Noé aleke arche

NOÉ ayeke na wali na lo dü amolenge ti koli ota. Iri ti ala ayeke Sem, Cham na Japhet. Ala nga kue ayeke na awali ti ala. Tongaso, azo miombe ayeke na yâ ti sewa ti Noé.

Mbeni lâ, Nzapa ahunda na Noé ti sara mbeni ye so zo ahinga li ti lo na ni pëpe. Lo tene na lo ti leke mbeni kota arche, so akono tongana kota bateau me so akpa mbeni yongoro kota sanduku. A kangbi yâ ti arche ni na a-étage ota, na a leke akete chambre dä. Noé na sewa ti lo nga na anyama na akobe aduti na yâ ti achambre so.

Nzapa atene na Noé ti sara si ngu alingbi ti lï na yâ ti arche ni pëpe. Nzapa atene: ‘Mbi yeke sara si Kota Moa aga ti futi sese so kue. Zo kue so ayeke na yâ ti arche ni pëpe ayeke kui.’

Noé na amolenge ti lo amä yanga ti Jéhovah na ala komanse ti leke arche ni. Me ambeni zo ayeke he gi ala hengo. Azo so angbâ gi na sioni ti ala. Zo oko amä na bê pëpe so Nzapa ayeke futi ala.

A hunda ngoi mingi ti leke arche ni ngbanga ti so a kono mingi. Na nda ni, kusala ni ahunzi. Fadeso, Nzapa ahunda na Noé ti ga na anyama na yâ ti arche ni. Nzapa atene na lo ti ga na ambeni nyama ni use use, koli na wali. Me ti ambeni nyama ni nde, lo tene na lo ti ga na ala mbasambala mbasambala. Nzapa atene na lo ti ga na andeke ti mara nde nde kue. Noé asara tâ gi ye so Nzapa ahunda na lo.

Na nda ni, Noé na sewa ti lo alï na yâ ti arche ni, na Nzapa akanga yanga ni. Na yâ ti arche, Noé na sewa ti lo ayeke ku. Tara ti bâ tere ti mo na yâ ti arche ni na kungo ni, na tere ti Noé na sewa ti lo. Fade Kota Moa ayeke ga biani tongana ti so Nzapa atene?