‘Mbi yeke sara tongana nyen ti fa tënë?’
Na yâ ti dunia, e yeke na apendere tapande ti aita so ayeke fa tënë lakue atâa so ala yeke na angangu kpale ti seni. Bâ tapande ti Dalia so ayeke na Vilnius, kota gbata ti Lituanie.
Dalia ayeke na ngu 30 na ndo ni. Ngbene ye so a dü lo lo yeke na mbeni kobela so asara lo na yâ ti mongoli ti lo. Kobela ni asara si ambeni mbage ti tere ti lo asara kua nzoni pëpe nga lo yeke sara tënë lê ni asigi nzoni pëpe. Gi azo ti sewa ti lo la alingbi ti mä yâ ti atënë ti lo nzoni. Dalia alango na ndo ti mama ti lo Galina so ayeke bâ lege ti lo. Atâa so Dalia ayeke na akpale nga na agingo bê mingi, lo ngbâ lakue ti duti na nzoni bango ndo. Nyen la amû maboko na lo nyen?
Galina afa ndani lo tene: “Na ngu 1999, Apolonija, molenge ti ita ti mama ti mbi, aga ti bâ e. E bâ so Apolonija so ayeke Témoin ti Jéhovah ahinga Bible ti lo nzoni nga Dalia ato nda ti hunda lo na gbâ ti atënë. Aninga pëpe Dalia akomanse ti manda Bible. Ngoi na ngoi mbi yeke ga na tere ti ala na ngoi ti étude ni ti fa na Apolonija peko ti atënë ti Dalia. Ye oko, mbi bâ so aye kue so lo manda asara nzoni na lo mingi. Kete na pekoni, mbi nga kue mbi hunda ti manda Bible.”
Tongana Dalia akomanse ti gbu nda ti atâ tënë ti Bible, lo gi bê ti lo fani mingi na ndo ti mbeni tënë. Na nda ni, lo hunda Apolonija lo tene: “Mara ti zo tongana mbi so ambeni mbage ti tere ti mbi asara kua nzoni ape so, mbi yeke sara tongana nyen ti fa tënë?” (Mat. 28:19, 20). Apolonija adë bê ti Dalia atene: “Sara mbeto ape. Jéhovah ayeke mû maboko na mo.” Biani, a yeke ye so Jéhovah asara.
Dalia afa tënë na alege wa? Lo fa tënë na alege mingi. Aita-wali amû maboko na lo ti sû alettre so lo zia atënë ti Bible na yâ ni. Kozoni, Dalia ayeke fa atënë ti bê ti lo na aita-wali ni. Na pekoni, ala sû abibe ti lo ni na yâ ti lettre. Dalia afa nga tënë na tokuango amessage na lege ti téléphone ti maboko. Nga tongana ndo ayeke nzoni, amembre ti congrégation amû lo ague na lo na yâ ti parc ti ndo ni ti tene lo fa tënë na azo so ague kâ nga na ndo ti lege.
Dalia na mama ti lo angbâ ti gue na li ni na lege ti yingo. Ala use kue amû tere ti ala na Jéhovah na ala wara batême na novembre ti ngu 2004. Na septembre ngu 2008, a zia na sese na gbata ti Vilnius mbeni groupe ti yanga ti Polonais. Teti so groupe ni ayeke na bezoin ti awafango tënë ti Royaume mingi, Dalia na mama ti lo alï na yâ ti groupe ni. Dalia atene: “Na ambeni nze, mbi gi bê ti mbi ndali ti so mbeni zo aga ti mû mbi ti gue na ni na fango tënë pëpe. Me kete na peko ti so mbi sambela Jéhovah ndali ni, mbeni ita aga awara mbi ti tene e gue e fa tënë.” Tënë ti bê ti ita ti e Dalia na ndo ti dutingo ti lo so ayeke so wa? Lo tene: “Kobela asara si ambeni mbage ti tere ti mbi asara kua nzoni pëpe, me bibe ti mbi angbâ ti sara kua. Mbi yeke na ngia mingi so mbi lingbi ti fa ye na azo na ndo ti Jéhovah.”