Afango ye so amû beku na zo

Nzapa ayeke futi ande azo ti sioni

“Tongana azo ti sioni ayeke sigi tongana asioni pere nga tongana azo kue so ayeke sara sioni amaï pendere, a yeke ti tene a futi ala biani biani.”​—PSAUME 92:7.

Tongana ti so e bâ na yâ ti article so ahon, asioni ye angbâ ti gue na li ni. Ye so adoit ti étonné e ape. Ti tâ tënë ni, Bible atene kozo awe so na 2 Timothée 3:1-5, so na “lâ ti nda ni” azo ayeke ga tâ sioni mingi. Lâ ti nda ni aye ti tene nyen? Aye ti sara tënë ti azo ti dunia so akpe Nzapa ape. Fafadeso, Nzapa ayeke futi ande azo so ake ti changé asioni sarango ye ti ala. Na pekoni, gï anzoni zo so amä yanga ti Nzapa la ayeke ngbâ na ndö ti sese. “Sese ayeke ga ande ye ti azo ti mbilimbili, na ala yeke ngbâ na ndö ni lakue lakue.”—Psaume 37:29.

Nzapa ayeke futi ande Satan

“Ti Nzapa, lo so ayeke mû siriri, lo yeke neka ande Satan.”​—AROMAIN 16:20.

Tongana Satan, adémon nga na asioni zo ayeke duti dä ape, siriri ayeke mû ande ndö ti sese kue. Nzapa amû zendo, lo tene: “Zo oko ayeke zia mbeto na yâ ti [mo] pëpe.”—Michée 4:4.

Nzapa ayeke zi ande kobela nga na kuâ

“Tente ti Nzapa ayeke na azo . . . Lo yeke mbô ande ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe.”​—APOCALYPSE 21:3, 4.

Pasi nga na kobela ayeke hunzi ande ndali ti so Nzapa ayeke kiri ti leke aye ti sioni kue so Satan, Adam, Ève nga na awokongo ti e aga na ni. Na nda ni, même “kuâ ayeke duti ande dä mbeni pëpe.” Azo so aye Nzapa nga ala mä yanga ti lo la ayeke ngbâ teti lakue lakue. Me ndo wa la ala yeke vivre ande dä?

Wasarango e ayeke sara ande si sese aga Paradis

“Benyama nga na ndo so ahule ngangu ayeke duti ande na ngia mingi; kpangbala ndo ti désert ayeke duti ande na ngia, nga apendere fleur ayeke sigi dä gbani gbani.”​—ÉSAÏE 35:1.

Tongana Nzapa afuti azo ti sioni, sese ayeke ga ande Paradis! Gbâ ti apendere ndo ayeke duti ande dä nga kobe ayeke si singo na ndö ni (Psaume 72:16). Ngu-ingo nga na akota ngu ayeke duti ande propre ti tene gbâ ti anyama avivre dä. Azo ayeke hinga ande même tënë ti “pollution” ape! Azo ayeke leke ande da ti ala na ala lango dä. Tënë ti nzara, ti azo so ayeke na da ape wala yere ayeke duti ande dä ape.—Ésaïe 65:21, 22.

Nzapa ayeke kiri ande na azo so akui na fini

‘A yeke zingo ande akuâ.’​—KUSALA 24:15.

Eskê anzere na mo ti kiri ti bâ azo so mo ye ala so akui? Nzapa so ngangu ti lo ahon angangu kue ayeke zingo ande akuâ ti duti na yâ ti Paradis na ndö ti sese. Mo na ala ayeke hinga ande terê. Imaginé ngia so mo na ala ayeke duti ande na ni! Ngbanga ti nyen la e yeke sûr so tënë so ayeke ga ande tâ tënë? A yeke ngbanga ti so Bible afa na e atapande ti akota zo nga na amolenge so Nzapa akiri na ala na fini na ala kiri aduti ndo oko na afami. Na ndö ni, fani mingi Jésus azingo lani akuâ na gbâ ti azo abâ ni (Luc 8:49-56; Jean 11:11-14, 38-44).