Mo lingbi ti fa tënë na dimanche?
1. E lingbi ti manda nyen na lege ti ye so Paul na akamarade ti lo asara na gbata ti Philippe?
1 A yeke lani Sabbat, mbeni lango so na gbata ti Philippes mingi ti aJuif ayeke duti na yanga-da ti ala. Paul na akamarade ti lo ayeke lani na yâ ti gbata ni na ngoi ti mbeni tambela ti ala ti missionnaire. Tongana lani ala mû nga lango ni so ti wu tere na peko ti ngangu kua ti ala, mbeni zo ti kasa ala ayeke dä pëpe. Me teti so ala hinga so aJuif ayeke sigigi na yâ ti gbata ni ti gue ti sambela, ala mû ngoi ni so ti fa tënë na azo ni. So ngia si Paul na akamarade ti lo ayeke na ni na ngoi so Lydie adengi mê na tënë ni nga so na pekoni lo na azo ti da ti lo kue amû batême! (Kus. 16:13-15). Teti so azo mingi laso ayeke duti na yanga-da ti ala na dimanche, e lingbi ti mû mbeni mbage ti lango ni so ti fa na tënë na ala?
2. Akpale wa azo ti Jéhovah ahon ndo ni ti sara si ala fa tënë na dimanche sân ti tene a kanga lege na ala?
2 E tiri ndali ti fango tënë na dimanche: Lani na ngu 1927, a wa azo ti Jéhovah ti mû mbeni mbage ti lango ti dimanche oko oko ti fa na tënë. Me hio azo agi ti kanga lege na ni. Na Amerika, lapolice agbu mingi ti aita, a tene ala yeke doro andia ti lango ti Sabbat, ala yeke buba siriri ti azo nga ala yeke kä ye sân patente. Me azo ti Jéhovah azia lege ti fango tënë ni pëpe. Na ngu 1933 ti si na ngu 1935, a kangbi aita na agroupe. Aita ni ayeke ti acongrégation so ayo na mbeni territoire pëpe, si tongana mbeni kpale alondo na yâ ti mbeni territoire ni ala kue alingbi ti gue kâ ti fa tënë. Tongana a si so a gbu ala, wungo ti ala ayeke mingi na a sara si a kara azo ti lapolice ni. Mo bâ tâ na nene ni asacrifice so aita so asara ti mû lege na e ti fa tënë na dimanche sân ti tene a kanga lege na e?
3. Nyen la asara si dimanche ayeke mbeni pendere lango ti fango tënë?
3 Mbeni pendere lango ti fango tënë: Mingi ti azo ayeke sara kua na dimanche pëpe. Mingi ni ala yeke na temps. Ambeni zo so ayeke gue ka na eglize ayeke yeda peut-être mingi ti sara lisoro na ndo ti tënë ti Nzapa na lango ni so. Tongana e yeke na bungbi na dimanche, e yü bongo nzoni awe tongana ti so e yeke gue ka ti fa na tënë, tongaso mo lingbi ti leke ti fa tënë kozo na ngoi ti bungbi wala na pekoni? Tongana bezoin ni ayeke dä, mû mbeni kete ye ti tengo ni na tere ti mo.
4. Ngia wa e lingbi ti wara tongana e mû mbeni mbage ti lango ti dimanche ti fa na tënë?
4 Tongana e mû mbeni mbage ti lango ti dimanche ti fa na tënë, e yeke wara lakue ngoi so e yeke tâ na bezoin ni ti wu tere. Nga na ndo ni, tere ti e ayeke nzere ndali ti so e fa tënë (aProv. 19:23). E lingbi même ti duti na ngia ti wara mbeni zo so ayeke tongana Lydie!