Fa na lo ti kanga nzara ti bê ti lo

TËNË SO AYE TI TENE NYEN?

Ti kanga nzara ti bê aye ti tene

• ti kanga bê ti ku tongana nzara ti mbeni ye asara mo

• ti sara gï pëpe aye so bê ti mo afa na mo ti sara

• ti sara mbeni kua so anzere na mo ape juska mo hunzi ni

• ti zia interêt ti amba ti mo kozo na ti mo

A YEKE KOTA YE TI KANGA NZARA TI BÊ

Amolenge so ayeke kanga nzara ti bê ti ala mingi apeut ti ke ti sara mbeni ye so ayeke na lege ni ape, même si a yeke mbeni ye so ala ye ni. Me, ti ala so a yeke ngangu na ala ti kanga nzara ti bê ti ala, a yeke facile na ala

• ti sara ngonzo mingi

• ti sara kota vundu

• ti nyon manga, mbangi, wala ti nyon sämba ahon ndö ni

• ti te ye kirikiri

Ambeni wandara atene so tongana amolenge ade kete si ala hinga ti kanga nzara ti bê ti ala, na temps so ala kono, ala yeke na kpale ti seni wala ti mosoro mingi ape nga ala yeke kpe ndia ti kodro. Tënë so apusu Yapakara Angela Duckworth, so ayeke mbeni kota wafango mbeti ti tene na nda ni so, ti kanga nzara ti bê ayeke sara sioni na zo ape.

TONGANA NYEN TI FA NA LO TI KANGA NZARA TI BÊ TI LO

Manda ti tene ên-ën, nga ngbâ gï na ndö ni.

MAMA-NDIA TI BIBLE: “Zia ‘en’ ti ala angbâ gï ‘en,’ wala ‘ên-ën’ ti ala angbâ gï ‘ên-ën.’”​—Matthieu 5:37.

Amolenge apeut ti tara babâ wala mama ti ala na lege so ala yeke dekongo wala ala yeke toto, parfois na lê ti azo, tongaso si ala wara ye so ala ye. Tongana a mû na ala ye so ala ye, lê ti ala ayeke ngbâ dä.

Me tongana babâ wala mama ni atene ên-ën, nga lo ngbâ gï na ndö ni, amolenge ni ayeke manda so, a yeke lakue la zo ayeke wara ye so lo ye ape. Pakara David Walsh atene: “Azo so ayeke kanga nzara ti bê ti ala ayeke ka na ngia mingi.” Lo tene nga so a yeke na lege ni ape ti zia si amolenge ti e akono na pensengo so ala peut ti wara lakue ye kue so ala ye.a

Tongana mo tene ên-ën na molenge ti mo laso na yâ ti ambeni ye, a yeke aidé lo ande na yâ ti gigi ti lo ti ke ti sara ambeni ye, même si nzara ni asara lo. Na tapande ti ke ti nyon mbangi, ti ke ti bungbi koli na wali kozo si lo sara mariage, wala ti ke ti sara ambeni ye ti sioni.

Aidé molenge ti mo ti hinga ye so ayeke passé tongana lo sara ye nzoni wala tongana lo sara ye nzoni ape.

MAMA-NDIA TI BIBLE: “Ye so mbeni zo ayeke lu, gï ni la lo yeke ko ni ande.”​—aGalate 6:7.

Molenge ti mo adoit ti hinga so tongana lo sara mbeni ye, aye ti peko ni ayeke lakue dä. Tongaso, tongana lo kanga nzara ti bê ti lo ape, aye ti peko ni ayeke duti ande nzoni ape. Na tapande, tongana kete ye lo sara ngonzo, azo ayeke kpe ande ti duti na terê ti lo. Me tongana lo kanga nzara ti bê ti lo même tongana a gi yanga ti lo, wala tongana lo kanga bê lo ku sân ti fâ tënë na yanga ti azo, azo ayeke ye lo. Aidé lo ti comprendre so gigi ti lo ayeke duti nzoni tongana lo hinga ti kanga nzara ti bê ti lo.

Fa na lo ti hinga aye so ayeke kota ye.

MAMA-NDIA TI BIBLE: “Hinga biani aye so ayeke akota ye mingi ahon atanga ni.”​—aPhilippien 1:10.

Ti kanga nzara ti bê ayeke sara si e yeke kpe ti sara mbeni ye so ayeke na lege ni ape, me a yeke aidé nga e ti sara mbeni ye so peut-être e ye ti sara ni ape, me so e doit ti sara ni. A yeke kota ye ti tene molenge ti mo ahinga aye so ayeke kota ye na lê ti lo, na ti gi lakue ti sara aye ni so kozo. Na tapande, lo doit ti sara adevoir ti lo ti ekole kozo si lo sara ngia.

Duti mbeni nzoni tapande.

MAMA-NDIA TI BIBLE: “Mbi zia tapande ni na ala, si gï tongana ti so mbi sara na ala, a lingbi ala nga asara tongaso.”​—Jean 13:15.

Molenge ti mo ayeke bâ nyen la mo yeke sara tongana mbeni ye ason bê ti mo. Zia si lo bâ so tongana zo akanga nzara ti bê ti lo, aye ayeke tambela nzoni. Na tapande, tongana lo sara mbeni ye na lege ni ape, eskê mo yeke sara ye na lê ti ngonzo wala mo yeke kanga bê mo duti kpô?