Chapitre 30

Lo kiri tene na azo so aklame lo

TONGANA amokonzi ti nzapa ti aJuif aklame Jésus, ala tene lo bata la ti sabbat pepee, lo kiri tene so na ala: “Baba ti mbi asala kusala juska fadeso, na mbi sala kusala nga.”

Ataa aFarizien aklame lo tongaso, kusala ti Jésus ayeke pepee ye so ndia ti sabbat akanga lege na zo ti sala. A yeke Nzapa so amu na lo kusala ti fa tene na ti lungula kobela. A lingbi na tapande ti Nzapa, Jésus asala kusala so la na la. Me, kiringo tene ti lo asala si ngonzo asala aJuif mingi ahon ti kozoni na ala gi lege ti fa lo. Ngbanga ti nyen?

Ngbanga ti so fadeso ala tene Jésus abata la ti sabbat pepee, na nga ala tene lo zonga Nzapa tongana lo tene lo yeke taa Molenge ti Nzapa. Me, mbito asala Jésus pepee, na lo kiri lo sala tene na ala na ndo dutingo ti lo na Nzapa so ayeke nde. “Baba andoyee Molenge, na lo fa na Molenge ye kue so lo mveni asala.”

“Teti lege-oko tongana Baba ayaa awakinda, na lo mu fini na ala, atene Jésus na pekoni, tongaso Molenge amu fini nga na azo so lo ye ti mu fini na ala.” Biani, Molenge ayaa awe ala so akui na lege ti yingo! ‘Zo so ama tene ti mbi na ama na be na lo so ato mbi, lo tene, lo hon kui awe, lo si na fini.’ Na pekoni, lo tene: “Ngoi ayeke ga, na a si fadeso awe, so fade awakinda ama yanga ti Molenge ti Nzapa, na ala so ama, fade ala yeke na fini.”

Ataa Jésus ade azingo mbeni taa kua pepee, lo tene na azo so aklame lo so lo yeke zingo ande akua. Lo tene: “Zia be ti i ado pepee, tene ti ye so, teti ngoi ayeke ga so azo kue so ayeke na du-kua, fade ala ma yanga ti lo, na ala sigigi.”

Juska na la ni ka, Jésus asala tene polele na gbele azo pepee ti kota kusala ti lo na ya ye so be ti Nzapa aye. Me, azo so aklame lo awara gi tene ti témoin ti lo pepee na lege ti atene so. Jésus adabe ala: “I to azo na Jean giriri, na lo sala tene ti témoin ti taa tene.”

Gi ngu use kozoni, Jean Wabatizengo zo asala tene na amokonzi ti nzapa ti aJuif ti Lo so ayeke ga na peko ti lo. Jésus adabe ala so kozoni ala gunda Jean mingi, lo so aduti fadeso na da ti kanga. Lo tene: “I yeda ti duti na ngia mingi na ya lumière ti lo teti mbeni kete ngoi.” Jésus adabe ala na tene so si lo lingbi ti mu maboko na ala, biani, ti so ala. Me, lo zia be ti lo pepee gi na tene ti témoin ti Jean.

“Taa kusala so mbi yeke sala [so ti tene nga ye ti kpene so lo sala ni fade fade], asala tene ti témoin ti mbi, so Baba ato mbi.” Na nga, lo tene: “Baba so ato mbi asala tene ti témoin ti mbi awe.” Mbeni ngoi so Nzapa asala tene ti témoin na lege ti Jésus ayeke na la ti batême ti lo, lo tene: “So ayeke Molenge ti mbi so mbi ndoyee lo mingi.”

Biani, mbeni ye oko pepee azi lege na azo so aklame Jésus ti ke lo. Mbeti ti Nzapa, so ala tene ala gi na ya ni, asala tene ti témoin ti lo. Jésus akondani tongaso: “Tongana i ma na be na tene ti Moïse, ka i ma na be na tene ti mbi nga, teti lo sala tene ti mbi na mbeti. Me, tongana i ma na be na tene ti lo pepee, ka fade i ma na be na tene ti mbi tongana nyen?” Jean 5:17-47; 1:19-27; Matthieu 3:17.

▪ Ngbanga ti nyen kusala ti Jésus ake ndia ti sabbat pepee?

▪ Jésus asala tene ti kota kusala ti lo na ya ye so Nzapa aleke ti sala tongana nyen?

▪ Ti fa na gigi so lo yeke Molenge ti Nzapa, Jésus adabe ala na tene ti témoin ti zo wa?