Mo kue mo lingbi ti wara ye ti nzoni na lege ti Tour ti Ba Ndo so
Na yâ ti Kusala ti Royaume ti février 2012 a tene lani na e so a yeke sigigi na Tour ti Ba Ndo ti Anglais so akpengba pëpe. A to nda ni lani na numero ti lango 15 ti juillet 2012. Laso, e lingbi ti tene so Tour ti Ba Ndo so aga na ye ti nzoni mingi na yâ ti acongrégation ti dunia kue. Ambeni wafango tënë so ahinga ti diko Anglais pëpe me so adiko tokua so ahunda tere ti ala wala ala nga kue ayeke wara ande mara ti Tour ti Ba Ndo so na yanga ti kodoro ti ala.
Na Matthieu chapitre 5 ti si na 7, a yeke wara atâ tënë so ndani alï mingi, me Jésus afa ni na mbeni lege so akpengba pëpe nga lo diko gbâ ti tënë pëpe. Na mungo tapande ti fango ye ti Jésus, “wabatango ye so ayeke be-ta-zo” ayeke gi lakue alege ti mû kobe ti yingo so alingbi na angbâa ti Nzapa na yâ ti dunia kue (Luc 12:42). Ni la, ti to nda ni na numero ti lango 15 ti janvier 2013, a yeke wara Tour ti Ba Ndo ti mandango ni na yanga ti Français, Portugais nga na Espagnol so akpengba pëpe. Wungo ti aparagraphe ni, ahundango tënë ni nga na akete li ti tënë ni ayeke oko na ti mbeni so. Atënë ti yâ ni ayeke même na ti mbeni so, me a sara kusala na atënë so zo ayeke mä yâ ni hio. Zo so amû li ni na Mandango Tour ti Ba Ndo nga na wadikongo ni ayeke sara kusala na mbeni so, me ala yeke sara kusala na ti so atënë ni akpengba pëpe so gi tongana azo mingi ayeke na ni. Azo so asara kusala na ti so atënë ni akpengba pëpe so ayeke bâ so aversê nga na afoto ni ayeke même na ti mbeni so, na tongana a yeke diko aparagraphe ni ala lingbi ti bâ ni legeoko nga ti mû commentaire. Kite ayeke pëpe so Tour ti Ba Ndo so atënë ni akpengba pëpe ayeke mû ande maboko na azo mingi ti tene ‘bê ti ala agbu nda ti tënë’ ni nga ti sara ye alingbi na ni na yâ ti fini ti ala.—Mat. 13:14, 15, 19, 23.
Na tongo nda ni, ambeni zo alingbi ti soro ti sara kusala na ni use kue ti haka nga ti bâ tongana nyen ti so atënë ni akpengba pëpe so amû maboko na ala ti gbu nda ti a-article ni nzoni. Zo so abâ so lo lingbi ti wara ye ti nzoni na lege ti Tour ti Ba Ndo so atënë ni akpengba pëpe so, a yeke nzoni lo sara commande ni na ita so abâ lege ti apériodique.