Ngbanga ti nyen la a yeke kota ye ti hinga so Nzapa ayeke dä?

Ngbanga ti nyen la a yeke kota ye ti hinga so Lo so acréé aye kue ayeke dä? Tongana aye so afa polele so Nzapa so ngangu ti lo ahon angangu kue ayeke dä na mo yeda na ni, peut-être a yeke pusu mo ti yeda na aye so afa polele so a sû Bible na gbe ti yingo ti lo. Nga tongana mo sara confiance na ye so Bible afa, mo yeke wara aye ti nzoni na lege ti aye so a fa ge.

A yeke sara si gigi anzere na mo mingi

YE SO BIBLE ATENE:“[Nzapa amû] anzoni ye so lo sara na mungo na ala ngu-nzapa so alondo na nduzu, angoi so alê ti kobe ayeke lë dä mingi nga na akobe mingi mingi na lo sara si ngia asi bê ti ala.”—Kusala 14:17.

TËNË SO AYE TI TENE NYEN: Aye ti nzoni kue so mo wara na yâ ti dunia ayeke mbeni cadeau so alondo na Lo so acréé aye kue. Mo yeke kiri singila mingi ndali ti acadeau so tongana mo hinga so Lo so amû aye ni so apensé na mo mingi.

Mo yeke wara anzoni wango ndali ti gigi ti mo ti lâ oko oko

YE SO BIBLE ATENE: “Mo yeke hinga ye so ayeke mbilimbili nga ayeke na lege ni, ye kue so andu sarango ye ti nzoni.”—aProverbe 2:9.

TËNË SO AYE TI TENE NYEN: So Nzapa la acréé e, Lo hinga ye so mo yeke na bezoin ni ti duti na ngia. Tongana mo diko Bible, mo yeke hinga aye mingi so ayeke aidé mo na yâ ti gigi ti mo.

Mo yeke wara akiringo tënë na ahunda ti mo

YE SO BIBLE ATENE: “Mo yeke wara hingango ye na ndö ti Nzapa.”—aProverbe 2:5.

TËNË SO AYE TI TENE NYEN: Tongana mo hinga so Nzapa ayeke dä apeut ti aidé mo ti wara akiringo tënë na akota hunda tongana ti so: E yeke na fini ngbanga ti nyen? Ngbanga ti nyen la pasi ayeke mingi tongaso? Tongana zo akui, ti lo awe la? Mo lingbi ti wara avrai kiringo tënë ti Bible na ndö ni.

Mo yeke wara beku ndali ti kekereke

YE SO BIBLE ATENE: “Jéhovah atene: ‘Mbi hinga mbilimbili ye so mbi pensé ti sara ndali ti ala, mbi pensé ti mû na ala siriri, me ye ti vundu pëpe, ti mû na ala mbeni nzoni gigi ti kekereke nga na beku.’”—Jérémie 29:11.

TËNË SO AYE TI TENE NYEN: Nzapa amû zendo so lo yeke zi ande aye ti sioni kue, apasi, nga même kuâ. Tongana mo sara confiance na azendo ti Nzapa, beku so mo yeke na ni ndali ti kekereke ayeke aidé mo ti gbu ngangu na yâ ti akpale.

Aye ti nzoni so ambeni zo awara na lege so ala mä na bê so nzapa la acréé aye kue

“A yeke hon gbungo li ti mbi lakue tongana mbi bâ comment Nzapa a-aidé mbi na yâ ti aye mingi. Lo aidé mbi ti hinga ye so ayeke kota ye mingi na yâ ti gigi, ti duti na nzoni songo na azo nga ti ga kamarade ti lo.”—Cyndi, na États-Unis.

“So mbi mä na bê so Nzapa la acréé aye kue asara si gigi anzere na mbi mingi. Depuis so mbi mä na bê na Nzapa, mbi yeke ennuyé terê ti mbi lâ oko ape. Aye ayeke mingi ti manda na ndö ti aye so lo créé, nga na ndö ti Tënë ti lo.”—Elise, na France.

“Sarango ye alingbi na ye so Lo so acréé aye kue afa na yâ ti Bible asara si mbi yeke na ngia mingi. A aidé mbi ti kasa ndo ape, ti dengi mê nzoni ti mä azo nga ti duti na ngia na ye so mbi yeke na ni. A aidé mbi nga ti duti mbeni nzoni babâ.”—Peter, na Pays-Bas.

“Kozo ti tene mbi manda ye na ndö ti Nzapa, vie ti mbi ayeke gï ti te ye, ti lango, nga ti sara kue ti si na kua na l’heure. Mbi yeke gi bê ti mbi lani mingi. Laso, mbi bâ so gigi ayeke mbeni pendere cadeau so asara si mbi yeke na ngia nga mbi bâ ni na nene ni mingi.”—Liz, na Estonie.

“Mbi yeke mbeni zo so mbi gi bê ti mbi mingi. Me ti hinga so aye ti sioni, injustice, nga na pasi ayeke hunzi ande a-aidé mbi ti gbu ngangu.”—Adrien, na France.