Chapitre 75

Lingu ti taa ngia

NA NGOI so lo sala kusala na Galilée, Jésus asala amiracle, na fadeso lo sala ambeni miracle na Judée nga. Mbeni la lo tomba mbeni yingo sioni so ayeke na ya mbeni koli, yingo sioni so akanga lege na koli ni ti sala tene. Be ti azo mingi so abaa ye so ado. Me awato ti Jésus akasa lo na tene oko so azo atene ando na Galilée. Ala tene: “Lo tomba ayingo sioni na ngangu ti Béelzébub, mokonzi ti ayingo sioni.” Ambeni zo ahunda Jésus ti sala ambeni fa ti tene ala hinga lo so lo yeke biani, na ala gi lege ti tara lo tongana ala hunda mbeni fa ti yayu.

Jésus ahinga tene so ayeke na be ti ala, tongaso lo mu na awato ti lo na Judée kiringo tene oko so lo mu kozoni na awato ti lo na Galilée. Lo tene royaume kue so akangbi awe ayeke ti. Na pekoni, lo hunda: “Tongaso, tongana Satan akangbi ya ti lo awe, fade royaume ti lo angba tongana nyen?” Lo fa so awato ti lo aduti na mbeni ndo so ayeke nzoni pepee tongana lo tene: “Tongana mbi tomba ayingo sioni na ngangu ti liti ti Nzapa, ka royaume ti Nzapa asi na i awe.”

Azo so abaa aye ti kpene so Jésus asala, a lingbi ala sala ye lege-oko tongana azo asala ngu mingi kozoni tongana ala baa Moïse asala mbeni miracle. Ala tene: “A yeke liti ti Nzapa!” A yeke nga “liti ti Nzapa” so ade Akomandema Bale Oko na ndo atene. A yeke nga “liti ti Nzapa”, yingo ti nzoni-kue ti lo, wala ngangu ti lo so asala ye, so amu lege na Jésus ti tomba ayingo sioni na ti lungula kobela ti azo. Tongaso, Royaume ti Nzapa asi biani na azo so akasa Jésus, teti ahiri lo ti ga Gbia ti Royaume so na lo yeke na popo ti ala.

Na pekoni, Jésus amu mbeni tapande ti fa na ala so ngangu ti lo ti tomba ayingo sioni afa so ngangu ti lo ahon ngangu ti Satan: mbeni zo ti ngangu mingi asi na lo hon mbeni zo ti ngangu so ayu ye ti bira so abata da ti gbia ti lo. Jésus akiri afa toli so lo fa na Galilée na lege ti mbeni yingo sioni. Tongana yingo so asigigi na ya ti koli ni, me zo ni azia pepee aye ti nzoni na ya ndo so aduti senge na ya lo, yingo ni akiri na ambeni yingo mbasambala ti li na ya ni, na nda ti zo so ayeke sioni ahon ndo ti lo ti kozoni.

Tongana azo ayeke ma tene so, mbeni wali oko alondo lo tene na kongo: “Ngia ayeke na ya so adu mo, na me so mo nyon!” Awali kue ti mara ti aJuif ayeke na nzala ti du mbeni prophète, na mingi ahon ti du Messie ni, tongaso e hinga ngbanga ti nyen lo sala tene so. Wali ni atene na be ti lo so Marie alingbi duti na kota ngia ngbanga ti so lo du Jésus.

Hio Jésus afa na wali ni taa lingu ti kota ngia. Lo tene na lo: “Pepee, me ngia ayeke mingi ahon na ala so ama tene ti Nzapa na ala bata ni!” Jésus afa la oko pepee so a yeke nzoni ti yekia mingi Marie, mama ti lo. Me, lo fa so zo awara taa ngia tongana lo ga mbeni wakua ti Nzapa so ayeke be-taa-zo, na taa ngia alondo pepee na songo ti mitele wala mbeni ye so zo asala ni.

Lege-oko tongana lo sala na Galilée, Jésus azingo na azo ti Judée so ahunda mbeni fa ti yayu. Lo tene na ala so a yeke mu mbeni fa na ala pepee gi fa ti Jonas. Jonas aga mbeni fa na lege ti so teti lango ota lo duti na ya ti susu, na nga na lege ti so lo fa tene na mbito pepee, ye so asala si azo ti Ninive agbian be ti ala. Jésus atene: “Na baa! mbeni oko ayeke na ndo so, so ayeke kota ahon Jonas.” Lege-oko tongana so, be ti gbia-wali ti Schéba ado ti ma tene ti ndara ti Salomon. Me Jésus akiri atene: “Baa, mbeni oko ayeke na ndo so, so ayeke kota ahon Salomon.”

Jésus afa so tongana mbeni zo asala wa na lampe, lo zia lampe na ndo ti honde ye pepee wala na gbe ti sakpa pepee, me na ndo so azo kue alingbi ti baa lumière ni. Lo ye ti tene peut-être so fango nda ti ye na salango aye ti kpene na gbele azo so li ti ala akpengba ayeke lege-oko na hondengo lumière ti mbeni lampe. Le ti azo tongaso abaa ndo nzoni pepee, wala abaa gi ye oko pepee, tongaso ye so aye ti kpene so lo sala aye ti fa na ala, ala gbu ndani pepee.

Jésus atomba fade mbeni yingo sioni so akanga lege na mbeni wabuburu ti sala tene. Ye so lo sala alingbi ti pusu azo so le ti ala abaa ndo nzoni wala abaa gi ye oko ti gunda ye ti kpene so lo sala na ti fa nzo tene ni! Me, azo so akasa lo asala tongaso pepee. Ni laa, Jésus ahunzi tene ti lo na tene so: “Mo bata nzoni si lumière so ayeke na ya mo ayeke bingo pepee. Tongaso, tongana tele ti mo kue asi na lumière, na mbeni mbage ni ayeke na bingo pepee, fade lumière asi tele ti mo kue, lege-oko tongana lampe so aza nzoni amu lumière na mo.” Luc 11:14-36; Exode 8:18, 19; 31:18; Matthieu 12:22, 28.

▪ Azo atene nyen tongana Jésus asava tele ti mbeni zo?

▪ “Liti ti Nzapa” ayeke nyen? Na lege wa si Royaume ti Nzapa asi awe na azo so ama tene ti Jésus?

▪ Lingu ti taa ngia ayeke so wa?

▪ Ti wara le so abaa ndo nzoni aye ti tene nyen?