Octobre: Ngoi ti Duti na Nzala ti Sala Nzo Kusala

¹ Tongana mbeni kota pupu ayeke ga ndulu na mbeni ndo so azo ayeke lango dä, a yeke kota ye mingi ti gboto lê ti azo ni na ndo sioni ye so. Tongana kota pupu ni ayeke ga ndulu, a lingbi agbotongo mê ni aduti ngangu. Ngbanga ti nyen? Teti so fini ti azo ayeke na yâ kpale! Ambeni peut-être amä pepe akozo gbotongo mê ni. Ambeni amä ni, mê ala sala ye oko pepe. A yeke legeoko nga na gbotongo mê ti Nzapa so e yeke na kungba ti fa ni kozoni si “gingisale” ti mbilimbili ngonzo ti Nzapa ahon na atanga ti aye ti sioni sese so. (aProv. 10:25) Fini ti lakue lakue ti azo ngbundangbu mingi ayeke na yâ kpale! A lingbi a sala si gbotongo mê so atoto. A lingbi e duti na “nzala ti sala nzo kusala.”​—Tite 2:11-14.

² Ngbele ye na angu mingi, awakua ti Jéhovah aye ti fa na gigi mbeni wâ so ayeke nde na yâ kusala ti fango tene na tongo nda ti mbeni fini ngu ti kusala nga na ambeni ngoi nde ti ngu ni. Na printemps ti ngu 1939, Informateur, kotara ti Kusala ti Royaume, amu wango so na yâ article ti Anglais ni: “Teti so printemps ayeke si, na pendere ngoi ni, e yeke na beku so awafango tene ayeke fa ande tene fani use ahon, na apionnier ayeke fa peut-être ahon so. Nze ti avril ayeke na a-dimanche oku. Lo yeke nga na a-samedi oku. Zia e mu samedi oko oko na dimanche oko oko . . . ti fa tene ngangu.” Ye so azia na gbele aita ni, a sala angu 60 awe, ayeke la ni ye ti zingongo nzala ti zo! Na ngu so, legeoko na ngu 1939, nze ti octobre ayeke na anda-yenga oku tongaso. Aye wa mo leke teti nze so? Ye nyen mo sû na ndo calendrier ti mo teti nze ti octobre ngu 2000? Leke tele ti mo ti mu mbage ti mo na lege ni na anzo kusala, na tele ti atanga ti awakua ti Jéhovah, na nze so, nze ti kota kusala na lege ti yingo.

³ Ye so e yeke na beku ti si dä: Tongana ti so a mu wango ni fani mingi, e tisa awafango tene so asigigi nze oko oko kue pepe ti sigigi na e na fango tene. E tisa awamandango Bible ti e, azo so e yeke sala vizite na ala, ala so amanda Bible kozoni, akamarade ti e ti kua, akamarade ti e, azo so alango ndulu na e, azo ti sewa ti e, na atanga ti azo so e hinga ala ti ga na tele ti e na abungbi. Ala so aye ti ga ayeke wara lege ti si dä? Tongaso pepe, e fa ndoye na mbage ti ala na mungo maboko na ala. Na anze ti peko, e lingbi ande ti ngbâ ti mu maboko na lege ti yingo na azo so ayeke ku ti mä tene.

⁴ Na dutingo na “nzala ti sala nzo kusala,” e yeke fa na Jéhovah so e yeke kiri tâ singila na lo teti ye kue so lo sala ngbanga ti e. Ngoi ni ayeke duti ande nzoni mingi na nze ti octobre na yâ ando mingi, na so ayeke mu lege ande na azo mingi na popo ti e ti sala kusala ngangu mingi ahon na yâ fango nzo tene. Tongana e yeke pionnier auxiliaire, e sala kue ti mu ngbonga 50 wala ahon ni na yâ kusala ti fango tene. (Mat. 5:37) E sala kue ti sala ye alingbi na programme so e leke na tongo nda ti nze ni. (Zo-ti. 3:1; 1 aCor. 14:40) Tongana e yeke pionnier pepe, e mu maboko na apionnier kue, na wango ala nga na fango tene na tele ti ala. (Ba 2 aGbia 10:15, 16.) Tongana e lu le-kobe na wâ na nze ti octobre, biani e yeke wara ande kota ngia na pekoni, na e yeke wara deba nzoni ti Jéhovah. (Mal. 3:10) Peut-être kozo kapa so ayeke pusu ande e ti ngbâ pionnier auxiliaire wala ti ga pionnier permanent. E yeke na beku so guengo na li ni na lege ti yingo so asi na nze ti octobre so ayeke ngbâ ti gue na yâ anze so ayeke ga na peko, na e yeke ngbâ awafango tene ti Royaume nze oko oko kue.

