Lango oko oko, azo mingi ayeke gi ti wara aye so ala yeke biani na bezoin ni. Ye ti mawa ni ayeke so, akpale ti dunia apeut ti sara si ayeke même ngangu na ala ti wara aye ni so. Ngbanga ti nyen?
Tongana akpale asi na yâ ti mbeni kodro, aye tongana kobe nga na da ayeke ga cher mingi.
Angangu kpale apeut ti sara si azo aperdre kua ti ala wala ala sara kua so nginza ni akono ape.
Yengingo ti sese wala ngu so asuku amû ndo apeut ti buba yâ ti dengo buze ti azo, ada wala ambeni ye ti ala. Ye so asara si mingi ti azo atï na yâ ti yere.
Ye so mo doit ti hinga
Tongana mo sara kua na nginza ti mo na lege ti ndara, a yeke aidé ande mo na ngoi ti mbeni ngangu kpale.
Girisa ape so, nginza so mo yeke bata nga na aye so mo yeke na ni apeut ti perdre valeur.
Ambeni ye ayeke dä so nginza apeut ti vo ni ape, aye tongana ngia nga na beoko ti sewa.
Ye so mo peut ti sara fadeso
Bible atene: “Tongana e yeke na kobe na bongo, so alingbi na e awe.”—1 Timothée 6:8.
Ti zia bê ti e gï na ndö ti ye so e yeke na ni, a yeke sara si e duti na ngia tongana e wara aye so e bezoin ni. Ye so ayeke mbilimbili kota ye na temps so e yeke na nginza mingi ape.
Tongana mo zia bê ti mo gï na ye so mo yeke na ni, peut-être mo yeke gi ti sara adépense mingi ape. Tongana mo yeke gi lakue ti vo aye so nginza ti mo alingbi na ni ape, mo yeke wara ande akpale mingi.