Mbage 8

Ye so Nzapa aleke na be ti lo ti sala ague ti ga taa tene

1, 2. Ye wa Nzapa aleke ti lungula na pasi?

A SALA ngu ngbangbo mingi, sewa ti azo ayeke baa pasi na gbe ti komandema ti azo so ake yanga nga na ayingo sioni. Ye oko, Nzapa akanga le ti lo pepee na ndo pasi ti e. Nde na so, na ya angu so kue, lo leke aye ti zi na azo na gbe ti sioye nga na pasi.

² Na ngoi ti kengo yanga na Eden, Nzapa atonda ti fa tene ti be ti lo ti leke mbeni ngorogbia so ayeke sala si sese aga paradis teti azo (Genèse 3:15). Na pekoni, Jésus, kota Watokua ti Nzapa, asala si ngorogbia ti Nzapa so ayeke ga ande aduti kota tene ti fango ye ti lo. Lo fa so a yeke duti ande oko beku teti azo. — Daniel 2:44; Matthieu 6:9, 10; 12:21.

3. Tongana nyen si Jésus ahiri ngorogbia ti sese so ayeke ga ande, na ngbanga ti nyen?

³ Jésus ahiri ngorogbia ti Nzapa so ayeke ga ande “royaume ti ayayu”, teti fade lo yeke komande ande na yayu (Matthieu 4:17). Lo hiri ni nga “royaume ti Nzapa”, ngbanga ti so Nzapa ayeke Mveni ni (Luc 17:20). Na ya ti angu ngbangbo mingi so ayeke hon, Nzapa apusu awakua ti lo na sese ti tene ala su na mbeti aprophétie na ndo ala so ayeke duti ande na ya ngorogbia so nga na ye so fade ngorogbia so ayeke sala ni.

Fini Gbia ti sese

4, 5. Nzapa afa tongana nyen so Jésus ayeke Gbia so lo yeda na lo?

⁴ A sala fadeso ngu saki use awe, Jésus asala si aprophétie mingi so andu lo so ayeke duti ande Gbia ti Royaume ti Nzapa aga taa tene. Lo fa so Nzapa asoro lo tongana Mokonzi ti ngorogbia ti yayu so ayeke fa ande lege na azo. Nga, na peko ti kua ti lo, Nzapa ayaa Jésus na popo ti awakinda ti duti na fini na yayu tongana zo ti yingo so ayeke na ngangu na so ayeke kui mbeni pepee. Azo mingi abaa lo na pekoni so ayaa lo na popo ti awakinda. — Kusala 4:10; 9:1-9; aRomain 1:1-4; 1 aCorinthien 15:3-8.

⁵ Tongaso Jésus “aduti na mbage ti koti ti Nzapa”. (aHébreu 10:12.) Ka, lo ku ngoi so fade Nzapa ayeke mu na lo ngangu ti sala kusala tongana Gbia ti Royaume ti yayu ti Nzapa. Tongaso prophétie ti Psaume 110:1 aga taa tene, ndo so Nzapa atene na Jésus: “Mo duti na mbage ti mbi ti koti juska mbi zia awato ti mo tongana mbata ti gere ti mo.”

6. Jésus afa tongana nyen so lo lingbi ti duti Gbia ti Royaume ti Nzapa?

⁶ Na ngoi so lo yeke na ndo le sese, Jésus afa so lo lingbi ti duti na kota ndo so. Ataa aye ti ngangu so lo wara, lo yeda ti duti be-taa-zo na Nzapa. Tongaso, lo fa so Diable ayeke wamvene tongana lo tene zo oko ayeke duti be-taa-zo na Nzapa pepee na ya tara. Jésus, zo ti mbilimbili, ‘Adam ti use ni’, afa so Nzapa aglisa lege pepee na lekengo azo mbilimbili kue. — 1 aCorinthien 15:22, 45; Matthieu 4:1-11.

7, 8. Ye ti nzoni wa Jésus asala na ngoi so lo yeke na ndo le sese, na lo fa nyen na lege so?

⁷ Gbia wa asala la oko ye ti nzoni mingi tongana ti Jésus na ya angu kete so lo sala na kusala ti lo? Teti so yingo ti nzoni kue ti Nzapa amu na lo ngangu, Jésus asava azo ti kobela, awazin, awaziba, awambongi, awabuburu. Lo zingo nga awakinda! Lo fa mbeni kete mbage ti ye so lo yeke sala ande teti azo na ndo le sese kue tongana lo ga ande na ya ngangu ti Royaume. — Matthieu 15:30, 31; Luc 7:11-16.

⁸ Jésus asala ye ti nzoni mingi na ngoi so lo yeke na ndo le sese na tongaso disciple ti lo Jean atene: “Jésus asala mbeni ye mingi nga, me tongana ala sala ye so kue na mbeti, mbi hinga pepee tongana kota ti sese ni alingbi na mbeti so fade ala sala.” — Jean 21:25a.

9. Ngbanga ti nyen azo ti be-nzoni aga giriri na Jésus?

⁹ Jésus ayeke giriri na taa-be-ti-molenge na lo baa mawa ti zo, lo duti giriri na kota ndoyee na mbage ti azo. Lo mu maboko na awanzinga nga na azo so asala ngangu na ala, na lo yekia azo ti mosoro wala azo ti kota ndo ahon tanga ti azo pepee. Azo ti be-nzoni ayeda giriri na tisango ndo ti ndoyee ti Jésus so: “I ga na mbi, i kue so i sala kusala na i yeke na kungba so ane, na fade mbi mu na i lege ti wo tele. I yo joug ti mbi, i ga adisciple ti mbi, teti mbi yeke na taa-be-ti-molenge na be ti mbi ayeke kota pepee, na fade i wara lege ti wo âme ti i. Teti joug ti mbi ayeke nzoni, na kungba ti mbi ane pepee.” (Matthieu 11:28-30). Azo so akpe giriri mbito ti Nzapa ayeke ga na lo na ala ku yanga ti komande ti lo na be so anze. — Jean 12:19.

Agbe-nyon gbia

10, 11. Fade Jésus akangbi yanga ti komande ti sese na azo wa?

¹⁰ Ngorogbia ayeke na awayenda so amu maboko: a yeke nga lege-oko teti Royaume ti Nzapa so ayeke na yayu. Fade Jésus ayeke kangbi komandema ti sese na ambeni zo, teti lo ze na ala so asala kusala ndulu na lo so fade ala komande azo lege-oko na lo tongana agbia. — Jean 14:2, 3; Apocalypse 5:10; 20:6.

¹¹ Tongaso, na ndo ti Jésus, azingo na popo ti awakinda mbeni kete bungbi ti azo teti fini na yayu. Ala duti na ya Royaume ti Nzapa so ayeke ga ande na anzoye ti lakue lakue na azo (2 aCorinthien 4:14; Apocalypse 14:1-3). Tongaso, na ya angu nde nde, Jéhovah alu gere ti mbeni yanga ti komande so ayeke ga ande na anzoye ti lakue lakue na sewa ti azo.

Yanga ti komande so aduti nde na Nzapa ahunzi

12, 13. Royaume ti Nzapa ayeke ndulu ti sala nyen?

¹² