Mbage 6

Ngbanga ti nyen Nzapa azia lege na pasi

1, 2. Tongana nyen akozo baba na mama ti e abuba pendere tongo nda ti fini so Nzapa amu na ala?

NGBANGA TI NYEN aye aga sioni na pekoni? Ye nyen aga abuba nzoni tongo nda ti fini so Nzapa amu na akozo baba na mama ti e na ya Paradis na Eden? Ngbanga ti nyen, ahon ti wara siriri na be-oko ti Paradis, sioni na pasi aduti da teti angu saki mingi?

² Ndani ayeke so Adam na Eve asala sioni kusala na liberté ti ala. Ala glisa so aleke ala pepee ti wara ye ti nzoni nde na Nzapa nga na andia ti lo. Ala yeda na be ti ala ti duti nde na Nzapa, na ala bi be ti ala so fade fini ti ala ayeke ga nzoni mingi ahon. Tongaso ala hon ndo ti akatikati so Nzapa afa na liberté ti ala. — Genèse, chapitre 3.

Tene ti yanga ti komande ti nda-gigi

3-5. Ngbanga ti nyen Nzapa afuti gi Adam na Eve pepee na lo kiri lo tonda ti ye mbeni?

³ Ngbanga ti nyen Nzapa afuti gi Adam na Eve pepee na lo kiri lo tonda ti ye mbeni na mbeni koli na wali nde? Ngbanga ti so tene ni andu yanga ti komande ti lo ti nda-gigi, so ti tene ngangu ti lo ti lakue lakue ti komande.

⁴ Tene ni ayeke so: Zo wa alingbi ti komande, na yanga ti komande ti zo wa ayeke nzoni? Teti so lo yeke na ngangu ahon kue na Wasalango ye kue, a yeke na lege ni ti tene Nzapa akomande na ndo ala. Ngbanga ti so lo yeke na ndara mingi, yanga ti komande ti lo ayeke nzoni mingi teti ala. Ye oko, azo ake fadeso yanga ti komande ti Nzapa. Na mbage, mbeni sioni ye ayeke giriri pepee na ya zo so lo leke ni? Fade e yeke baa na peko tongana nyen tene so andu dutingo be-taa-zo ti azo.

⁵ So zo aduti nde na Nzapa fadeso, mbeni tene akiri alondo: fade azo ayeke wara ye ti nzoni mingi tongana Nzapa akomande ala pepee? Wasalango ye ahinga giriri kiringo tene ni biani, ye oko mbeni nzoni lege ti sala si azo ahinga kiringo tene so ayeke ti mu na ala liberté kue so ala hunda ni. Teti so ala soro lege so ngbanga ti liberté so ala yeke na ni, Nzapa azia lege na ala.

6, 7. Ngbanga ti nyen Nzapa amu ngoi mingi na liberté so ayeke na ndani pepee na azo?

⁶ Na ziango na azo ngoi mingi ti tara liberté so ndani ayeke da pepee, Nzapa ayeke fa biani tongana azo ayeke duti nzoni na gbe ti yanga ti komande ti lo wala na fango lege na ala mveni. A hunda biani ti tene ngoi ni so amu ayo si alingbi mu lege na azo ti si na ndo so ala baa tongana ye ti kota kue na lege ti poroso, ti alekengo ye, ti senda-gi nga na senda-gi ti kaïngo kobela.

⁷ Tongaso, Nzapa azia lege polele na azo asi na ngoi ti e ti fa biani wala ala lingbi, tongana ala duti nde na Lo, ti fa lege na ala mveni nzoni wala nzoni pepee. Tongaso zo alingbi ti soro na popo ti nzobe wala salango ye na be sioni, na popo ti ndoyee na be so ake, na popo ti mbilimbili na ye ti kirikiri. Ye oko, fade lo lingbi luti nga na gbe ti ye so asi na lege ti ye so lo soro ni: siriri so aga na lege ti nzobe, wala pasi so siobe aga na ni.

Azo ti yingo ake yanga

8, 9. a) Kengo yanga atondani tongana nyen na nduzu? b) Nde na Adam na Eve, azo wa Satan apusu ala ti ke yanga?

