Chapitre 89

Mbeni kusala ti be-nzoni na Judée

NA LA TI matanga ti Dédicace na Jérusalem, ngoi kete kozoni, aJuif atara ti fa Jésus. Tongaso, lo londo ti gue na mbage ti banga, na lo si peut-être na mbeni kodoro so ayeke ndulu na kota ngu ti Galilée.

Fadeso Jésus akiri amu lege ti gue na Jérusalem so ayeke na mbage ti mbongo. Lo fa tene na lege na ya akete kodoro ti Pérée, kodoro so ayeke na mbage ti to ti ngu ti Jourdain. Lo fa tene fade ti toli ti zo ti mosoro na Lazare. Fadeso lo fa na adisciple ti lo aye so lo fa kozoni na ngoi so lo yeke na Galilée.

Mbeni ye so lo tene ayeke so: a yeke nzoni ahon teti mbeni zo “tongana akanga tene ti moulin na go ti lo na abi lo na kota ngu ti ingo” ahon ti zia lo sala ye si mbeni oko ti “akete molenge” so ayeke ti Nzapa ati. Lo fa nga so a yeke nenee ye ti mu pardon tongana lo tene: “Na tongana lo [ita ti mo] sala ye ti sioni na mo lege mbasambala na la oko, na lo kiri na mo lege mbasambala, lo tene: ‘Mbi gbian be ti mbi awe’, a lingbi mo mu pardon na lo.”

Tongana adisciple ahunda na Jésus: “Mo sala si mabe ti e aga kota”, lo kiri tene so na ala: “Tongana i yeke na mabe tongana le ti moutarde, i lingbi ti tene na keke ti sycomore so: ‘Mo londo na gere ti mo kue, mo gue mo lu gere ti mo na ya kota ngu ti ingo!’, na fade keke so ama i.” Tongaso, même mabe so ayeke kete alingbi ti sala kota kusala mingi.

Na pekoni, Jésus asala tene ti mbeni ye so alingbi ti si na fini ti zo ti fa na gigi mara ti bibe so alingbi na awakua ti Nzapa ti Ngangu Ahon Kue. Lo tene: “Tongana mbeni zo na popo ti i ayeke na ngbaa, na ngbaa so ayeke sala na yaka, wala lo yeke bata angasangbaga, na lo londo na yaka ti kiri, fade lo tene na ngbaa so: ‘Ga fade, mo duti, mo te kobe’? Lo lingbi sala tene tongaso pepee, me fade lo tene: ‘Mo leke kobe si mbi lingbi te, mo yu bongo ti mo, mo mu kobe na mbi juska mbi te na mbi nyon, na ndani si fade mo te na mo nyon.’ Fade lo kiri singila na ngbaa so teti lo sala ye so lo komande lo ti sala? Tongaso i nga, tongana i sala ye kue so akomande i ti sala, i tene: ‘E yeke angbaa senge, e sala gi ye so a yeke ngbanga ti e ti sala.’” Mbeni wakua ti Nzapa alingbi la oko pepee ti baa kusala so lo yeke sala teti Nzapa tongana be-nzoni so lo sala na lo. Nde na so, lo ye ti da be ti lo lakue na kota matabisi ti kusala so lo yeke na ni ti voro Nzapa tongana oko ti azo ti ya ti da ti lo so amu ngia na lo.

A yeke peut-être gi ngoi kete na peko ti so Jésus amu toli so si mbeni watokua asi. A yeke Marie na Marthe, aita ti Lazare ti wali, so alango na Judée na kodoro ti Béthanie, si ato lo. Lo tene na lo: “Seigneur, baa, lo so mo ndoyee lo, lo yeke na kobela.”

Jésus atene: “Kobela so ayeke kobela ti kui pepee, me a yeke teti gloire ti Nzapa, si Molenge ti Nzapa alingbi wara gloire na lege so.” Jésus aduti mbeni la use na kodoro so lo yeke da, na ndani lo tene na adisciple ti lo: “I ga i kiri na Judée.” Me, ala dabe lo na tene so: “Rabbi, azo ti Judée agi lege ti bolo mo na tene fade fadeso, na mo ye ti kiri na Judée?”

Ti kiri tene na ala Jésus ahunda mbeni tene: “La asu ngbonga bale oko na ndoni use na la oko pepee? Tongana zo atambela na la lo pika gere ti lo pepee, teti lo baa lumière ti sese so. Me tongana zo atambela na bi, lo pika gere ti lo, teti lumière ayeke na ya lo pepee.”

Na ndo so, Jésus aye ti tene so ngoi so Nzapa adiko teti kusala ti lo na ndo sese, wala ‘ngbonga so la asu na la oko’, ade ti hunzi pepee, na tongana ngoi so ade ti hunzi pepee, zo oko alingbi ti sala sioni na lo pepee. Lo lingbi ti sala kusala ngangu mingi na tanga ti ngoi so ade na gbele lo na “ngbonga so la asu”, teti fade “bi” asi tongana awato ti lo afa lo.

Jésus atene nga: “Lazare, ndeko ti e, alango me mbi gue ti zingo lo.”

Adisciple abi be ti ala so Lazare alango biani na so ayeke fa so lo yeke sava ande, tongaso ala tene na lo: “Seigneur, tongana lo yeke lango, fade kobela ti lo awe.”

Tongaso Jésus atene na ala biani: “Lazare akui awe, na mbi yeke na ngia teti i, teti so mbi yeke ka kozoni pepee si i lingbi ma na be. Me zia e gue, e baa lo.”

Thomas ahinga fade Jésus alingbi wara kui na Judée. Me, lo yeda ti mu maboko na Jésus, tongaso lo mu wango na tanga ti adisciple tongaso: “Zia e gue nga, si e lingbi kui lege-oko na lo.” Tongaso adisciple aka fini ti ala na ala mu peko ti Jésus na Judée, ndo so lo gue ti sala mbeni kusala ti be-nzoni da. Luc 13:22; 17:1-10; Jean 10:22, 31, 40-42; 11:1-16.

▪ Jésus afa tene fade na ndo wa?

▪ Jésus akiri afa tene wa? Ye nyen so alingbi si na fini ti zo Jésus asala tene ni? Lo ye ti tene nyen na lege ti toli so?

▪ Jésus ama tene ti ye wa? Ye nyen lo ye ti tene tongana lo sala tene ti “la” na “bi”?

▪ Thomas aye ti tene nyen tongana lo tene: ‘Zia e gue si e lingbi kui lege-oko na lo’?