Internet: Zia e hinga agbanda ni!
Mbage 2: Agbakuru ti mandango na ye na lege ti Internet
1 Ambeni zo atene na bê ti ala so ala yeke mû maboko na aita tongana ala zia na ndo Internet atënë so ala gi nda ni na yâ ti ambeti ti e na ndo akusala nde nde ti aChrétien. Na tapande, mbeni Chrétien agi nda ti atënë na lege ti plan ti mbeni diskur na lo fa ni na tenengo na bê ti lo so a yeke mû ande maboko na ala so ayeke leke oko diskur ni. Ambeni ayeke fa aversê kue ti mandango Tour ti Ba Ndo ti peko wala ayeke fa ambeti na aversê teti Ekole ti Kusala ti aChrétien wala teti bungbi ti Mandango Buku. Ambeni nga ayeke mû awango teti fango tënë. Aye so kue amû maboko na aita biani?
2 Ambeti so bungbi ti Jéhovah amû ayeke pusu e ti bi bê na ndo aye so ayeke kpengba e na ayeke fa na e ti hinga popo ti ye ti “nzoni na sioni.” (aHéb. 5:14). A lingbi ti tene mbeni Chrétien awara aye so tongana ambeni zo agi nda ti aye na lo?
3 A tene giriri na ndo ti azo ti Bérée so ala “yeke nzoni ahon azo ti Thessalonique”. Ngbanga ti nyen? Teti so “ala yeke na nzara ti mä tënë so, na ala gi Mbeti ti Nzapa lâ na lâ ti bâ tongana tënë so ayeke biani.” (Kus. 17:11). Atâa a yeke Paul na Silas si afa giriri tënë na ala, ala lingbi ti yeda na tâ tënë ni gi tongana ala mveni abi tere ti ala dä.
4 Na sarango kusala na aye so mbeni zo nde agi ti leke na diskur wala na bungbi, zo ayeke girisa nzoye kue ti mandango ye lo mveni. Mo yeke na nzara pëpe ti kpengba mabe ti mo na yâ Tënë ti Nzapa? Na peko ti so mo mä na bê mo mveni na mbeni ye, mo lingbi ti fa tënë ti mabe ti mo nzoni na gbele azo, na lege ti adiskur, ti akiringo tënë na ngoi ti abungbi nga na fango tënë (aRom. 10:10). Tongana zo asara kusala gi na aye so mbeni zo nde agi, lo yeke sara ye pëpe alingbi na ye so ayeke na aProverbe 2:4, 5, so ahunda ti ‘ngbâ ti gi hingango ye ti Nzapa tongana mosoro so ahonde.’
5 Na tapande, tongana mo gi aversê na yâ Bible ti mo, mo lingbi ti bi lê na ndo atënë so angoro ni. Mo lingbi ti ‘gi nda ti ye kue mbilimbili’, tongana Luc na ngoi so lo sû Évangile ti lo (Luc 1:3). Na ndo ni, ngangu so mo sara ayeke mû ande maboko na mo ti wara hio aversê tongana mo yeke fa tënë wala mo yeke sara adevoir. Azo mingi atene bê ti ala adö ndali ti so ala bâ aTémoin ti Jéhovah ahinga ti sara kusala na Bible. Tënë so ayeke ndu ande e gi tongana e mveni e yeke mû lakue ngoi ti gi aversê na yâ Bible ti e.