Chapitre 2

Ayekia lo kozoni si adu lo

ANGE GABRIEL atene na Marie, mbeni maseka, so fade lo yeke du mbeni molenge ti koli so ayeke duti ande gbia teti lakue. Me Marie ahunda na lo: “Ye ni alingbi ti si tongana nyen, teti la oko mbi bungbi na mbeni koli pepee?”

Gabriel afa ndani na lo: “Fade yingo ti nzoni kue azu na ndo mo, na fade mo duti na gbe ti ngangu ti Lo ti Nduzu Ahon Kue. Teti tene so nga, lo ti nzoni kue so fade mo du lo, fade ala hiri lo Molenge ti Nzapa.”

Ti mu maboko na Marie ti ma na be na tene ti lo, Gabriel atene: “Baa! Elisabeth ita ti mo, lo so ala tene lo yeke ngombo, ame ngo ti molenge koli nga na la ti mbakoro ti lo, na lo yeke na ngo nze omene fadeso; teti ye oko ayeke pepee so Nzapa alingbi sala pepee.”

Marie ayeda na tene ti Gabriel. Kiringo tene ti lo ayeke nyen? Lo tene: “Baa! Mbi yeke boi wali ti Jéhovah! Zia ye kue aga na mbi alingbi na tene ti mo.”

Tongana Gabriel akiri awe, ngoi kete na pekoni Marie aleke tele ti lo ti gue na Elisabeth, so na koli ti lo, Zacharie, alango na ya ahoto ti Judée. Teti so lo lango na Nazareth, fade Marie ayeke sala lango ota wala osio na lege kozoni si lo si.

Tongana Marie asi na da ti Zacharie, lo li na lo bala azo ti da ni. Gi na ngoi ni so, Elisabeth asi na yingo ti nzoni kue na lo tene na Marie: “Tene nzoni aga na mo na popo ti awali, na tene nzoni aga na ndo hale ti ya ti mo! Ye so aga na mbi tongana nyen? so mama ti Seigneur ti mbi asi na mbi! Baa! tongana tene ti balao ti mo asi me ti mbi, molenge so ayeke na ya ti mbi ado na ngia.”

Tongana lo ma tene so ngia asi na be ti Marie na lo tene: “Âme ti mbi asepela Jéhovah, na yingo ti mbi asala ngia na ya Nzapa Sauveur ti mbi; teti lo baa kete ndo ti boi wali ti lo. Baa! na peko ti ye so, fade awagame kue adi iri ti mbi wali so ayeke na ngia; teti Lo ti ngangu asala kota ye na mbi.” Ataa amu na lo kota matabisi, Marie amu gunda kue na Nzapa, lo tene: “Iri ti lo ayeke nzoni kue, na lo sala be-nzoni na awagame ti ngoi kue, ala so akpe mbito ti lo.”

Marie angba ti gunda Nzapa na lege ti bia ti prophétie, lo tene: “Lo fa ngangu na lege ti ti ti lo, lo kangbi azo so ayeke na bibe ti fandara na be ti ala. Lo lungula azo ti ngangu na ndo trône ti ala na lo yaa iri ti ala so ayeke na taa-be-ti-molenge; lo sala si azo so ayeke na nzala asi na nzoye, na lo to azo ti mosoro, na ti ti ala ayeke senge. Lo sala na boi ti lo Israël, si lo dabe lo na be-nzoni ti lo, lege-oko tongana lo sala tene na akotara ti e, na Abraham na hale ti lo, teti lakue lakue.”

Marie angba na tele ti Elisabeth nze ota. Lo mu na lo maboko mingi na tanga ti lango so angba na lo kozoni si lo du molenge ti lo. Biani a yeke ye ti ngia mingi ti baa awali use be-taa-zo, so ala use ame ngo na lege ti yingo ti Nzapa, ti duti na ndo oko na ya ngoi ti nzoni so na fini ti ala!

Mo baa so ayekia Jésus même kozoni si adu lo? Elisabeth ahiri lo “Seigneur ti mbi”, na molenge so ayeke na ya ti lo ado na ngia tongana Marie asi. Me, tongana ti so e yeke baa ande, na mbeni mbage ambeni zo ayekia oko pepee Marie na molenge so lo yeke du ande. Luc 1:26-56.

▪ Tene ti nyen Gabriel atene na Marie ti fa na lo tongana nyen lo yeke me ngo ande?

▪ Tongana nyen ayekia Jésus kozoni si adu lo?

▪ Marie atene nyen ti sepela Nzapa na lege ti bia ti prophétie?

▪ Ngoi oke Marie aduti na tele ti Elisabeth, ngbanga ti nyen a yeke na lege ni so Marie aduti na Elisabeth na ngoi so?