1. Eskê Nzapa la asara si e yeke bâ pasi?
Ndani so a yeke kota ye ti wara kiringo tënë ni
Mingi ti azo aye ti sara na Nzapa ape, ala pensé so lo la lo sara si e bâ pasi.
Gbu li na ndö ti tënë so
Gbâ ti akota zo ti Nzapa afa so Nzapa la asara si e bâ pasi. Na tapande, ambeni atene:
Akpale tongana ngu so asuku amû ndo ayeke punition ti Nzapa.
Amolenge ayeke kui ndali ti so Nzapa abezoin a-ange mingi na yayu.
Nzapa ayeke mû mbage na yâ ti abira, so ayeke mbeni kota ye so aga na pasi na azo.
Me eskê akota zo ti nzapa la afa asioni tënë na ndö ti Nzapa so ape? Ka tongana Nzapa ake ala awe, eskê e doit ti croire na ala?
TI HINGA YE MINGI NA NDÖ NI
Gue na ndö ti jw.org, na bâ vidéo Ndani nyen ti manda Bible?
Ye so Bible afa
Nzapa la asara si e bâ pasi ape.
Tongana a yeke lo, ka ye so ague nde fade na asarango ye ti lo so Bible afa ni. Na tapande:
“Asarango ye ti [Nzapa] kue ayeke mbilimbili. . . . Lo yeke mbilimbili na lo yeke sara ye na lege ni.”—DEUTÉRONOME 32:4.
“Tâ Nzapa alingbi ti pensé lâ oko pëpe ti sara ye ti sioni, nga Lo so ngangu ti lo ahon angangu kue alingbi ti pensé lâ oko pëpe ti sara sioni.”—JOB 34:10.
“Lo so ngangu ti lo ahon angangu kue ayeke ba pëpe yâ ti ye so ayeke mbilimbili.”—JOB 34:12.
Nzapa ake abungbi ti nzapa so ayeke fa pëpe tâ tënë na ndö ti lo.
Na popo ni a yeke wara ala so afa so lo la lo sara si e bâ pasi nga na ala so amû mbage na yâ ti abira nga na sarango sioni na zo.
“Aprophète atene aprophétie ti mvene na iri ti mbi [Nzapa]. Mbi la mbi tokua ala pëpe, mbi mû yanga na ala pëpe wala mbi sara tënë nga na ala pëpe. Tënë ti prophétie so ala yeke fa na azo so ayeke avision ti mvene . . . nga na atënë ti handa ti bê ti ala wani.”—JÉRÉMIE 14:14.
Jésus afa sarango ye ti handango lê ti azo ti abungbi ti nzapa.
“A yeke pëpe zo kue so atene na mbi, ‘Seigneur, Seigneur,’ si ayeke lï ande na yâ ti Royaume ti yayu. Me gï zo so asara ye so bê ti Babâ ti mbi so ayeke na yayu aye si ayeke lï ande dä. Mbeni lango ayeke ga ande so azo mingi ayeke tene na mbi: ‘Seigneur, Seigneur, e tene aprophétie na iri ti mo ape? E tomba asioni yingo na iri ti mo ape? E sara gbâ ti akusala ti ngangu mingi na iri ti mo ape?’ Me mbi yeke tene na ala: ‘Mbi hinga ala lâ oko pëpe! Ala hon yongoro na terê ti mbi kâ, ala azo so akpe ndia pëpe so.’”—MATTHIEU 7:21-23.