Chapitre 101

Na Béthanie, na da ti Simon

TONGANA Jésus alondo na Jéricho, lo mu lege ti gue na Béthanie. Lo tambela teti la oko kue, teti so a lingbi ti ma na nduzu na lege so ayeke ngangu na so yongo ni ayeke kilomètre bale oko na ndoni gumbaya. Jéricho ayeke na gbe le ti ngu ti ingo mètre 250, na Béthanie ayeke na nduzu ahon le ti ngu ti ingo mètre 760. E dabe e so Lazare na aita ti lo ti wali ayeke lango na Béthanie? Kete kodoro so ayo na Jérusalem kilomètre ota na mbage ti to ti tele ti hoto ti Oliviers.

Azo mingi asi na Jérusalem awe teti matanga ti Pâque. Azo ni ague ka kozoni si ala lingbi sukula ala mveni alingbi na ndia. Ala sala ye tongaso peut-être ngbanga ti so ala ndu mbeni kua wala ala sala mbeni ye so asala si ala ga sioni. Ala sala ye alingbi na ndia ti sukula tele si ala lingbi sala matanga ti Pâque na lege ni. Tongana azo so asi kozoni abungbi tele ti ala na ya temple, ambeni zo mingi ahunda tele ti ala ti hinga wala fade Jésus ayeke ga ti sala Pâque.

Na Jérusalem mbeni kpengba tene alondo na ndo Jésus. Azo kue ahinga so amokonzi ti nzapa aleke ti gbu lo na ti fa lo. Ala tene tongana mbeni zo ahinga ndo so lo yeke da, a lingbi lo fa ni na ala. Fani ota na ya kete ngoi so ahon awe — na la ti matanga ti Akpangba, na la ti matanga ti Dédicace, nga na peko ti so lo zingo Lazare na du-kua — amokonzi so agi lege ti fa lo. Tongaso azo ahunda wala fade Jésus alingbi fa tele ti lo polele na gigi mbeni. Ala hunda tele ti ala na popo ti ala: “Be ti i atene nyen?”

Na ngoi oko so, Jésus asi na Béthanie lango omene kozoni na Pâque, so ati na lango 14 ti nze ti Nisan na lege ti calendrier ti aJuif. Lo li na ya kodoro ni na lakui ti vendredi, so ayeke tongo nda ti lango miombe ti nze ti Nisan. Lo lingbi gue na Béthanie na samedi pepee, teti ndia ti aJuif akanga lege na zo ti sala voyage na la ti sabbat so atonda ni na lakui ti vendredi juska na lakui ti samedi. Jésus ague peut-être na da ti Lazare ti lango ka na vendredi na bi lege-oko tongana so lo sala kozoni.

Mbeni zo ti kodoro ti Béthanie ahiri Jésus na afo lo ti te kobe na da ti lo na samedi na lakui. Zo so ayeke Simon, ngbele zo ti kobela ti ngiba so peut-être Jésus asava kobela ti lo kozoni. Marthe asala kusala mingi lege-oko tongana lo sala lakue, lo yeke kangbi kobe na agene. Me, Marie, lege-oko tongana lo yeke sala kozoni, ayeke dengi me ti lo ti ma Jésus, me lo sala ni na mbeni lege so asala si kpengba tene alondo.

Marie azi yanga ti ngbenda so asala ni na albâtre, so livre oko ti yombo ayeke na ya ni. A yeke yombo ti ngere ngangu. Biani ngere ni alingbi na nginza so zo asala kusala teti ngu oko kue ti wara ni! Tongana Marie atuku yombo so na ndo li ti Jésus nga na ndo gere ti lo na lo mbo gere ti lo na kua ti li ti lo, nzoni fion ti yombo ni asi ya ti da so kue.

Adisciple asala ngonzo, ala hunda: “Ndani nyen si abuba yombo so tongaso?” Na Judas Iscariote atene: “Teti nyen ala ka yombo so teti denari ngbangbo ota pepee? si amu nginza ni na azo ti mawa.” Judas atene so pepee teti be ti lo aye awanzinga, teti lo yeke nzi nginza so adisciple abata.

Jésus asala nzo tene teti Marie. Lo tene: “Ala zia lo kpo. Ndani nyen si ala yeke sala na lo pasi tongaso? Lo sala ye ti nzoni na mbi. Azo ti mawa ayeke na i lakue, na lakue tongana i ye, i lingbi sala nzoni na ala, me mbi yeke na i lakue pepee. Wali so asala ye so lo lingbi sala, lo tuku yombo na tele ti mbi ti leke ni ngbanga ti du ti kua. Biani, mbi tene na i: Na ndo kue so fade ala fa nzo tene so na sese so kue, fade afa nga tene ti ye so wali so asala tongana ye ti dabe azo na lo.”

Jésus aduti na Béthanie asala fadeso ahon ngbonga bale use na ndoni osio awe, na azo ti kodoro ni kue ahinga so lo yeke da. Tongaso azo aga mingi mingi na da ti Simon gi ti baa Jésus pepee, me ti baa Lazare so aduti da nga. Tongaso akota prêtre awa tele ti ala ti fa gi Jésus pepee me Lazare nga, teti azo mingi ama na be na Jésus teti so ala baa lo so lo yaa lo na du-kua aduti na fini biani! Taa tene, amokonzi ti vorongo nzapa ayeke sioni mingi! Jean 11:55–12:11; Matthieu 26:6-13; Marc 14:3-9; Kusala 1:12.

▪ Azo asala tene na ndo nyen na ya temple? Ngbanga ti nyen?

▪ Ngbanga ti nyen a lingbi Jésus asi na Béthanie na vendredi me na samedi pepee?

▪ Tongana Jésus asi na Béthanie, na la ti sabbat lo duti na ndo wa?

▪ Kusala wa ti Marie asala si mbeni kpengba tene alondo? Nzo tene wa Jésus atene na ndo lo?

▪ Ye nyen afa na gigi kota sioni ti akota prêtre?