(Ti km ti Bê na Do ti Afrika)

Tene na ndo Annuaire . . .

Ambeni ita afa na gigi gingo bê ti ala teti so ala wara Annuaire na tongo nda ti ngu ni pepe. E ye ti fa ngbanga ti nyen a lingbi pepe ti wara ni hio. Atä so a yeke ba salango Annuaire tongana mbeni ye so a lingbi a ga kozoni, ye ni kue aluti na ndo ngoi wa atondo so alondo na ndo sese kue asi na Brooklyn na a bungbi ni. Nga, na peko ti so a pete ni awe, a lingbi pepe ti tokua a-Annuaire ni na ndo sese kue na ngoi oko.

Tongana a mu la ni desizion ti sala brochure Gingo Nda ti Tene ti Nzapa Lâ Oko Oko, a sala tokua so la ni na nze ti juillet 1985: “So ayeke mbeni guengo na li ni na yâ kapa ti société ti sigigi na asango na yanga ti akodoro mingi na oko ngoi. Ngbele ye na tongo nda ti ngu so, warango ambeti na oko ngoi asala si lege ayeke dä teti mingi ti aTémoin ti Jéhovah ti manda a-oko sango na yâ Tour ti Ba Ndo yenga oko oko. A to nda ni na lango 1 ti janvier 1986, fade e yeke duti beoko na ndo sese kue na yâ bango versê ti lâ oko oko. Fini lekengo ye so ayeke sala ande biani si beoko ti e ti Chrétien akpengba mingi ahon! A lingbi ti pete fini brochure ti versê ti lâ oko oko kozoni na Annuaire, na a kangbi ni na akongregation hio na ndo sese kue ti tene zo oko oko ato nda ti sala kusala na ni na tongo nda ti ngu ti kalendrier.”

A lingbi singo hio pepe ti Annuaire na akongregation na yâ ti ngu ni adö bê ti e pepe wala aga na e vundu. A hunda pepe ti ba ni gi na lango 1 ti janvier. Tondo ti ngu oko oko asigigi awe kozoni na yâ ti Tour ti Ba Ndo. Na mbeni mbage, aye so asi, so a sala tene ni, angbâ lakue ti mu wâ mingi, atâ e diko ni na tongo nda ti ngu wala ambeni nze na pekoni.