Jésus: ndo so lo londo dä

“Pilate akiri alï na yâ ti yangbo ti gouverneur na lo tene na Jésus: ‘Mo londo na ndo wa?’ Me Jésus azi yanga oko pëpe.”​—JEAN 19:9.

GOUVERNEUR PONCE PILATE ahunda tënë so na Jésus na ngoi so Jésus ayeke na gbele ngbanga so alingbi ti dë ngbanga ti kuâ na ndo ti lo. Pilate ahinga kete kodoro ti Israël so Jésus alondo dä (Luc 23:6, 7). Lo hinga nga so Jésus ayeke gi mbeni senge zo pëpe. Wala Pilate ayeke gi lani ti hinga wala Jésus ayeke na fini kozo na mbeni ndo? Wala Gouverneur so ayeke païen so aye biani ti hinga tâ tënë nga ti sara ye alingbi na ni? Atâa ye ni ayeke so wa, Jésus ake ti kiri tënë. Kete na pekoni, a bâ polele so ye so agbu bê ti Pilate mingi ayeke kua ti nginza ti lo, me pëpe tâ tënë nga na fango ngbanga ti mbilimbili.​—Matthieu 27:11-26.

Ye ti nzoni ayeke so, azo so aye biani ti hinga ndo so Jésus alondo dä alingbi ti hinga ni. Bible afa aye mingi so amû lege na e ti hinga ndo so Jésus Christ alondo dä. Bâ aye so ayeke na gbe ni ge.

▪ Ndo so a dü lo dä. A dü Jésus lani na yâ ti mbeni sewa so ayeke na mosoro mingi pëpe na Bethléhem, mbeni kete kodoro ti Judée. César Auguste amû yanga ti tene azo ague asû iri ti ala na mbeti. Ye so la apusu Marie, mama ti Jésus, na ngoi so lo ‘ga nduru ti dü awe’, na koli ti lo, Joseph, ti gue na Bethléhem, ndo ti akotara ti Joseph. Teti so Joseph na Marie awara ndo ti lango dä na yâ ti kodoro ni pëpe ndali ti so azo ayeke mingi, ala gue na yâ ti mbeni ndo so ayeke bata anyama dä. A yeke kâ la si a dü Jésus na a zia lo na yâ ti mbeni ndo ti tengo kobe ti anyama.​—Luc 2:1-7.

Angu mingi mingi kozoni, Bible afa ndo so a yeke dü ande Jésus dä. A tene: “Mo Bethléhem Ephrata, mo so mo yeke kete na popo ti afamille ti Juda, fade mbeni Zo asigigi na yâ mo teti Mbi, fade Lo komande Israël.”a (Michée 5:1). Na bango ni, Bethléhem ayeke kete mingi na akpa pëpe ti tene a diko ni na popo ti agbata ti kodoro ti Juda. Me kete gbata so ayeke na mbeni ye oko so a yeke gonda lo ndali ni. Messie wala Christ so a mû zendo ti lo ayeke bâ gigi na mbage ti Bethléhem.​—Matthieu 2:3-6; Jean 7:40-42.

▪ Ndo so lo kono dä. Na pekoni so sewa ti Jésus asara kodoro teti kete ngoi na Égypte, ala kiri na Nazareth, gbata ti kodoro-komanda ti Galilée so ayo akilomètre 96 na mbage ti banga ti Jérusalem. Na ngoi ni so Jésus ade ti wara ngu ota pëpe. Na yâ ti pendere gbata so, a yeke wara azo ti fango yaka, aberger nga na azo ti gingo susu so abi tere ti ala na yâ ti akua ti ala. A yeke ge la Jésus akono na yâ ti mbeni sewa so azo ayeke dä mingi me so ayeke na mosoro mingi pëpe.​—Matthieu 13:55, 56.

Angu mingi mingi kozoni, Bible afa awe so Messie ayeke duti “zo ti Nazareth.” Matthieu so asû Évangile ti lo atene so sewa ti Jésus ‘ague asara kodoro na gbata so a iri ni Nazareth, tongaso si tënë so a tene na lege ti aprophète aga tâ tënë, tongana a tene: “Fade a yeke iri lo zo ti Nazareth.”’ (Matthieu 2:19-23). Na bango ni, iri zo ti Nazareth ague oko na mbupa ti Hébreu so a kiri pekoni na “kete keke”. Biani, Matthieu ayeke sara lani tënë ti prophétie ti Ésaïe so airi Messie ‘Kete Keke so asigigi na gere’ ti Jessé (Ésaïe 11:1). Tënë so aye ti tene so Messie ayeke duti mbeni hale ti Jessé, babâ ti Gbia David. Tâ tënë, Jésus ayeke lani hale ti Jessé na lege ti David.​—Matthieu 1:6, 16; Luc 3:23, 31, 32.

▪ Ndo so lo yeke dä ândö si lo ga. Bible afa so Jésus ayeke na fini angu mingi mingi kozoni si a dü lo na yâ ti ndo ti batango anyama na Bethléhem. Prophétie ti Michée, so a fa ni fade, atene so “kusala ti Lo akomanse giriri kozoni.” (Michée 5:1). Jésus so ayeke kozo Molenge ti Nzapa ayeke lani mbeni créature ti yingo na yayu kozoni si a dü lo tongana zo na ndo ti sese. Lo wani lo tene: “Mbi londo na yayu mbi zu.” (Jean 6:38; 8:23). Ye tongaso alingbi ti si tongana nyen?

Jéhovah Nzapa, na lege ti yingo vulu ti lo, asara miracle na ziango fini ti Molenge ti lo na yâ ti Marie, mbeni Juif so ade ti hinga koli pëpe.b Ye so la asara si lo dü mbeni zo so alingbi kue. Mara ti miracle tongaso ayeke ngangu pëpe na Nzapa so ayeke Lo ti Ngangu Ahon Kue. Tongana ti so ange so afa tënë ni lani na Marie afa, “atënë kue ti yanga ti Nzapa ayeke ga gi tâ tënë.”​—Luc 1:30-35, 37.

Bible afa gi pëpe na e ndo so Jésus alondo dä, me a fa nga na e aye mingi na ndo ti lo. Matthieu, Marc, Luc nga na Jean so asû a-Évangile nga so ayeke dä na ngoi ti Jésus afa na e aye mingi na ndo ti lege so Jésus asara ye na fini ti lo.

[Akete tënë na gbe ni]