Dë bê ti azo so ayeke na vundu
1. Ngbanga ti nyen ti dë bê ti mbeni zo so ayeke na vundu?
1 Tongana mbeni fami akui, a yeke kota ye ti vundu si asi na zo, mbilimbili azo so ayeke na beku ti Royaume pëpe (1 aThes. 4:13). Azo mingi ayeke hunda tere ti ala atene: ‘Ngbanga ti nyen azo akui? Dutingo ti azo so akui ayeke tongana nyen? Mbi lingbi ti kiri ti bâ fami so mbeni lâ?’ Na gbe ni ge, e yeke na ambeni tënë ti dë bê ti azo so e tingbi ala na fango tënë na so ayeke na vundu mingi ndali ti mbeni fami wala kamarade ti ala so akui.—Es. 61:2.
2. Tongana zo ni atene so vundu asi na ni, a lingbi e sara kue ti fa tënë na lo tongana ti so e yeke sara ka?
2 Na da na da: Zo ni lingbi ti tene na e so lo londo ti girisa mbeni fami ti lo. Mo bâ so lo yeke toto wala lo yeke na vundu mingi? Afami asi singo na yanga-da ni? Na mara ti angoi tongaso, mo lingbi ti sara tënë mingi pëpe (Zo-ti. 3:1, 7). Peut-être e lingbi ti tene na zo ni so e kangbi vundu so asi na lo, e mû na lo mbeni tract, wala périodique wala mbeni brochure so alingbi, na e gbu gere ti zo ni so e si na nzoni ngoi pëpe. Na pekoni, e lingbi ti gi ti kiri na mbeni ngoi so alingbi ti fa na lo ambeni tënë ti dengo bê so ayeke na yâ ti Mbeti ti Nzapa.
3. Tongana lege ayeke dä, aversê wa e lingbi ti diko na zo so ayeke na vundu?
3 Ti mbeni, mo lingbi ti bâ so lege ayeke dä ti sara tënë mingi na zo ni gi na kozo gango ti mo. Atâa so a yeke ngoi ni la pëpe ti ke abibe ti lo so ayeke na lege ni pëpe, e lingbi kamême ti diko na lo mbeni zendo ti Mbeti ti Nzapa so andu tënë ti londongo ti akuâ (Jean 5:28, 29). Wala e lingbi ti fa na lo ye so Bible atene na ndo ti dutingo ti azo so akui (Zo-ti. 9:5, 10). Mbeni tënë ti Bible so andu londongo ti mbeni zo so akui alingbi nga ti dë bê ti lo (Jean 11:39-44). Mbeni ye ti sara ayeke ti fa tënë ti beku so be-ta-zo Job ayeke na ni giriri na Jéhovah Nzapa (Job 14:14, 15). Kozoni si e zia zo ni, e lingbi ti mû na lo brochure Tongana E Kui Ye Wa Asi na E?, Tongana mbeni zo so mo ndoye lo akui, wala mbeni brochure wala tract nde so alingbi. E lingbi ti zia na zo ni buku Bible afa nyen biani? na e gboto lê ti lo na ndo ti chapitre 6, na e mä tere ti kiri mbeni lâ ti sara lisoro mingi na ndo ni.
4. Ambeni lege wa e yeke na ni ti dë bê ti azo?
4 Ambeni lege nde ti sara ni: Tongana a gue na kuâ ni na Da ti Royaume kozoni si a lu ni na azo so ayeke aTémoin pëpe aga, nyen la e lingbi ti sara? E lingbi ti mû na ala ambeti so adë bê. Ngoi na ngoi, a yeke sara na yâ ti ambeti-sango wala na lege ti ada-fonono tokua ti mawa; na ye so alingbi ti zi lege na e ti sara mbeni kete mbeti ti dë bê ti afami so mbeni oko ti ala akui. Mbeni tapande ni ayeke so, na peko ti so lo wara mbeni lettre so azia tract na yâ ni, mbeni koli so wali ti lo akui, lo na molenge ti lo ti wali ague na da ti mbeni ita-wali na lo hunda lo: “A yeke ala si atokua na mbi mbeti so? Mbi ye ti hinga ye mingi na ndo ti Bible!” Koli so na molenge ti lo ni ayeda ti manda Bible na ala to nda ti gue na abungbi ti kongregation.
5. Ngbanga ti nyen ti duti nduru ti gbu alege kue so azi ti dë bê ti azo so ayeke na yâ ti vundu?
5 Zo-ti-fa-tënë 7:2 atene: “A yeke nzoni ahon ti gue na da ti toto kuâ, ahon ti gue na da ti pumba”. Mingi ni zo so ayeke na yâ ti moa ayeke nduru ti mä Tënë ti Nzapa ahon zo so ayeke sara ngia. A yeke nzoni e kue e duti nduru ti hinga ambilimbili ngoi ti dë bê ti ala so ayeke na vundu ndali ti sewa ti ala so akui.