Chapitre 8

Akpe gbia ti sioni

JOSEPH azingo Marie na be ti bi ti fa ndani na lo hio. Ange ti Jéhovah asi na lo fade na lo tene: “Mo londo, na mo kamata kete molenge ni na mama ti lo,f mo kpe na sese ti Egypte, na mo ngba ka juska mbi sala tene na mo; teti fade Hérode agi molenge so ti fa lo.”

Fade fade ala ota kue akpe. Ala sala ye na lege ni teti Hérode ama so azo ti gingo nda ti atongoro ahanda lo na ala zia kodoro ni awe. E da be ti e so ala lingbi ti kiri ando na lo ti fa ndo so Jésus ayeke da tongana ala wara lo. Be ti Hérode aso mingi. Tongaso ti tene lo fa Jésus, lo mu yanga ti tene afa amolenge koli kue so ngu ti ala asi na ngu use, na ala so ade asi na ngu use pepee, na Bethléhem nga na ya akodoro kue na tele ni. Lo fa popo ti ngu so, na lege ti tene so lo ma na yanga ti azo ti gingo nda ti atongoro so alondo na mbage ti To.

Fango akete molenge ti koli so ayeke ye ti sioni mingi! Aturugu ti Hérode ali na ngangu na ya da oko oko. Tongana ala wara mbeni kete molenge ti koli, ala gboto lo na ti ti mama ti lo. E hinga pepee wungo ti amolenge so akui tongaso. Ye oko atoto na ademango tele mingi ti amama so asala si mbeni prophétie ti mbeti ti Jérémie, prophète ti Nzapa, aga taa tene.

Na ngoi ni so, Joseph na sewa ti lo asi nzoni na Egypte, ndo so ala duti da fadeso. Me na mbeni bi, ange ti Jéhovah akiri asi na Joseph na ya suma. Ange atene na lo: “Mo londo, mo kamata kete molenge ni na mama ti lo, mo gue na sese ti Israël, teti ala so agi ti fa molenge so, ala kui awe.” A yeke tongaso si Joseph na sewa ti lo akiri na kodoro ti ala, ye so asala si mbeni prophétie ti Mbeti ti Nzapa so atene molenge ti Nzapa ayeke londo na Egypte ti sigigi aga taa tene.

Biani Joseph aye ando ti ngba na Judée, ndo so ala duti ando ka kozoni si ala kpe na Egypte. Me, lo ma so Archélaüs, sioni molenge ti Hérode, aga fadeso gbia ti Judée, tongaso na lege ti mbeni suma Jéhovah asala na lo tene ti ye ti sioni so. Ni laa, Joseph na sewa ti lo amu lege ti gue na mbage ti banga ti duti na gbata ti Nazareth na sese ti Galilée. Jésus akono na ndo so, yongoro na ndo ti vorongo nzapa ti aJuif. Matthieu 2:13-23; Jérémie 31:15; Osée 11:1.

▪ Tongana azo ti gingo nda ti atongoro akiri abaa lo pepee, ye ti sioni wa gbia Hérode asala? Tongana nyen abata Jésus?

▪ Tongana lo londo na Egypte, ngbanga ti nyen Joseph akiri angba na Bethléhem pepee?

▪ Aprophétie wa ti Mbeti ti Nzapa aga taa tene na ngoi ni so?