KIRINGO TËNË NA AHUNDA TI AZO

Zo alingbi ti duti ande na fini lakue lakue?

Adam, so lo yeke kozo zo, ate gigi aninga. Me lo ga mbakoro na lo kui. Ngbene ye na ngoi ni so, azo agi alege nde nde ti tene ala ga mbakoro ape. Atâa so kue, mbeni zo ti ngbâ na fini ngbii ayeke dä ape. Ngbanga ti nyen? Ti Adam, lo ga mbakoro na lo kui ndali ti so lo sara siokpari na lege so lo ke yanga ti Nzapa. Ti e, e yeke ga mbakoro ndali ti siokpari ti Adam, nga e yeke wara kuâ na peko ti siokpari ni.​—Diko Genèse 5:5; aRomain 5:12.

Ti tene e ngbâ na fini lakue lakue, a yeke nzoni mbeni zo afuta ye so a hunda ti zi e (Job 33:24, 25). Ye ni so a futa so la ayeke mû lege ti zi e na gbe ti kuâ (Exode 21:29, 30). Jésus la afuta ni na ngoi so lo kui lani ndali ti e.​—Diko Jean 3:16.

E yeke sara tongana nyen ti wara fini ti lakue lakue?

Azo kue la a yeke zi ande ala na gbe ti ye so asara si ala tï kobela nga ala ga mbakoro so ape. Azo so ake yanga ti Nzapa na mbana, tongana Adam, ayeke wara pasa ti ngbâ na fini ape. Gi azo so a pardone siokpari ti ala si ayeke wara ande fini ti lakue lakue.​—Diko Ésaïe 33:24; 35:3-6.

Ti tene a pardone e, a lingbi e sara mbeni ye si. A yeke nzoni e manda Bible ti tene e hinga Nzapa. Bible la ayeke fa na e ye so e doit ti sara si gigi ti e aga nzoni; a yeke fa nga na e ye so e doit ti sara ti nzere na lê ti Nzapa si e wara fini ti lakue lakue.​—Diko Jean 17:3; Kusala 3:19.