Kota Moa juska na zingo azo ti Israël na Égypte

Gi azo miombe si asö kuâ na Kota Moa. Me tongana ngoi ayeke hon, ala wu mingi na sese juska ala ga saki mingi. Ngu 352 na peko ti Kota Moa, a dü Abraham. Nzapa asara ye alingbi na tënë ti yanga ti lo tongana lo mû na Abraham molenge ti koli so iri ti lo ayeke Isaac. Na popo ti amolenge ti Isaac ti koli use, Nzapa asoro Jacob.

Jacob adü amolenge ti koli 12 na ambeni molenge ti wali nga. Amolenge ti koli ti Jacob 10 ake ngambe ti ala Joseph na ala kä lo si lo ga ngbâa na Égypte. Na pekoni, Joseph aga mbeni kota zo ti komande ti Égypte. Tongana kota nzara asara, Joseph atara aita ti lo ti bâ wala ala gbian bê ti ala awe. Na nda ni, sewa ti Jacob kue, azo ti Israël, ague na Égypte. Aye so asi ngu 290 na peko ti dungo Abraham.

Teti ngu 215, azo ti Israël aduti na sese ti Égypte. Na peko ti kuâ ti Joseph, ala ga angbâa. A si na mbeni ngoi, a dü Moïse, na Nzapa airi lo ti zi azo ti Israël na Égypte. Na MBAGE 2 so, a sara tënë ti aye so asi na yâ ti ngu 857.