⁸ A lingbi e baa mbeni tene nde. Akozo baba na mama ti e aduti ala oko pepee ti ke yanga ti komande ti Nzapa. Me mbeni zo wa aduti na fini na ngoi ni ka? Azo ti yingo. Kozoni ti leke azo, Nzapa aleke mbeni fini so ayeke kota ahon ti azo: a-ange so wungo ti ala ayeke mingi, so aleke ala ti duti na fini na nduzu. A leke nga a-ange so na ngangu ti sala ye so be ti ala aye nga na nzala oko so ti duti na gbe ti yanga ti komande ti Nzapa. — Job 38:7; Psaume 104:4; Apocalypse 5:11.

⁹ Mbeti ti Nzapa afa so kengo yanga atondani kozoni na ndo ti ayingo. Mbeni zo ti yingo aye ti wara liberté so ndani ayeke da pepee. Lo ye nga si azo avoro lo (Matthieu 4:8, 9). Yingo so ake yanga atene mvene so Nzapa agbanzi na Adam na Eve mbeni ye ti nzoni, na lege so lo pusu ala ti ke yanga (Genèse 3:1-5). Tongaso ahiri lo Diable (Wazonga) nga na Satan (Wato). Na pekoni, lo pusu ambeni zo ti yingo ti ke yanga. A hiri ala ayingo sioni wala adémon. — Deutéronome 32:17; Apocalypse 12:9; 16:14.

10. Aye wa asi ngbanga ti kengo yanga ti azo ti sese nga azo ti yingo?

¹⁰ Na kengo yanga ti Nzapa, azo azia tele ti ala mveni na gbe ti ngangu ti Satan na ti ayingo sioni ti lo. A yeke teti tene so si Mbeti ti Nzapa ahiri Satan “nzapa ti sese so” so “asala si bibe ti azo aga ziba”. Tene ti Nzapa atene nga so “sese kue alango na gbe ti ngangu ti zo ti sioni”. Jésus lo mveni ahiri Satan “mokonzi ti sese so”. — 2 aCorinthien 4:4; 1 Jean 5:19; Jean 12:31.

Ahundango tene use

11. Na ndo mbeni hundango tene wa Satan abi tene na ndo Nzapa?

¹¹ Satan asala si mbeni hundango tene so andu Nzapa alondo. Biani, lo fa so Nzapa asala azo mbilimbili pepee na lo tene mbeni zo oko ayeke yeda pepee ti sala ye ti nzoni tongana lo yeke na gbe ti aye ti ngangu. Taa tene, lo fa so na ya tara azo ayeke zonga Nzapa (Job 2:1-5). Na lege so, Satan abi tene na ndo dutingo be-taa-zo ti azo ti sese.

12-14. Tongana nyen ngoi alingbi ti fa taa tene na ndo ahundango tene use so?

¹² A yeke teti tene so si Nzapa amu ngoi mingi na azo nga na a-ange ti baa tongana nyen ayeke leke ande hundango tene so nga na tene ti yanga ti komande ti nda-gigi kue ti Nzapa (baa Exode 9:16). Aye nde nde so ayeke si na ya mbaï ti azo ayeke ga ti fa taa tene na ndo ahundango tene use so.

¹³ Kozoni kue, fade ngoi ayeke fa nyen na ndo tene ti yanga ti komande ti nda-gigi kue, na ndo taa lege ti yanga ti komande ti Nzapa? Azo alingbi ti fa lege na ala mveni, ahon so Nzapa alingbi ti sala ni? Mbeni mara ti yanga ti komande ti azo so aduti nde na Nzapa alingbi ti ga na sese so ayeke na ngia, so bira, fango zo na nzi, nga na ye ti kirikiri ayeke da mbeni pepee? Lo lingbi ti hon ndo ti nzinga na ti sala si azo kue aduti nzoni? Lo lingbi ti lungula kobela, mbakoro na kui? A yeke aye so kue so yanga ti komande ti Nzapa alingbi ti sala ni. — Genèse 1:26-31.

¹⁴ Ti tene use ni, fade ngoi ayeke fa nyen na ndo dutingo be-taa-zo ti azo? Nzapa asala ye na lege ni pepee na lekengo azo tongana ti so lo sala ni? Fade ambeni ayeke duti da so, ataa ala wara atara, ayeke sala nzoni? Fade azo ayeke fa so ala yeda na yanga ti komande ti Nzapa ahon yanga ti komande ti zo so aduti nde na Nzapa?

[Foto na lembeti 13]

Nzapa azia ngoi na azo ti si na li ni na ya aye so ala leke.

[Lingu ti foto]

Fusée na le nduzu: foto ti NASA