Chapitre 29

A sala anzoni kusala na la ti sabbat

E YEKE na printemps ti ngu 31. Ambeni nze ahon awe na peko ti ngoi so Jésus alondo na Judée ti gue na Galilée si lo sala tene na wali ti Samarie ndulu na yanga ti du ti ngu.

Na peko ti so lo fa tene mingi na Galilée kue, Jésus akiri fadeso na Judée, na ka, lo fa tene na ya asynagogue. Mbeti ti Nzapa asala tene mingi ti kusala so Jésus asala na Galilée, me a sala tene gi kete na ndo kusala ti lo na Judée na ngoi so, nga na ngoi so lo duti ka na peko ti Pâque ti ngu so ahon. Biani, azo ayeda na kusala ti lo na Judée lege-oko na Galilée pepee.

Fade fade Jésus amu lege ti gue na Jérusalem, kota gbata ti Judée, ti sala matanga ti Pâque ti ngu 31. Ndulu na Yanga-kodoro ti Angasangbaga, mbeni ngu ayeke so asua pepee so ahiri ni Bethzatha. Azo ti kobela mingi ague da, awaziba na awazin. Ala ma na be so ala lingbi sava tongana ala zu na ya lende so tongana ayengi ngu ni.

A yeke la ti sabbat na Jésus abaa ndulu na lende so mbeni koli so ayeke na kobela asala ngu bale ota na ndoni miombe. Teti so lo hinga koli ni ayeke na kobela so ngu mingi, Jésus ahunda lo: “Mo ye ti wara sava ti tele?”

Lo kiri tene na Jésus: “Seigneur, zo oko ayeke na mbi pepee ti zia mbi na ya ngu so tongana a yengi; na tongana mbi yeke zu, mbeni zo azu kozoni na mbi.”

Jésus atene na lo: “Londo, mu gbogbo ti mo, mo tambela.” Na fade fade koli so awara sava ti tele, lo mu gbogbo ti lo, na lo tonda ti tambela!

Tongana aJuif abaa koli so, ala tene na lo: “A yeke la ti sabbat, na ndia amu lege na mo ti yo gbogbo ti mo pepee.”

Lo kiri tene na ala: “Lo so amu na mbi sava ti tele, lo tene na mbi: ‘Mu gbogbo ti mo, mo tambela.’ ”

Ala hunda: “Zo wa atene na mo: ‘Mu gbogbo ti mo, mo tambela’?” Jésus ahon awe ngbanga ti so azo ayeke mingi, na koli so lo sava lo ahinga iri ti Jésus pepee. Na pekoni, Jésus na koli ni atingbi na ya temple, na koli ni ama iri ti zo so asava lo.

Lo gue fadeso, lo wara aJuif ti tene na ala so a yeke Jésus so amu na lo sava ti tele. Tongana ala ma tene so, aJuif ague ti baa Jésus. Ndani nyen? Ala ye ti hinga na ndo wa laa lo wara ngangu ti sala aye ti kpene tongaso? Oko pepee. A yeke ti gi lo na tene teti lo sala anzoni kusala so na la ti sabbat. Na ala tonda même ti sala ngangu na lo! Luc 4:44; Jean 5:1-16.

▪ Ngoi oke ahon na peko ti so Jésus asi na Judée?

▪ Ngbanga ti nyen azo aga mingi na ngu so ahiri ni Bethzatha?

▪ Ye ti kpene wa si Jésus asala na tele ti lende so, na aJuif abaa ni tongana nyen?