Chapitre 90

Beku ti londongo ti awakinda

NA NDANI Jésus asi ndulu na Béthanie, mbeni kete kodoro so ayo gi kilomètre ota tongaso na Jérusalem. Gi alango kete ahon na peko ti kui ti Lazare na lungo lo. Marthe na Marie, aita wali ti zo so akui, angba lakue na vundu, na azo mingi aga na da ti ala ti lungula vundu na be ti ala.

Tongana ala yeke toto kua ti ita ti ala ti koli, mbeni zo aga afa na Marthe so Jésus ayeke na lege ti ga. Tongaso Marthe ague fade fade na lo kpe loro na gbele Jésus na lo fa tene ni na ita ti lo ti wali kozoni pepee. Tongana lo si ndulu na Jésus, Marthe atene na lo tene so lo na Marie atene lege mingi na ya alango osio so ahon awe: “Tongana mo yeke na ndo so, ka ita ti mbi akui pepee!”

Ye oko, tene ti Marthe afa na gigi so lo ngba na beku so Jésus alingbi ti sala mbeni ye teti ita ti lo ti koli. Lo tene: “Mbi hinga ye so mo hunda na ti ti Nzapa, fade Nzapa amu na mo.”

Jésus amu na lo zendo so: “Fade ita ti mo alondo mbeni.”

Marthe abi be ti lo so Jésus asala tene ge ti mbeni londongo ti akinda so ayeke duti ande na ndo sese, londongo ti akinda so Abraham na ambeni wakua ti Jéhovah aku ni nga. Tongaso lo kiri tene: “Mbi hinga fade lo londo na la ti ndani, na la ti londongo ti awakinda.”

Me, na ya kiringo tene ti lo, Jésus amu beku so lo yeke lungula vundu ti lo fade fade. Lo tene: “Mbi yeke londongo ti awakinda, na mbi yeke fini.” Lo dabe Marthe so Jéhovah amu na lo ngangu na ndo kui, lo tene: “Zo so asala ye na mabe ti lo na mbi, même tongana lo kui, fade lo yeke na fini; zo so ayeke na fini na lo sala ye na mabe ti lo na mbi, fade lo kui la oko pepee.”

Jésus aye pepee ti fa na Marthe so azo so ayeke be-taa-zo so ayeke na fini na la ni ka alingbi kui pepee. Oko pepee, me lo ye ti tene so azo alingbi wara fini ti lakue lakue tongana ala ma na be na lo Jésus. Azo mingi ayeke duti na fini so tongana akiri ala na fini na la ti ndani. Nde na so, ambeni zo so ayeke be-taa-zo alingbi so kua ande na la ti ndani ti aye ti fadeso na ndo sese na fade tene ti Jésus ayeke ga taa tene biani na ndo ala. Fade ala kui la oko pepee! Na peko ti kpengba tene so, Jésus atene na Marthe: “Mo ma na be na tene so?”

Lo kiri tene: “Biani, Seigneur, mbi ma na be so mo yeke Christ, Molenge ti Nzapa, Lo so aga na sese so.”

Marthe akiri fade fade ti hiri ita ti lo ti wali. Lo tene na lo na ngoi so ala yeke gi use: “Wafango ye asi awe, na lo yeke hiri mo.” Marie alondo fade fade ti gue. Tongana ambeni zo abaa lo ti gue, ala gue na peko ti lo, teti ala tene na be ti ala so lo yeke gue na du ti kua ti ita ti lo.

Tongana Marie asi na ndo so Jésus ayeke, lo ti na gbele lo na lo tene na toto: “Seigneur, tongana mo yeke na ndo so, ka ita ti mbi akui pepee!” Jésus abima na be ti lo mingi tongana lo baa Marie atoto na azo mingi mingi so amu peko ti lo atoto nga. Lo hunda na lo: “I zia lo na ndo wa?”

Ala kiri tene na lo: “Seigneur, mo ga mo baa.”

Jésus atoto na ngu ti le nga, tongaso aJuif atene: “Baa, lo ndoyee lo mingi!”

Ambeni adabe ala so nze kete kozoni, na la ti matanga ti Akpangba, Jésus alungula le ti mbeni pendere koli so adu lo waziba, na ala hunda tene tongaso: “Zo so alungula le ti waziba, lo lingbi sala si zo so angba na fini pepee?” Jean 5:21; 6:40; 9:1-7; 11:17-37.

▪ Na ndani Jésus asi na Béthanie lawa? Na ye nyen asi na ya kodoro so?

▪ Mabe ti Marthe na ya londongo ti awakinda aluti na ndo nyen?

▪ Kui ti Lazare asala si Jésus aduti tongana nyen?