Chapitre 22
A hiri adisciple osio
NA PEKO ti so azo agi lege ti fa Jésus na kodoro ti lo Nazareth, lo londo lo gue na kodoro ti Capernaüm ndulu na kota ngu ti Galilée. A sala si mbeni prophétie ti Esaïe aga taa tene. A yeke prophétie so atene fade azo ti Galilée so aduti na yanga ti ngu ayeke baa mbeni kota lumière.
Tongana Jésus angba ti sala kusala ti fango tene ti Royaume na ndo so, kusala ti sala si lumière aza, lo wara adisciple ti lo osio. Ala gue na lo na tambela kozoni, me ala kiri na kusala ti ala ti gingo susu tongana ala londo na Jésus na Judée na ala kiri na kodoro ti ala. Fadeso peut-être Jésus agi ala, teti so a yeke ngoi ti wara ambeni zo ti mu maboko na lo lakue si lo lingbi ti fa lege na ala ti ngba ti sala kusala ni na peko ti lo.
Tongana Jésus ahon na yanga ti kota ngu ni lo baa Simon Pierre na amba ti lo so asukula agbanda ti ala, lo gue na tele ti ala. Lo zu na ya ngo ti Pierre na lo hunda lo ti gue yongoro kete na sese ni. Tongana ala yo na sese kete, Jésus aduti na ya ngo na lo tonda ti fa ye na azo mingi so ayeke na yanga ti ngu ni.
Na pekoni, Jésus atene na Pierre: “Gue na ndo so ngu ali, i bi gbanda ti i ti gi asusu.”
Pierre akiri tene: “Wafango ye, e bi gbanda na bi so kue, na e wara ye oko pepee, me tongana mo tene, fade mbi bi gbanda ni.”
Tongana ala bi agbanda, ala gbu asusu mingi, na agbanda ti ala aye ti fa. Ala hiri amba ti ala na mbeni ngo ti ga hio ti mu na ala maboko. Fade ango use kue asi singo na asusu, tongaso ango atonda ti linda. Tongana lo baa ye so, Pierre akuku na gbele Jésus na lo tene: “Zia mbi, Seigneur, teti mbi yeke zo ti siokpari.”
Jésus atene na lo: “Zia mbito. Na peko ti ye so, fade mo gi azo.”
Jésus ahiri nga André ita ti Pierre. Lo wa ala: “I ga na peko ti mbi, fade mbi sala si i ga azo ti gi azo.” Azo so agi susu na ala, Jacques na Jean, amolenge ti Zébédée, ahiri ala nga lege-oko tongaso, na ala kue ayeda na ni fade fade. Tongaso akoli osio so azia kusala ti gingo susu ti ala na ala ga akozo zo so ague na peko ti Jésus lakue. Luc 5:1-11; Matthieu 4:13-22; Marc 1:16-20; Esaïe 9:1, 2 [8:23; 9:1 sango].
▪ Ngbanga ti nyen Jésus ahiri adisciple ti ga na peko ti lo, na ala yeke azo wa?
▪ Ye ti kpene wa amu mbito na Pierre?
▪ Jésus ahiri adisciple ti lo ti gi nyen?