Chapitre 102

Christ ali na ngia na Jérusalem

NDADE, na ndapelele ti dimanche, lango 9 ti Nisan, Jésus na adisciple ti lo alondo na kodoro ti Béthanie ti gue na Jérusalem na lege ti Hoto ti Oliviers. Fade fade ala si ndulu na Bethphagé, so aduti na ndo hoto so. Jésus atene na adisciple ti lo use:

“I gue na ya ti kete kodoro so i yeke baa ni ka so. Tongana i si ka, fade i wara lele so ala kanga lo, na molenge ti lele ayeke na tele ti lo; i zi ala, na i ga na ala na mbi. Tongana mbeni zo asala tene na i, a lingbi i tene: ‘Seigneur aye ala.’ Na fade lo to ala fade fade.”

Na ngoi so, adisciple ahinga pepee so nda ti yanga so Jésus amu na ala abaa gango taa tene ti mbeni prophétie ti Mbeti ti Nzapa. Me na pekoni ala gbu nda ti tene so nzoni. Prophète Zacharie afa kozoni awe so fade Gbia ti zendo ti Nzapa ayeke li na Jérusalem na ndo lele, même “na ndo molenge ni, molenge ti lele ti koli”. Kozoni giriri, Gbia Salomon atambela na ndo molenge ti lele na la ni so lo gue si asa mafuta na li ti lo.

Adisciple ali na Bethphagé na ala kamata lele ni na molenge ti lo. Me ambeni zo so ayeke na tele ni atene: “I yeke sala nyen?” Tongana ala hinga so ayeke gue na alele ni na Seigneur, azo so akanga lege na adisciple pepee ti gue na ala na Jésus. Adisciple azia kota bongo ti ala na ndo ti lele ni na molenge ti lo, me Jésus aduti na ndo molenge ti lele ni.

Tongana Jésus aga ndulu na Jérusalem azo asi singo na tele ti lege. Azo mingi na popo ti ala agbala bongo ti ala na lege, ambeni afa atikeke na ala zia atikeke ni na lege. Ala tene na kongo: “A hiri nzoni tene na ndo Lo so aga tongana Gbia na iri ti Jéhovah! Siriri na yayu, na gloire na nduzu ahon kue!”

Ambeni Farizien so ayeke na popo ti azo mingi so adema tongana ala ma tene so azo atene. Ala tene na Jésus: “Wafango ye, mo zingo na adisciple ti mo.” Me Jésus akiri tene na ala: “Mbi tene na i, tongana azo so akaï, fade tene asala tene na kongo.”

Tongana Jésus aga ndulu na lo baa Jérusalem, lo toto na ngule teti kodoro ni, lo tene: “Même laso, tongana mo mveni, mo hinga ye so amu siriri—me fadeso ye so ahonde na le ti mo awe.” Lege-oko tongana Jésus atene fadeso, teti so lo sala kpengba li Jérusalem ayeke wara ye so alingbi na lo:

“Fade awato ti mo [aturugu ti Rome na gbe ti Général Titus] asala gbagba ti bira ti akeke so yanga ti ala aza na tele ti mo, ala ngoro mo, na ala kanga lege na mo na mbage kue, na fade ala bi mo na sese, mo na amolenge ti mo so ayeke na ya mo, na fade ala zia tene oko angba na ndo mbeni tene pepee.” Tene so Jésus afa kozoni na ndo futingo ti Jérusalem aga taa tene ngu bale ota na ndoni mbasambala na pekoni, wala na ngu 70 ti ngoi ti e.

Ngoi kete kozoni, ambeni zo na popo ti azo mingi so ayeke na Jésus tongana lo yaa Lazare na du-kua. Fadeso ala ngba ti sala tene ti ye ti kpene so na ambeni zo. Ni laa, tongana Jésus ali na Jérusalem, be ti azo ti kodoro ni kue ado mingi. Azo aye ti hinga: “So zo nyen?” Na azo mingi so angba ti tene: “So ayeke prophète Jésus ti Nazareth ti Galilée!” Tongana ala baa ye so, vundu asala aFarizien na ala dema teti ala lingbi sala mbeni ye oko pepee, teti tongana ala tene: “Azo kue ague na peko ti lo awe.”

Lege-oko tongana lo yeke sala lakue tongana lo gue na Jérusalem, Jésus ague ti fa ye na ya temple. Ka, awaziba na awazin aga na lo, na lo lungula kobela ti ala! Tongana akota prêtre na awafango ndia abaa aye ti kpene so Jésus asala, nga tongana ala ma amolenge so ayeke na ya temple adekongo: “So e, e hunda mo, Molenge ti David!” be ti ala aso mingi na ala tene na Jésus: “Mo ma tene so ala yeke tene?”

Jésus akiri atene: “Biani, i diko na mbeti la oko pepee: ‘Na lege ti tene so asigigi na yanga ti amolenge na ti ala so ade ti nyon me mo mu tene ti sepela’?”

Jésus angba ti fa ye, na lo baa ndo, lo baa ye kue na ya temple. Fadeso ndo aga ndulu ti vuko. Tongaso, lo na azo ti lo bale oko na ndoni use amu lege ti kiri na Béthanie so ayo na Jérusalem kilomètre ota. A yeke peut-être na da ti kamarade ti lo Lazare so ayeke na Béthanie, si Jésus alango na bi ti dimanche. Matthieu 21:1-11, 14-17; Marc 11:1-11; Luc 19:29-44; Jean 12:12-19; Zacharie 9:9.

▪ Jésus ali na Jérusalem tongana Gbia lawa? Lo gue ka tongana nyen?

▪ A yeke nenee ye so azo mingi agunda Jésus?

▪ Tongana lo baa Jérusalem, Jésus aduti na bibe wa? Lo sala tene ti prophétie wa?

▪ Ye nyen asi tongana Jésus ali na ya temple?