Chapitre 16

Nzala ti lege ti vorongo ti Jéhovah

AITA ti Jésus—ambeni molenge ti koli ti Marie—ayeke Jacques, Joseph, Simon na Judas. Me kozoni si ala kue ague Jésus na adisciple ti lo na Capernaüm, mbeni gbata ndulu na kota ngu ti Galilée, ala luti peut-être na da ti ala na Nazareth ti bungbi ambeni ye so ala ye ti gue na ni.

Me teti nyen Jésus ayeke gue na Capernaüm? Ngbanga ti nyen lo ngba ti sala kusala na Cana, na Nazareth, wala na mbeni kodoro ti ndo ti ahoto ti Galilée pepee? Kozoni kue, Capernaüm ayeke gbata so aduti na ndo so alingbi, na a yeke kota gbata. Na nga, mingi ti afini disciple ti Jésus alango na Capernaüm wala ndulu na ni. Tongaso, fade ahunda na ala pepee ti zia da ti ala si Jésus afa ye na ala.

Na ngoi so Jésus aduti na Capernaüm, lo sala aye ti kpene ti dongo be, tongana so lo mveni ayeke tene tene ni na pekoni. Me a ninga mingi pepee na Jésus na amba lo alondo mbeni ti tambela. Ngoi ti ndo wa mingi pepee aga awe, na ala mu lege ti gue na Jérusalem ti sala Pâque ti ngu 30. Na ya ngoi so ala yeke ka, adisciple abaa mbeni mbage ti Jésus so peut-être ade ala baa pepee.

Na lege ti Ndia ti Nzapa, azo ti Israël alingbi ti mu asadaka ti anyama na Nzapa. Ni laa, na Jérusalem ka, awadengo buze ayeke ka anyama na andeke na azo ti Israël. So ayeke ye ti nzoni teti ala. Ye oko, ala yeke de buze so gi na ya temple mveni, na ala yeke nzi azo na lege ti angere so akono.

Be ti Jésus aso, lo sala mbeni chicotte ti akamba na lo tomba awadengo buze so na gigi. Lo tuku na sese nginza ti azo ti sanzengo nginza na lo kinda atable ti ala. Lo dekongo na azo so aka abungu: “I kamata ye so, i sigigi na ni! I zia ti sala si da ti Baba ti mbi aga da ti dengo buze!”

Tongana adisciple ti Jésus abaa ye so, ala da be ti ala na tene so Mbeti ti Nzapa atene: “Fade nzala ti da ti mo ate mbi.” Me aJuif ahunda na Jésus: “Mo mu fa ti nyen na e, teti mo sala ye so?” Jésus akiri tene na ala: “I fa temple so, na fade mbi yaa ni na nduzu na la ota.”

A-Juif abaa so Jésus asala tene ti taa temple ti tene, na ala hunda lo: “A sala kusala ni ngu bale osio na ndoni omene ti sala temple so, na fade mo yaa ni na nduzu na la ota?” Me Jésus asala tene ti temple so ayeke tele ti lo. Na peko ti ngu ota, tongana ayaa Jésus na popo ti awakinda, adisciple ti lo ada be ti ala na tene so. Jean 2:12-22; Matthieu 13:55; Luc 4:23.

▪ Na peko ti matanga ti mariage na Cana, Jésus ague na ndo wa?

▪ Ngbanga ti nyen be ti Jésus aso, na lo sala nyen?

▪ Tongana adisciple abaa ye so Jésus asala, ala da be ti ala na nyen?

▪ Jésus atene tene ti nyen na ndo “temple so”, na lo ye ti tene nyen laa?