Chapitre 46

Lo ndu bongo ti lo

AZO TI kodoro ti Capernaüm ama so Jésus azia kodoro ti Décapole ti kiri na mbage ti ala. Tongaso, azo mingi mingi abungbi tele ti ala ti ku lo na yanga ti ngu. Azo ama awe so lo tomba ayingo sioni na ya ambeni zo na lo sala si pupu akaï. Tongana lo sigigi na ya ti ngo ni awe, ala ngoro lo, ala yeke na kota nzala ti baa ye so lo yeke sala ande.

Na popo ti gba ti azo so ayeke na nzala ti baa Jésus ayeke Jaïrus, mbeni mokonzi ti synagogue. Lo ti na sese na gbe ti Jésus, na lo hunda lege mingi: “Tele ti molenge ti mbi ti wali aso mingi. Mbi hunda na mo ti ga ti zia maboko ti mo na ndo lo, si kobela ti lo ahunzi na lo ngba na fini.” Jaïrus andoyee molenge so mingi teti lo yeke na molenge ti wali gi oko na ngu ti lo ayeke bale oko na ndoni use.

Jésus amu lege ti gue fade fade na da ti Jaïrus, na azo mingi mingi ague na peko ti lo. E lingbi ti bi be ti e na wuluwulu ti azo mingi so, teti ala hinga fade Jésus ayeke sala mbeni ye ti kpene. Na popo ti gba ti azo so mbeni wali ayeke so abi be ti lo kue gi na sioni ye so awara lo.

A sala ngu bale oko na ndoni use, ngoi so aninga mingi na le ti wali so, kobela ti mene asala ya ti lo. Lo gue ti baa awakaïngo kobela nde nde, lo buba nginza ti lo kue na lege ti ala. Me tele ti lo aga nzoni pepee; nde na so, kobela ti lo aga sioni ahon ti kozo.

Kobela ti lo so asala si tele ti lo awoko, nga a yeke mbeni ye so amu vundu na asala si lo yeke na kamela. A yeke sala tene ti mara ti kobela tongaso na gbele azo pepee. Nga, na gbe ti Ndia ti Moïse, mbeni wali aga sioni tongana mene atuku na tele ti lo, na zo kue so andu lo wala bongo ti lo so mene asa da, alingbi ti sukula tele ti ala na ala yeke sioni juska na lakui.

Wali so ama tene ti ye ti kpene so Jésus asala; na fadeso, lo si ndulu na Jésus. Teti so lo ga sioni na lege ti mene so asa na tele ti lo, lo sala ngangu ti hon na popo ti azo si ala hinga pepee, na lo tene na be ti lo: “Tongana mbi ndu gi bongo ti lo, fade kobela ti mbi awe.” Tongana lo sala tongaso fade fade lo hinga na ya tele ti lo so mene ni akaï!

“Zo nyen andu bongo ti mbi?” Tongana Jésus asala tene so mbito agbu wali so mingi! Lo hinga ni tongana nyen? ‘Wafango ye, Pierre atene, mo baa azo so ayeke pete mo na mbage na mbage so kue na mo kiri mo tene: “Zo nyen andu bongo ti mbi?” ’

Tongana lo gi na le ti lo wali so, Jésus atene: “Mbeni zo andu mbi, teti mbi hinga mbeni ngangu asigigi na ya ti tele ti mbi awe.” Lege so wali ni andu Jésus ayeke nde na lege so tele ti mbeni zo andu lo, teti kobela ti wali so akaï na lege ti ngangu so alondo na tele ti Jésus.

Tongana lo baa Jésus ahinga ye so asi na lo, wali ni aga na lo ti na gbe ti Jésus, mbito asala lo na tele ti lo ado. Na gbele azo kue, lo tene taa tene kue na ndo ti kobela ti lo na lege so fade fade kobela ti lo akaï.

Tongana lo baa wali ni afa tene ni kue, Jésus abaa mawa ti lo, lo de be ti lo na tene so: “Molenge ti mbi ti wali, mabe ti mo asala si mo ga nzoni. Mo gue na siriri, sioni kobela ti mo ahunzi biani.” A yeke ye ti nzoni mingi ti hinga so Nzapa asoro mbeni zo ti komande sese so asala be-nzoni mingi, zo so abaa mawa ti azo na lo yeke na ngangu ti mu maboko na ala! Matthieu 9:18-22; Marc 5:21-34; Luc 8:40-48; Lévitique 15:25-27.

▪ Jaïrus ayeke zo nyen? Lo ga ti baa Jésus ngbanga ti nyen?

▪ Mbeni wali ayeke na mara ti kobela wa? Ngbanga ti nyen a yeke ngangu teti lo ti gue ti hunda Jésus ti mu na lo maboko?

▪ Kobela ti wali so ahunzi tongana nyen? Jésus atene nyen na lo?