Chapitre 47

Kota vundu aga kota ngia

JAÏRUS abaa tongana asava mbeni wali so kobela ti mene asala ya ti lo. Fadeso lo ma na be mingi ahon na ngangu ti Jésus ti sala aye ti kpene. Kozoni na lango oko so, Jaïrus ahunda Jésus ti ga ti sala mbeni ye teti molenge ti wali ti lo so lo ye lo mingi. Molenge so ayeke na ngu bale oko na ndoni use na tele ti lo aso mingi. Fadeso, ye ti sioni so amu mbito na Jaïrus asi. Tongana Jésus ade ti sala tene na wali ni, ambeni zo ti Jaïrus asi na ala tene na lo yeeke: “Molenge ti mo akui awe! Teti nyen mo ngba ti hunda maître?”

Tene so amu na lo vundu mingi! Mo gbu li ti mo da kete: Jaïrus ayeke mbeni koli so azo mingi akpe mbito ti lo na kodoro so, me fadeso lo yeke na ngangu ti sala ye oko pepee tongana lo ma tene ti kui ti molenge ti lo. Me Jésus ama tene so ala tene. Fadeso lo tene na Jaïrus, ti mu na lo ngangu: “Zia mbito! Mo ma gi na be.”

Jésus ague na koli so vundu asala lo mingi na da ti lo. Tongana ala si na da ni, ala baa azo ayeke sala ye kirikiri. Azo mingi aga, ala apika tele ti ala na atoto ngangu teti vundu ti ala ayeke mingi. Tongana Jésus ali na ya da awe, lo tene na ala: “Teti nyen i sala wuluwulu na i yeke toto na ngule? Molenge so akui pepee, me lo yeke lango.”

Tongana azo ama tene so, ala he Jésus mingi; ala hinga molenge ni akui biani. Me Jésus atene lo lango senge. Lo ye ti fa na gigi so na lege ti ngangu so Nzapa amu na lo, lo lingbi ti zingo awakinda lege-oko tongana zo alingbi ti zingo azo so alango biani.

Fadeso Jésus azia azo kue na gigi, lo kamata gi Pierre, Jean, Jacques, na baba na mama ti molenge so akui. Na azo oku so Jésus ague na ndo so molenge ni ayeke da. Lo kamata maboko ti molenge ni, na lo tene na lo: “Talitha cumi”, so atene: “Molenge wali, mbi tene na mo, mo londo!” Fade fade molenge wali so alondo na lo tambela! Tongana ala baa ye so asi baba na mama so aduti na taa kota ngia.

Tongana Jésus atene na ala ti mu kobe na molenge ni awe, lo wa Jaïrus na wali ti lo ti fa na zo oko pepee ye so lo sala. Me kamême Jésus asala tene tongaso, tene ti ye so awu na ya sese so kue. Molenge wali so ayeke zo useni so Jésus akiri ala na fini. Matthieu 9:18-26; Marc 5:35-43; Luc 8:41-56.

▪ Jaïrus ama tene wa? Na lege wa si Jésus amu ngangu na be ti lo?

▪ Tongana ala si na da ti Jaïrus, azo ayeke sala nyen?

▪ Ngbanga ti nyen Jésus atene molenge ni alango tongana biani lo kui?

▪ Azo oku so abaa tongana Jésus akiri molenge ni na fini ayeke azo wa?