Chapitre 12

Batême ti Jésus

JEAN AFA tene alingbi na nze omene. Na pekoni, Jésus, so ayeke na ngu bale ota fadeso, asi na lo na Jourdain. Teti nyen? Jésus aye ti baa Jean na lege ti songo? wala Jésus aye ti hinga tongana nyen kusala ti lo ayeke gue na li ni? Pepee, Jésus aga ti hunda Jean ti batisé lo.

Me hio Jean ake, lo tene: “A lingbi mo mu na mbi batême, na mo ga na mbi?” Jean ahinga so Jésus, koya ti lo, ayeke nde na tanga ti azo kue: lo yeke Molenge ti Nzapa. Tongana Marie, so ayeke na ngo ti Jésus, asi na ndo ti Elisabeth, Jean ado na ngia na ya ti lo! Elisabeth, mama ti Jean, aglisa pepee ti sala tene so na lo na pekoni. Lo tene nga na Jean tene ti ange so afa na gigi dungo ti Jésus na tene ti a-ange so asi na awabatango kundu na bi tongana adu Jésus.

Ni laa si Jésus ayeke mbeni wande na le ti Jean pepee. Na Jean ahinga so batême ti lo ayeke teti Jésus pepee. A yeke teti ala so agbian be ti ala na lege ti sioni so ala sala, me Jésus ayeke na siokpari pepee. Ataa so Jean ake, Jésus azia pepee ti hunda batême na lo: “Zia si ye aduti tongaso na ngoi so, teti a yeke tongaso si e lingbi ti sala ye kue so ayeke mbilimbili.”

Ngbanga ti nyen a yeke na lege ni ti mu batême na Jésus? Teti so, na lege ti ye so abaa lo, batême ti Jésus aye ti tene pepee gbiango be teti siokpari, me a ye ti tene lo luti awe na gbele Baba ti lo ti sala ye so be ti Lo aye. Juska na ngoi so Jésus ayeke zo ti kpakango keke, me ngoi alingbi awe ti tonda ti sala kusala so Jéhovah Nzapa ato lo ngbanga ni na ndo sese. Mo tene Jean ayeke ku mbeni ye ti kpene ti si na ngoi so lo yeke mu batême na Jésus?

Na pekoni Jean atene: “Lo so ato mbi ti mu batême ti ngu atene na mbi: ‘Zo so fade mo baa yingo azu na aduti na ndo lo, lo yeke zo so amu batême ti yingo ti nzoni kue.’ ” Tongaso, Jean ahinga so fade ayeke sa yingo ti Nzapa na ndo ti mbeni zo oko na popo ti ala so ayeke wara batême ande na ti ti lo. Ni laa, a yeke na lege ni biani ti baa so be ti Jean ado pepee tongana ‘yingo ti Nzapa azu na ndo Jésus tongana bungu’ na ngoi so lo yeke sigigi na ya ti ngu.

Ye oko, ambeni ye asi nga na ngoi so Jésus akamata batême. ‘Yayu alungula’ na lo. So aye ti tene nyen? So tongana abatisé lo, lo kiri lo dabe lo na fini ti lo na yayu kozoni si lo ga na sese. Tongaso, Jésus adabe lo biani fadeso na fini ti lo tongana mbeni molenge ti yingo ti Jéhovah Nzapa, na so aye ti tene lo dabe lo nga na ye kue so Nzapa atene na lo na yayu kozoni si lo ga zo na sese.

Me mbeni ye asi nga na ngoi ti batême so. Mbeni yanga asala tene na yayu: “So ayeke Molenge ti mbi, so mbi ndoyee lo, so mbi yeda na lo.” So ayeke lego ti zo wa? Ti Jésus mveni? Oko pepee! A yeke lego ti Nzapa. Biani, Jésus ayeke Molenge ti Nzapa, lo yeke Nzapa lo mveni pepee, tongana ti so ambeni atene.

Ye oko, Jésus ayeke molenge ti Nzapa na lege ti mitele, lege-oko tongana kozo koli Adam. Disciple Luc, na peko ti so lo sala tene ti batême ti Jésus, atene: “Jésus lo mveni, tongana lo tonda ti kusala ti lo, ngu ti lo ayeke ndulu na ngu bale ota, na azo abaa lo tongana molenge ti Joseph, so ayeke molenge ti Héli, (...) molenge ti David, (...) molenge ti Abraham, (...) molenge ti Noé, (...) molenge ti Adam, molenge ti Nzapa.”

Adam ayeke “molenge ti Nzapa” na lege ti mitele na Jésus ayeke tongaso nga. Jésus ayeke koli so ahon tanga ti azo kue, tene so asigigi polele tongana e baa fini ti lo. Ye oko, na ngoi so lo wara batême, Jésus ali na ya mbeni fini songo na Nzapa, lo ga Molenge ti Nzapa na lege ti yingo. Nzapa ahiri lo fadeso ti kiri na yayu, tongana lo zia Jésus na ndo lege so ayeke sala si na ndani lo mu fini ti lo ti zo ti mitele teti lakue lakue na sadaka ndali ti azo so afa ngbanga ti kui na li ti ala. Matthieu 3:13-17; Luc 3:21-38; 1:34-36, 44; 2:10-14; Jean 1:32-34; aHébreu 10:5-9.

▪ Ngbanga ti nyen Jésus ayeke mbeni wande pepee na le ti Jean?

▪ Jésus ayeke na siokpari pepee, tongaso teti nyen amu na lo batême?

▪ Na lege ti ye so Jean ahinga na ndo Jésus awe, ngbanga ti nyen be ti lo ado pepee tongana lo baa yingo ti Nzapa azu na ndo Jésus?