Mbeni ye so “zo alingbi ti girisa ni ape” asi tâ na ngoi ni

AZO mingi atene “Drame de la création” ayeke mbeni ye so “zo alingbi ti girisa ni ape!” A si lani tâ na ngoi ni nga azo so abâ ni alingbi ti girisa ni pëpe. “Drame de la création” amû lani gonda mingi na Jéhovah ngoi kete kozoni si azo ti Hitler ato nda ti sara pasi ngangu na azo ti Jéhovah na Poto. Me “Drame de la création” ni ayeke nyen?

Na ngu 1914, kota ndokua ti aTémoin ti Jéhovah so ayeke na Brooklyn, New York, na Amerika, asigigi na “Photo-Drame de la Création.” A yeke lani mbeni film so ambeni diapo ayeke na yâ ni, a yeke na couleur nga a yeke mä go ti azo dä; limon ni so aninga ngbonga miombe. Azo kutu mingi na yâ ti dunia la abâ lani “Photo-Drame.” A sigigi nga na mbeni fini ni so ayo mingi pëpe na ngu 1914. Iri ni ayeke “Eurêka Drame.” Me ti londo na ngu 1920 ti si na ngu 1929, adiapo, afilm nga na agbakuru so a yeke fa na ni afatigué kue. Me azo mingi aye ti kiri ti bâ “Photo-Drame.” Na tapande, azo ti Ludwigsburg, na Allemagne ahunda atene: “Lawa la a yeke kiri ti zia ‘Photo-Drame’?” Nyen la aita alingbi ti sara?

Ti mû lege na azo so ahunda ti kiri ti bâ “Photo-Drame”, ambeni ita ti sewa ti Béthel ti Magdebourg, na Allemagne avo afilm na yâ ti mbeni ndokua na Paris, France, nga na adiapo na yâ ti ambeni ndokua ti lekengo adessin na Leipzig nga na Dresde. A bungbi afilm ni na adiapo ni nga na ambeni ngbene diapo ti “Photo-Drame” so angbâ nzoni so place oko.

Ita Erich Frost so ayeke mbeni kota zo ti pikango mozoko aleke mbeni mozoko ti tene atoto na ngoi so afilm nga na adiapo ni ayeke hon. Ambeni tënë so zo ayeke mä na ngoi so lo yeke bâ afilm na adiapo ni so, a mû ni na yâ ti buku Création. Ni la a iri fini “Photo-Drame” so “Drame de la création.”

Yongo ti “Photo-Drame” nga na ti “Drame de la création” alingbi tere, aninga ngbonga miombe nga a yeke fa ni lani kete kete na yâ ti ambeni lango na bï juska ahunzi. “Drame de la création” afa apendere nzene nzene ye na ndo ti alango so Nzapa acréé na aye, mbaï ti yâ ti Bible nga ti so azo asû; a fa nga so bungbi ti vorongo nzapa ti wataka ahanda azo. A fa Drame so na yâ ti akodoro tongana Autriche, Allemagne, Luxembourg, Suisse nga na ando so a yeke tene yanga ti allemand dä.

Erich Frost atene: “Na angoi so e fa Drame so, mbi wa amba ti mbi, mbilimbili ala so ayeke na yâ ti bungbi ti pikango mozoko, ti tene na hunzingo ti mbeni mbage ti Drame ni e fono na popo ti azo e kangbi apendere buku nga na abrochure ti e. Kode so asara si e kangbi ambeti mingi ahon ti so e yeke kangbi ka da na da.” Johannes Rauthe, so amû li ni na yâ ti fango Drame so na Pologne nga na kodoro so a iri ni laso République tchèque, atene so azo mingi so aga abâ limon so amû a-adresse ti ala na aita ni tongaso si ala lingbi ti gue ti bâ ala. A-adresse so asara si aita ni ague asara anzoni vizite.

Na yâ ti angu so aga na peko ti ngu 1930, lakue tongana a zia “Drame de la création”, yâ ti da ni ayeke si na azo nga azo ti yâ ti gbata ni kue ayeke sara gi tënë ti aTémoin ti Jéhovah. Na ngu 1933, filiale ti Allemagne aleke si a zia limon so, na wungo ti azo so ague abâ ni aga nduru na kutu oko. Ita-wali Käthe Krauss atene: “A zia limon so na yâ ti lango oku. Ti gue ti bâ ni, lango oko oko e yeke tambela akilomètre 10, e hon na yâ ti agbako, na ndo ti ahoto nga na yâ ti apopo-hoto.” Ita-wali Else Billharz atene: “‘Drame de la création’ la azia nzara ti tâ tënë na yâ ti mbi.”

Alfred Almendinger atene so na ngoi so mama ti ni ague abâ Drame so, “tere ti lo anzere ngangu asara si lo vo Bible na lo gi ti wara tënë ‘purgatoire’ na yâ ni.” Teti so lo wara ni na yâ ti Bible ape, lo zia ti gue na eglize na lo mû batême. Erich Frost atene: “Gbâ ti azo aga na yâ ti tâ tënë grâce na ‘Drame de la création.’”​—3 Jean 1-3.

A yeke gi kete na pekoni so azo mingi abâ “Drame de la création” la akodoro ti Poto abi tere ti ala na yâ ti bira so aNazi aga na ni. Na tongo nda ti ngu 1933, a kanga lege na kusala ti aTémoin na Allemagne. Ti londo na ngoi ni so juska na hunzingo ti Use Bira so Amû Sese Kue na ngu 1945, a sara aye ti ngangu mingi na awakua ti Jéhovah na Poto. Erich Frost asara ngu miombe na da ti kanga. Me a zi lo nga na pekoni lo sara kua na Béthel ti Wiesbaden, na Allemagne. Biani, “Drame de la création” so ayeke mbeni ye so “zo alingbi ti girisa ni ape” asi lani tâ na ngoi ni ti sara si aita mingi awara ngangu ti luti na lê ti atara so ala wara na ngoi ti Use Bira so Amû Sese Kue!​—Sango na ndo ti mbaï ti bungbi ti e so alondo na Allemagne.