Wara ye ti nzoni na lege ti bungbi ti fango tënë
1. Bungbi ti fango tënë ayeke mû maboko na e tongana nyen?
1 Tongana a sara bungbi ti fango tënë nzoni, a yeke kpengba aita nga a yeke sara si ala hinga tënë so ala yeke gue ti fa na yâ ti territoire. Bungbi ti fango tënë ayeke mû lege na e ti fa tënë legeoko na aita si e lingbi ti mû maboko na mba nga ti fa ye na mba (aProv. 27:17; Zo-ti. 4:9, 10). Aye wa e lingbi ti sara ti wara ye ti nzoni na lege ti bungbi so?
2. Ambeni ye wa ita so ayeke mû li ni alingbi ti bâ ande ni?
2 Ita so amû li ni: A yeke fa pëpe kozoni ye so a yeke bâ ande na ngoi ti abungbi ti fango tënë. Atâa so kue, a hunda ti tene ita so mo yeke mû li ni, mo leke tere ti mo nzoni kozoni. Atâa so mo leke ti sara ande lisoro na ndo ti versê ti lâ oko oko, gi pëpe hio tongaso ti sara kusala na ni tongana a ndu fango tënë pëpe. Gbu li na ndo ye so ayeke mû ande biani maboko na aita so ayeke fa tënë na yâ ti lango ni. Na tapande, mo lingbi ti sara lisoro na ndo mbeni kode ti fango tënë wala ti sara mbeni démonstration so andu ni. Mo lingbi ti leke ti kiri ti bâ ambeni wango na yâ ti abuku tongana Comment raisonner, Ekole ti Kusala. wala mbeni ye so ala bâ ni ade ti ninga pëpe na ngoi ti Bungbi ti Kusala. Mo lingbi nga ti sara tënë na ndo lege so aita ni alingbi ti hon ndo ti mbeni kpale so ala lingbi ti wara ni na yâ ti territoire. Mo lingbi nga ti sara lisoro na ndo lege so aita ni alingbi ti zia lakue nzara ti tënë ni na yâ ti azo na ti to nda ti manda Bible na ala, mbilimbili tongana mingi ti ala ayeke gue ti sara avizite. Atâa tënë wa si ala yeke bâ ni, sara tënë ni na wâ nga kpengba aita ni.
3. Bungbi ni ayeke ninga ngoi oke, nga a lingbi a sara nyen na yâ ti ngoi ni so?
3 To nda ti bungbi ni na l’heure, même tongana mo hinga so ambeni ita ayeke si ande hio pëpe. Sara ye na ndara tongana mo yeke kangbi yâ ti azo, na mû territoire na ala so ayeke na bezoin ni. Sara bungbi ni ahon penze-ngbonga 15 pëpe, na tongana a yeke na peko ti mbeni bungbi ti kongregation, sara ni ahon penze-ngbonga 10 pëpe. Kozoni si bungbi ni ahunzi, ayeke nzoni zo kue ahinga zo so lo na lo ayeke sigigi ande nga ndo so ala yeke gue ti fa tënë dä. Hunzi bungbi ni na sambela.
4. Nyen la ayeke mû ande maboko na aita kue ti wara ye ti nzoni na lege ti bungbi ti fango tënë?
4 Aita, ala lingbi ti mû maboko: Tongana ti so e yeke sara ka na tanga ti abungbi ti kongregation, e yeke fa so e yekia Jéhovah nga na amba ti e tongana e si na l’heure. Sara kue ti mû mbage na yâ ti lisoro so a yeke sara na ngoi ti bungbi ni. Ita so ayeke mû li ni alingbi ti mû mo na mbeni zo ti sigigi na fango tënë, wala mo wani mo lingbi ti mä tere na mbeni zo kozoni si bungbi ni ato nda ni. Tongana mo soro ti mä tere na mbeni ita, sara kue ti kono “ndoye” ti mo na fango tënë na aita nde nde kue ahon ti fa tënë lakue gi na mbeni ita oko (2 aCor. 6:11-13). Tongana bungbi ni ahunzi, gi pëpe ti gbian yâ ti aye so a leke ni awe, na gue hio na yâ ti territoire ni.
5. A leke bungbi ti fango tënë ngbanga ti nyen?
5 Legeoko tongana tanga ti abungbi ti kongregation, a leke bungbi ti fango tënë ti tene ‘e bi bê ti e na ambeni zo na popo ti e ti wa ala si ala ndoye azo, na ala sara kusala nzoni’. (aHéb. 10:24, 25). Tongana e sara kue ti wara ye ti nzoni na lege ti bungbi so, a yeke mû ande maboko na e ti sara kusala ti e, so ayeke biani mbeni ‘nzoni kusala’.