni so afa wungo 5 247 656 ti nginza so ayeke tambela na kodoro ti e. So ayeke biani wungo ti nginza so ayeke na yâ ti bata-monnaie ni.

Alexandra asara kusala na mbeni numero so lo bâ lo tene ayeke numero ti singa ti iri ndo na banque ni, me kue gbä. Tongaso, lo na molenge ti lo ague na banque ni na ala fa ye so asi. Ala fa numero ti mbeti ti nginza so a zia na banque na so ala wara na lê ti mbeti so ayeke na yâ ti bata-monnaie ni. Me banque ni ayeke na ambeti ti nginza ni so pëpe. Na ndade ni, Alexandra akiri aga na tanga ti anumero so ayeke na yâ ti bata-monnaie ni. Na biani, banque ni ayeke na anumero so, so ayeke numero ti mbeti ti nginza ti mbeni wali. Alexandra na Victoria airi ndo na wali ni na wali ni abâ biani so bata-monnaie ti lo agirisa. Tongana ala kue awara tere, wali ni akiri singila na ala mingi na lo hunda ndo, lo tene: “Mbi mû na ala oke si ala kiri na mbi nginza ni?”

Victoria atene: “Mo mû ye oko pëpe. Tongana fade e ye nginza ni, ka e mû gi ni awe.” Atâa so lo hinga yanga ti Tchèque nzoni pëpe, Victoria atene: “E kiri na mo nginza ni ngbanga ti so e yeke aTémoin ti Jéhovah. Yingo-ti-hinga ti e so Bible afa lege na ni amû lege na e pëpe ti mû mbeni ye so ayeke ti e pëpe.” (aHébreu 13:18). Na ngia na bê, wali ni atene: “A to nda ni laso, mbi mä na bê so Nzapa ayeke dä.”