Chapitre 45

A yeke ngangu na lo ti ga disciple

TONGANA Jésus asigigi na ya ti ngo ni, mbeni kota ye ti kpale ayeke ku lo! Ambeni koli use so ayeke sioni mingi asigigi na popo ti adu ti kua, ala gue na loro ti te Jésus. Ala yeke na ayingo sioni na ya ti ala. Le ti azo abaa mingi mbeni oko ti azo use so teti lo yeke sala ye ti ngangu mingi na azo, nga teti so lo yeke na gbe ti ngangu ti ayingo sioni aninga awe.

Teti ngu mingi koli so ayu bongo pepee na lo yeke lango gi na popo ti adu ti kua. Na bi kue na la kue lo yeke dekongo ngangu na lo mu atene ti sala na ka na tele ti lo. Lo yeke sala ye ti ngangu mingi tongaso zo oko aye ti hon na lege so pepee. Kozoni azo atara ti kanga lo na zingere, me lo fa ya ti zingere na kamba ti wen na gere ti lo. Zo oko ayeke na ngangu ti gbu lo pepee.

Tongana koli so aga ndulu na Jésus na lo kuku na gbe ti lo, ayingo sioni so ayeke na ya lo apusu lo ti tene na kongo: “Tene ti mbi na tene ti mo ayeke oko tongana nyen? Jésus, mo Molenge ti Nzapa ti Nduzu Ahon Kue. Mbi hunda mo na iri ti Nzapa, mo sala sioni na mbi pepee!”

Jésus angba ti tene: “Sigigi na ya zo so, mo yingo sioni!” Na pekoni, Jésus ahunda na lo: “Iri ti mo ayeke nyen?”

“Iri ti mbi ayeke Mingi, teti so e yeke mingi.” Ayingo sioni awara kota ngia ti sala sana na azo so ala li na ya ti ala, na lege ti mbito ala ye ti bungbi tele ti ala mingi ti sala sioni na azo. Nde na so, na gbele Jésus ala hunda lo mingi si lo to ala na bukulugbu ti bingo pepee. E kiri e baa so Jésus ayeke na kota ngangu; ayingo sioni aduti na mbito na gbele lo. Ye so afa na gigi nga so ayingo sioni ahinga ngbanga so fade Nzapa ayeke fa na li ti ala, ti bi ala lege-oko na mokonzi ti ala, Satan Diable, na ya bukulugbu ti bingo.

Ndulu na ala, na tele ti hoto ni, kundu ti acochon so wungo ti ala kue ayeke ndulu na saki use ayeke te kobe. Tongaso ayingo sioni atene: “Tokua e na ya ti acochon, si e li e duti na ya ti ala.” E baa so ayingo sioni awara ngia ti li na ya acréature so ayeke na mitele ti sala sana na ala. Tongana Jésus ayeda na ayingo sioni ti li na ya ti acochon mingi so, anyama so akpe ngangu, ala ti na tele ti hoto na ala kue atuku na ya ngu ti ingo, ala kui.

Tongana ala baa ye so asi, azo so abata acochon amu loro, akpe si ala fa tene ni na ya ti kodoro nga na azo so ayeke na ya ti ayaka. Na azo alondo ti ga ti baa ye so asi. Ala baa ye nyen tongana ala si? Ala baa koli so ayingo sioni asigigi na ya ti lo awe. Baa, lo yu bongo na tele ti lo, li ti lo aga nzoni na lo duti na gbele Jésus!

Azo so abaa na le ti ala ye so Jésus asala afa na ala tongana nyen koli ni aga nzoni. Ala fa na ala nga tene ti acochon so akui. Tongana ala ma tene ni, kota mbito agbu ala, na ala hunda Jésus ti londo na kodoro ti ala. Lo yeda na tene ti ala, na lo ko na ya ti ngo ni ti gue. Zo so fade ayeke na ayingo sioni ahunda ti gue na lo. Me Jésus atene na lo: “Kiri na ndo ti mo, na azo ti sewa ti mo, mo fa na ala ye kue so Jéhovah asala teti mo, na lege ti nzoni be ti lo.”

Mingi Jésus atene na azo so lo lungula kobela ti ala ti fa tene ni na azo pepee. Ngbanga ti nyen? Ngbanga ti so lo ye pepee si azo afa nda ti tene ni kirikiri. A yeke taa na lege ni so Jésus asala ye nde na zo so fade ayeke na ayingo sioni teti lo yeke fa tene ande na popo ti azo so Jésus alingbi peut-être ti wara lege ti si na ala pepee. Tongana azo abaa zo so ayingo sioni asigigi na ya lo, fade ala lingbi ti ma na be so Jésus ayeke na ngangu ti sala nzo kusala na tene ti lo ayeke ke sioni tene so mbeni zo alingbi tene na ndo kua ti acochon.

Zo so fade ayeke na ayingo sioni asala ye so Jésus atene na lo ti sala na lo mu lege lo gue. Lo tonda ti fa tene ti ye kue so Jésus asala teti lo na ya sese ti Décapole, na be ti azo ni ado. Matthieu 8:28-34; Marc 5:1-20; Luc 8:26-39; Apocalypse 20:1-3.

▪ Ngbanga ti nyen asala tene ti gi zo oko so ayeke na ayingo sioni tongana la ni ala yeke use?

▪ Ye nyen afa na gigi so ayingo sioni ahinga ye so ayeke ku ala na ya bukulugbu ti bingo?

▪ Ngbanga ti nyen ayingo sioni aye mingi ti li na ya azo nga na ya anyama?

▪ Ngbanga ti nyen Jésus asala ye nde na zo so fade ayeke na ayingo sioni tongana Lo mu lege na lo ti gue ti fa na ambeni zo ye so Lo sala teti lo?