Chapitre 125

Pono mingi na ndo keke

ALA GUE na ambeni zo ti nzi use lege-oko na Jésus ti fa ala. Tongana ala tambela ngoi kete awe, ala si na ndo so ala di iri ni Golgotha, so atene Ndo ti Bio ti Li.

Ala zi bongo ti azo ti kanga. Na pekoni, amu na ala vin so atuku myrrhe da. A yeke awali ti Jérusalem so aleke samba ni, na azo ti Rome agbanzi vin so pepee na azo so fade akanga ala na ndo ti keke teti a sala si songo ni akaï kete. Ye oko, tongana lo tara vin so, Jésus ake ti nyon ni. Ngbanga ti nyen? Ngbanga ti so Jésus aye ti hinga mbilimbili ye so asi na ngoi so lo hon tara ti kota ahon kue ti mabe ti lo.

Ala zia Jésus na ndo keke na ala zia maboko ti lo na nduzu na ndo li ti lo. Aturugu apika maboko ti lo na agere ti lo na akota pointe. Jésus akpengba tele ti lo tongana apointe ali na ya mitele na kamba ti tele ti lo teti a so mingi. Tongana ayaa keke ni na nduzu, pono aga kota mingi, teti so nengo ti tele ti lo asuru aka ti apointe ni. Ye oko, ahon ti suku na aturugu ti Rome, Jésus asambela teti ala: “Baba, pardonne ala, teti ala hinga ye so ala sala pepee.”

Pilate azia mbeni mbeti na ndo ti keke so atene: “Jésus ti Nazareth, Gbia ti aJuif.” Pilate asala mbeti tongaso teti lo kpe mbito ti Jésus, na nga teti so lo ke na be ti lo kue aprêtre ti aJuif so apusu lo ti fa ngbanga ti kui na ndo ti Jésus. Ti mu lege na azo kue ti diko mbeti ni, Pilate asala ni na yanga ota​—na hébreu, na latin so ayeke kota yanga ti kodoro ni, nga na grec, so ayeke yanga ti kodoro so azo kue atene.

Anne, Caïphe na ambeni kota prêtre ayeda pepee. Kpengba tene so azia na ndo keke afuti ngia ti ala na ngoi ni so. Tongaso, ala tene: “Sala na mbeti pepee ‘Gbia ti aJuif’, me so lo tene: ‘Ni yeke Gbia ti aJuif.’ ” Pilate, na kota ngonzo na be ti lo teti aprêtre asala ye na lege ti mayele na lo, ake na kuru go, lo tene: “Ye so mbi sala na mbeti awe, awe.”

Aprêtre, na nga azo mingi mingi, ague fadeso na ndo so afa Jésus da, na aprêtre agi lege ti ke tene ti mbeti so. Ala kiri adiko na li ti Jésus tene ti wataka so ala diko kozoni awe na gbele Sanhédrin. Be ti e ado pepee tongana azo so ayeke hon ka azonga Jésus, na ala yengi li ti ala ti he lo na ala tene: “Mo so mo ye la ni ti kungbi temple na ti kiri ti sala ni na ya ti lango ota, mo so tele ti mo mveni! Tongana mo yeke mbeni molenge ti Nzapa, zia keke ti pasi so, mo zu na sese!”

Akota prêtre na azo ti bungbi ti nzapa ti ala alondo ti he Jésus nga, ala tene: “Lo so ambeni zo; lo lingbi ti so lo mveni pepee! Lo yeke Gbia ti Israël; zia lo zu na keke ti pasi, lo zu na sese fadeso, na fade e ma na be na lo! Lo zia be ti lo na Nzapa; zia Nzapa aso lo fadeso, tongana Lo ye lo, teti lo tene: ‘Ni yeke Molenge ti Nzapa.’ ”

Aturugu alondo ti he Jésus nga tongana ala baa azo kue ahe lo. Ala he lo tongana ala ye ti mu vin so akpi na lo. Ala yoro ni na gbele Jésus, me ala zia ni pepee na yanga ti lo so ahule. Ala tene: “Tongana mo yeke gbia ti aJuif, mo so mo mveni!” Na azo ti nzi use so akanga ala na keke na tele ti Jésus, oko na mbage ti koli, oko na mbage ti wali, ahe Jésus nga. Bi be ti mo da kete si! Koli so ahon tanga ti azo kue, biani, lo so amu mbage ti lo na Jéhovah Nzapa ti leke ye kue, ayeda na bibe ti lo kue ti hu pono tongaso!

Aturugu akamata abongo ti Jésus ti ndoni na ala kangbi ya ni osio. Ala pika zeke ti baa fade zo nyen ayeke wara aye so. Lege ti kamba ayeke pepee na ya bongo ti gbe ni, bongo so ayeke ye ti ngere ngangu mingi. Tongaso aturugu ni atene na popo ti ala: “Zia e suru bongo ni pepee, me zia e sala ye ti mu iri ti baa zo nyen alingbi ti wara bongo so.” Na lege ti ye so ala hinga ni pepee, ala sala si tene ti Mbeti ti Nzapa aga taa tene so atene: “Ala kangbi bongo ti mbi ti ndoni na popo ti ala, na ala sala ye ti mu iri teti bongo ti mbi.”

Na ngoi so, mbeni oko ti awanzi so aga ti hinga so Jésus ayeke biani mbeni gbia. Ni laa, lo zingo na mba ti lo, lo tene: “Mbito ti Nzapa asala mo oko pepee? teti mo yeke na ya ngbanga so nga. Ngbanga so afa na li ti e ayeke mbilimbili biani, teti e wara futa ti kusala ti e; me zo so asala sioni oko pepee.” Tongaso lo hunda ye na Jésus: “Mo dabe mo na mbi tongana mo si na royaume ti mo.”

Jésus atene na lo: “Biani, mbi tene na mo laso: Fade mo yeke na mbi na ya Paradis.” Zendo so ayeke ga taa tene ande tongana Jésus akomande tongana Gbia na yayu na lo yaa na du-kua zo ti sioni so asanze be ti lo ti duti na fini na ndo sese na ya Paradis. Paradis so azo so aso kua na la ti Harmaguédon na amba ti ala ayeke wara matabisi ti leke ni. Matthieu 27:33-44; Marc 15:22-32; Luc 23:27, 32-43; Jean 19:17-24.

▪ Ngbanga ti nyen Jésus ake ti nyon vin so atuku myrrhe na ya ni?

▪ Ngbanga ti nyen azia mbeti na ndo keke ti pasi ti Jésus? Mbeti so asala si tene wa alondo na popo ti Pilate na akota prêtre?

▪ Mbeni ye ti sioni wa azo asala na Jésus na ndo keke? Na azo asala ye so ngbanga ti nyen?

▪ Na lege wa ye so azo asala na bongo ti Jésus asala si tene ti prophétie aga taa tene?

▪ Tongana nyen mbeni oko ti azo ti nzi asanze? Fade Jésus asala nyen ti yeda na tene so zo so ahunda na lo?