Tongana nyen la mo peut ti fa so mo ne azo?

NGBANGA TI NYEN LA A YEKE KOTA YE TI NE AZO?

Tongana e ne azo, a peut ti sara si mbeni ye so asi aga kota kpale ape.

Bible atene: “Ti kiri tënë na zo na ngangu pëpe asara si ngonzo adë, me tënë so ason bê asara si ngonzo alondo.” (aProverbe 15:1). Atënë nga na asarango ye so ane zo ape ayeke tongana essence so a tuku ni na lê ti wâ, so fani mingi aye ti pekoni ayeke sioni.
Jésus atene: “Yanga ayeke sara tënë ti ye so asi singo na bê ti zo.” (Matthieu 12:34). Tongana e ne azo ape, ye so ayeke fa biani bango ndo so e yeke na ni na ndö ti azo so mara ti ala, kodro ti ala wala ndo so ala londo dä ayeke nde na ti e.

Na yâ ti mbeni gingo nda ti ye so a sara ade ti ninga ape na ndö ti azo 32 000 so ayeke na yâ ti akodro 28, tongana a mû azo 100, azo 65 atene so, sarango ye na lege ni ape aga pire ahon ti kozo.

YE SO MO PEUT TI SARA

Atâa tongana mo yeke na ekole wala na place ti kua, fa so mo ne azo kue même si mo yeda na bango ndo ti ala ape. Gi ti hinga aye so mo na ala apeut ti mä terê na ndö ni. Ye so ayeke sara ande si mo yeke kasa azo ape wala mo yeke fâ ngbanga na ndö ti ala ape.

“Ala zia ti fâ ngbanga na li ti azo si a fâ ngbanga na li ti ala pëpe.”—Matthieu 7:1.

Sara ye na azo tongana ti so mo ye ti tene ala sara na mo. Tongana mo sara ye na azo na nzoni bê nga na lege ni, ala nga kue yeke sara tongaso na mo.

“Gï tongana ti so ala ye azo asara na ala, ala sara tongaso na azo ni nga.”—Luc 6:31.

Pardonné zo. Ti sara confiance na zo ni ayeke mû lege na mo ti bâ so lo ye fade ti son bê ti mo ape.

“Zo so ahinga ti bâ yâ ti aye nzoni ayeke sara ngonzo hio pëpe, nga so lo yeke hon na ndö ti ye ti songo bê, a yeke pendere ye mingi.”—aProverbe 19:11.

Na yâ ti mbeni Da ti Royaume ti aTémoin ti Jéhovah kozo ti tene bungbi akomanse. Azo so ngu ti ala ayeke nde nde nga so alondo na ando nde nde ayeke bara azo na ngia nga ala yeke sara lisoro na popo ti ala.

TONGANA NYEN LA ATÉMOIN TI JÉHOVAH AYEKE AIDÉ AZO TI NE ZO?

Na ando so aTémoin ti Jéhovah ayeke dä wala na place ti kua ti ala, ala yeke aidé amba ti ala ti ne azo.

E yeke manda Bible senge senge na azo kue, me e yeke forcé azo ape ti yeda na aye so e mä na bê na ni wala na abango ndo ti e. Ahon ti sara tongaso, e yeke gi ti sara ye alingbi na awango so ayeke na yâ ti Bible na lege so e yeke fa tënë na azo “na ngangu pëpe nga na nengo zo mingi.”—1 Pierre 3:15; 2 Timothée 2:24.

E yeke kpe ti ke zo senge senge nga e yeke yamba azo so aga na abungbi ti e so alondo na ando nde nde na so aye ti manda ye na ndö ti Bible. E yeke gi ti kanga bê nga e yeke “ne azo kue.”—1 Pierre 2:17, Mbeti ti Nzapa, Tënë so amu fini.

E yeke ne azo ti gourvernement ti ndo so e yeke dä (aRomain 13:1). E yeke sara ye alingbi na ndia ti kodro nga e yeke payé a-impôt. Atâa so e yeke mû mbage na aye ti poroso ape, e yeke ne droit so azo ayeke na ni ti mû desizion ala wani na ndö ti tënë ti poroso.