Chapitre 28

Tene ti ziango kobe

A SI NDULU na ngu oko na peko ti la ni so Jésus ague na Pâque ti ngu 30. Jean Wabatizengo zo ayeke fadeso na da ti kanga, a sala nze mingi awe. Lo ye si adisciple ti lo ague na peko ti Christ, me ala kue asala ni pepee.

Fadeso ambeni disciple ti Jean aga na peko ti Jésus na ala hunda lo: “Ngbanga ti nyen e na aFarizien azia kobe, me adisciple ti mo azia kobe pepee?” A-Farizien azia kobe fani use yenga oko oko; a yeke mbeni ye so lege ti vorongo nzapa ti ala afa na ala ti sala, na peut-être adisciple ti Jean asala tongaso nga. Ala zia kobe nga ngbanga ti so vundu asala ala so Jean ayeke na da ti kanga na ala hunda ngbanga ti nyen adisciple ti Jésus afa na gigi vundu ti ala tongaso nga pepee.

Ti kiri tene na ala, Jésus afa ndani tongaso: “Tongana fini-koli ayeke, afo lo alingbi ti toto na vundu? Me mbeni la alungula fini-koli na popo ti ala, na la ni ka fade ala zia kobe.”

Adisciple ti Jean alingbi ti dabe ala so Jean lo mveni ahaka Jésus na Fini-koli ni. Tongaso, tongana Jésus ayeke na popo ti ala, Jean ayeke tene pepee so ayeke ngoi ti zia kobe, na adisciple ti Jésus azia ni pepee. Na pekoni, tongana Jésus akui, fade adisciple ti lo atoto na vundu na ala zia kobe. Me tongana ayaa lo na popo ti awakinda, na lo kiri na yayu awe, fade ala lingbi ti toto na vundu na ti zia kobe pepee.

Na pekoni, Jésus amu atapande so: “Mbeni zo akamata fini bongo pepee ti fu na le ti ka ti ngbele bongo, wala fade fini bongo ni asuru yanga ti ngbele bongo ni, na ka ni aga kota ahon. Na azo asa fini vin pepee na ya ngbele bozo ti poro, wala fade bozo ni asuru na vin ni asa na sese, na bozo ni afuti. Me ala sa fini vin na ya fini bozo.” Atapande so atingbi na tene ti ziango kobe tongana nyen?

Jésus amu maboko na adisciple ti Jean Wabatizengo zo ti hinga mbeni zo oko alingbi ti ku pepee azo so amu peko ti lo ti sala ye alingbi na angbele salango ye ti vorongo nzapa ti aJuif, tongana ziango kobe lakue. Lo ga pepee ti leke alege ti vorongo nzapa so abuba na so aga ndulu ti bi ala na ngunda awe. Fade aleke lege ti Christ pepee ti lingbi na vorongo nzapa ti aJuif ti ngoi ni ka so asi na atene ti kotara. Oko pepee, fade a ga pepee tongana fini bongo so afu ni na le ti ka ti ngbele bongo, wala fini vin so asa ni na ya ngbele bozo ti poro. Matthieu 9:14-17; Marc 2:18-22; Luc 5:33-39; Jean 3:27-29.

▪ Azo wa azia kobe lakue? Ngbanga ti nyen ala zia ni?

▪ Ngbanga ti nyen adisciple ti Jésus azia kobe pepee tongana lo ngba na popo ti ala? Na pekoni, na lege wa si fade fade alungula aye so asala si ala zia kobe?

▪ Jésus afa atapande wa na ala? Ala ye ti tene nyen?