Ndara asara si sewa ti mo aduti na ngia

Akoli, ala ndoye awali ti ala

“A lingbi akoli andoye awali ti ala tongana terê ti ala wani. Zo so andoye wali ti lo andoye terê ti lo wani, ndali ti so mbeni koli ake terê ti lo wani lâ oko pëpe; me lo mû kobe na ni nga lo yeke ye ni mingi.”​—A-ÉPHÉSIEN 5:28, 29.

Koli la ayeke mû li ni na yâ ti sewa (aÉphésien 5:23). Me, mbeni nzoni koli ayeke sara ye na ngangu ape wala lo yeke sara ye ahon ndö ni ape. Lo yeke ne wali ti lo, lo yeke bâ lege ti abezoin ti lo nga na atënë ti bê ti lo. Lo yeke sara kue ti tene wali ti lo aduti na ngia, me ti hunda lakue na wali ni ape ti sara gï ye so lo ye (aPhilippien 2:4). Lo fa atënë ti bê ti lo polele na wali ti lo nga lo yeke dengi mê ti mä wali ni. Lo yeke sara “ngonzo mingi” na terê ti lo ape, lo yeke pika lo ape wala lo yeke fâ yanga ti mbana na lo ape.—aColossien 3:19.

Awali, ala ne akoli ti ala

“A lingbi wali ane koli ti lo mingi.”—A-ÉPHÉSIEN 5:33.

Tongana mbeni wali ane koli ti lo nga lo sara ye alingbi na adesizion ti koli ni, a yeke sara si sewa ni aduti na ngia. Tongana koli ni asara faute, wali ni ayeke bi nengo ti lo na sese ape, me lo yeke ngbâ ti sara ye na nengo zo nga na ngangu ape (1 Pierre 3:4). Tongana lo ye ti sara tënë na ndö ti mbeni kpale na koli ni, lo yeke soro mbeni nzoni ngoi nga lo yeke sara tënë na nengo zo.—Zo-ti-fa-tene 3:7.

Duti be-ta-zo na koli wala na wali ti mo

“Koli ayeke . . . ngbâ ande na terê ti wali ti lo na ala yeke ga terê oko.”​—GENÈSE 2:24.

Tongana mbeni koli na wali asara mariage, songo ti sewa ni ayeke kpengba. Tongaso, mbeni couple adoit ti sara kue ti kpengba songo ti mariage ti ala na lege so ala fa atënë ti bê ti ala na mba, nga ala sara ye na nzoni bê même na yâ ti akete kete ye. Ala doit nga ti duti be-ta-zo na mba na lege so ala kpe ti gi mbeni koli wala wali nde. Gingo mbeni koli wala wali nde ayeke sioni mingi. A yeke buba yâ ti confiance nga apeut ti kangbi yâ ti sewa.—aHébreu 13:4.

Ababâ na amama, ala fa ye na amolenge ti ala

“Fa na molenge lege so a yeke nzoni lo mû; même na ngoi so lo ga mbakoro, lo yeke zia ni pëpe.”​—APROVERBE 22:6, kete tënë na gbe ni.

Nzapa amû na ababâ na amama kua ti fango ye na amolenge ti ala. Ye so andu nga ti fa na ala ti duti na anzoni sarango ye nga ti zia nzoni tapande na ala (Deutéronome 6:6, 7). Tongana mbeni molenge asara faute, babâ wala mama so asara ye na ndara ayeke sara ye ahon ndö ni ape. Babâ wala mama ni ayeke ‘duti nduru ti mä tënë, ti sara tënë hio hio pëpe na ti sara ngonzo hio hio pëpe.’ (Jacques 1:19). Tongana ala bâ so molenge ni abezoin gbotongo mê, ala yeke sara ni na ngonzo ape, me na ndoye.

Amolenge, ala mä yanga ti ababâ na amama ti ala

“Amolenge, ala mä yanga ti ababâ na amama ti ala . . . ‘Mo ne babâ na mama ti mo.’”​—A-ÉPHÉSIEN 6:1, 2.

A lingbi amolenge amä yanga ti ababâ na amama ti ala nga ala fa so ala ne ala mingi. Tongana ala ne ababâ na amama ti ala, a yeke sara si sewa ni aduti na ngia, siriri nga na mango terê. Amolenge so akono awe ayeke ne ababâ na amama ti ala na lege so ala sara kue ti bâ lege ti ala nzoni. Ye so andu nga ti aidé ala ti bâ lege ti da ti ala si angbâ nzoni wala ti mû na ala nginza.—1 Timothée 5:3, 4.