Chapitre 1

Atokua so alondo na yayu

E LINGBI ti haka Mbeti ti Nzapa tongana tokua so alondo na yayu, teti a yeke Baba ti e ti nduzu laa ato ni na e ti fa ye na e. Ye oko, a sala laso ndulu na ngu saki use, Gabriel, so ayeke mbeni ange “so ayeke luti ndulu na gbele Nzapa”, aga na anenee tokua use. Zia e baa aye so asala si lo ga fani use na sese.

E yeke na ngu ota kozoni na ngoi ti e. Na ya akete hoto ti Judée, ndulu na Jérusalem, mbeni prêtre ti Jéhovah so iri ti lo ayeke Zacharie aduti ka. Koli so na wali ti lo Elisabeth aga mbakoro fadeso, na ala yeke na molenge pepee. Tongana ngoi ti lo asi, Zacharie ague na Jérusalem ti sala kusala ti lo ti prêtre na ya temple ti Nzapa. A yeke na ngoi ni so si fade fade Gabriel asi na lo na mbage ti koli ti balaga so azo yombo da.

Mbito agbu Zacharie mingi. Me Gabriel ade be ti lo na tene so: “Zia mbito, Zacharie, teti Nzapa ama sambela ti mo. Fade wali ti mo Elisabeth adu na mo molenge ti koli, na fade mo di iri ti lo Jean.” Na pekoni Gabriel afa so ande Jean “ayeke ga kota na gbele Jéhovah” na fade lo “leke teti Jéhovah azo so aleke be ti ala”.

Be ti Zacharie agi lo mingi. A yeke ngangu mingi na lo ti ma na be so lo na Elisabeth alingbi ti wara molenge na ngoi so ala ga mbakoro awe. Teti tene so Gabriel atene na lo: “Fade mo ga wabuburu na mo lingbi sala tene pepee juska la ni so ye so asi, teti mo ma na be na tene ti mbi pepee.”

Na ngoi ni so, azo so aduti na gigi atonda ti hunda tele ti ala ngbanga ti nyen Zacharie aninga mingi na ya temple. Tongana lo sigigi na pekoni, na lo sala tene gi na maboko ti lo teti so yanga ti lo akanga, azo kue ahinga so lo baa mbeni ye ti kpene.

Tongana Zacharie ahunzi ngoi ti kusala ti lo na ya ti temple, lo kiri na ndo ti lo. Na pekoni kete, ye so ange asala tene ni aga taa tene—Elisabeth ame ngo! Na ya ti nze oku, lo ngba gi na ndo ti lo yongoro na azo ti ku dungo ni.

Na pekoni Gabriel akiri asi. Ti so, lo sala tene na zo wa? Na mbeni maseka wali so iri ti lo ayeke Marie, lo londo na kodoro ti Nazareth. Tene wa lo ga na ni na lo? Mo ma! Gabriel atene na Marie: “Mo ga nzoni na le ti Nzapa. Baa! fade mo me ngo, mo du molenge ti koli, na fade mo di iri ti lo Jésus. Fade lo ga kota, na fade ala di iri ti lo Molenge ti Lo ti Nduzu Ahon Kue; (...) na fade lo komande azo ti da ti Jacob lakue, na fade royaume ti lo ahunzi la oko pepee.”

Biani, be ti Gabriel anzere mingi na kusala so amu na lo ti sala. Tongana e diko ambeni tene na ndo Jean na Jésus, fade e hinga ngbanga ti nyen atokua so alondo na yayu ayeke kota ye mingi. 2 Timothée 3:16; Luc 1:5-33.

▪ Akota tokua use so alondo na yayu ayeke so wa?

▪ Zo wa aga na atokua so, a ga na atokua so na azo wa?

▪ Ngbanga ti nyen a yeke ngangu mingi ti ma na be na atokua use so?