⁵ Kite ayeke pepe so na nze so, fade awakua ti Jéhovah saki mingi ayeke to nda ti mandango Bible na azo. Mo ye ti to nda ti mbeni oko? Sambela mbilimbili na lege so, na sala ye alingbi na asambela ti mo. Duti na beku so fade Jéhovah ayeke wara ngia ti mä mo na hundango na lo na tâ be-ti-molenge nga na ngbango dä ti wara mbeni zo ti nzoni bê ti manda ye na lo.​—1 Jean 3:22.

⁶ Ba mbeni kozo tene so amu lege na azo mingi ti to nda ti alisoro. Kozoni, hunda tene so: “Na bango ndo ti mo, gunda ti salango ngangu na yâ ti a-ekole ayeke ayingo sioni wala a yeke ngbanga ti so ababâ na mama ayö kungba ti ala pepe?” Zia zo ni akiri tene. Tongana lo tene “ayingo sioni,” e diko Apocalypse 12:9, 12 na e fa kusala ti Satan na yâ aye ti vundu ti azo. Na pekoni, e zi brochure Ahunda na Ye ti Manda 4, na e hunda na zo ni wala lo hunda tele ti lo awe ndo so Diable alondo dä. E diko akozo paragraphe use ni, na e sala lisoro na ndo ni. Tongana zo ni abi bê so salango ngangu na yâ a-ekole ayeke ngbanga ti so “ababâ na mama ayö kungba ti ala mbeni pepe,” e diko 2 Timothée 3:1-3, na e fa na gigi aye so asala si kpale so ayeke. Na pekoni, e zi brochure Ahunda na Ye ti Manda 8, e diko paragraphe 5 ni, na e ngbâ ti gue na lisoro ni. Tongana e mu yanga ti kiri mbeni lâ, e zi lege ti mandango Bible lakue lakue na zo ni. Na ngoi ti mbeni vizite ni nde, e hunda na lo wala lo hinga mbeni zo so aye ti mä tene ti ye so lo yeke manda.

⁷ Mbeni lege nde ti duti “na nzala ti sala nzo kusala” na nze ti octobre ayeke ti mu mbage na alege nde nde ti kusala ti fango tene. Mo bi bê awe ti fa tene na yâ parc wala na ndo ti ziango akutukutu na ndo so abus ayeke luti dä wala na ndo so ayeke ku abus? Wala mo ye ti fa tene na lege ti pikango singa, na ndo lege wala na yâ avaka ti dengo-buze? Ngbanga ti nyen ti sala ye alingbi na aye so na nze so pepe? Jéhovah ayeke mu ande maboko na mo ti bungbi ngangu so alingbi. (Kus. 4:31; 1 aThes. 2:2b) Tongaso, sala programme na mbeni pionnier wala na mbeni wafango tene so ayeke sala lakue kusala na ambage nde nde ti kusala ti fango tene.

⁸ Zo so aye ti kono mbage so lo yeke mu na kusala ti fango tene ayeke tara fango tene na ngoi so aku pepe. Mingi ni, ye so ahunda gi senge tongo nda ti lisoro na ngia. Mo lingbi ti sala lisoro na ndo mbeni tene so agbu bê ti azo kue, na tapande tene so afa ni na paragraphe 6. E sala ngangu ti wara ye ti nzoni même na yâ akete ngoi so e lingbi fade ti glisa ni senge senge. Ngbanga ti nyen ti mu pepe apenze-ngbonga oku, bale oko, bale oko na oku teti fango tene na ngoi so aku pepe?

⁹ Ngoi ti gbu li: E dabe e na akpengba tene so afa ni na yâ drame ti kota bungbi ti district “Atene ti Prophétie ti Nzapa,” ti ngu so ahon. Drame ni, so li ti tene ni ayeke E Ba na Nene ni Ye ti Yingo so E Wara Tongana Ye ti Héritier, amu lege na e ti gbu li na ndo kangbi so ayeke na popo ti Jacob na Ésaü. Ésaü atene so lo yeke bi bê ti lo na ndo aye ti yingo legeoko na Jacob, me akusala ti lo afa mbeni ye nde na ndo ti lo. (Gen. 25:29-34) So tâ gbotongo mê teti e! Legeoko na Jacob, e duti ndulu ti tiri teti wara deba nzoni ti Jéhovah. (Gen. 32:24-29) Ngbanga ti nyen ti mu nze ti octobre na anze so aga na pekoni ti kono wâ ti e pepe? E ba lâ oko pepe kota ye ti héritier ti e ti yingo tongana ye senge!

¹⁰ “Kota lâ ti Jéhovah aga ndulu. A yeke ndulu, na a mu loro mingi.” (Tseph. 1:14, NW) A lingbi a fa nzo tene ti Royaume. Fini ti azo ayeke na yâ kpale. Zia nze so aduti mbilimbili mbeni deba nzoni teti awakua ti Jéhovah kue, teti so fade e yeke fa legeoko so e yeke “na nzala ti sala nzo kusala”!