Chapitre 48

Lo zia Jaïrus na lo kiri na Nazareth

NA LANGO ni so Jésus asala ye mingi: lo londo na Décapole na ngo, lo lungula kobela ti mene na tele ti mbeni wali, na lo kiri molenge ti wali ti Jaïrus na fini. Me lango ni ade ti hunzi pepee. E baa tongana Jésus asigigi na da ti Jaïrus awe, awaziba use ague na peko ti lo, ala tene na kongo: “Molenge ti David, mo sala be-nzoni na e!”

Tongana ala hiri Jésus “Molenge ti David”, akoli so afa na gigi so ala ma na be so Jésus ayeke héritier ti mbata ti gbia David, na tongaso lo yeke Messie ti zendo ni. Me, Jésus asala tongana lo ma pepee toto ti ala ti mu maboko na ala, peut-être lo ye ti baa wala ala yeke ngba ti hunda. Me akoli use so azia lo pepee. Ala gue na peko ti lo na da so lo lango da, tongana lo li da ni awe, ala gue na peko ti lo.

Ka, Jésus ahunda na ala: “I ma na be ti i so mbi lingbi ti sala ye so?”

“Oui Seigneur”, ala tene na be ti ala kue.

Tongaso Jésus andu le ti ala, na lo tene: “A sala na i alingbi na mabe ti i!” Fade fade le ti ala alungula, ala baa ndo! Me Jésus awa ala mingi, lo tene: “I bata nzoni si zo oko ahinga ye so pepee.” Me, be ti ala aduti na ngia mingi, na tongaso ala bata tene so Jésus afa na ala pepee, me ala tambela na tene ti lo na ya sese so kue.

Na ngoi so akoli so ayeke gue, azo aga na mbeni koli so ayeke na yingo sioni so alungula na lo ngangu ti sala tene. Jésus atomba yingo sioni so, na fade fade wabuburu so asala tene. Be ti azo mingi ado ti baa aye ti kpene so, ala tene: “Zo abaa ye tongaso na popo ti azo ti Israël la oko pepee.”

A-Farizien ayeke da nga. Ala lingbi ti bele pepee aye ti kpene so asi na gbele ala, me teti so be ti ala ayeke sioni na ala ma na be pepee, ala hunda ndo so Jésus awara ngangu ti sala aye ti kpene tongaso, ala tene: “Lo tomba ayingo sioni na ngangu ti mokonzi ti ayingo sioni.”

Ngoi kete na peko ti akpale so, Jésus akiri na kodoro ti lo, Nazareth, na fadeso adisciple ague na peko ti lo. A sala ndulu na ngu oko awe, lo gue na ya synagogue na lo fa nda ti ye na azo da. Kamême so kozoni azo ayeda na pendere tene ti lo, na pekoni be ti ala aso na tele ti lo tene ti ye so lo fa na ala na ala gi lege ti fa lo. Fadeso, teti so lo ye ti sala be-nzoni na ala, lo kiri ti gi lege mbeni ti mu maboko na azo so kozoni lo duti na popo ti ala.

Na ambeni ndo azo mingi abungbi na tele ti Jésus, me na ndo so ala sala tongaso pepee. Tongaso na la ti Sabbat, lo gue na ya synagogue ti fa nda ti tene. Be ti azo mingi ado tongana ala ma tene ti lo. Ala hunda: “Zo so awara ndara so na ngangu ti sala aye ti kpene tongaso na ndo wa? Lo so ayeke molenge ti zo ti kpakango keke pepee? Mama ti lo ayeke Marie pepee? Aita ti lo ayeke Jacques, Joseph, Simon na Judas pepee? Na aita ti lo ti wali kue ayeke na popo ti e pepee? Tongaso, zo so awara ye so kue na ndo wa?”

‘Jésus ayeke mbeni zo ti kodoro lege-oko na e, ala tene na be ti ala. Lo kono na le ti e, na e hinga famille ti lo. Lo yeke Messie tongana nyen?’ Kamême so kota ndara ti lo na aye ti kpene so lo sala afa na gigi lo yeke biani Messie, ala ke lo. Même azo ti famille ti lo, teti so ala hinga lo mbilimbili, ati na lege ti tene ti lo, tongaso Jésus atene: “Azo ayekia prophète na mbeni ndo kue, me na sese ti lo mveni, na popo ti azo ti da ti lo mveni, ala yekia lo pepee.”

Biani, be ti Jésus ado ti baa azo ti Nazareth ama na be pepee. Tongaso lo sala aye ti kpene mingi ka pepee, me lo zia maboko ti lo gi na ndo zo oko oko so ayeke na kobela, na lo lungula kobela ti ala. Matthieu 9:27-34; 13:54-58; Marc 6:1-6; Esaïe 9:7 (9:6 sango).

▪ Tongana awaziba ahiri Jésus “Molenge ti David”, ala fa na gigi so ala ma na be so lo yeke zo wa?

▪ A-Farizien atene Jésus asala aye ti kpene na ngangu ti zo wa?

▪ Ngbanga ti nyen Jésus asala ye ti be-nzoni tongana lo kiri ti mu maboko na azo ti Nazareth?

▪ Na Nazareth azo awara Jésus tongana nyen? Ngbanga ti nyen ala wara lo tongaso?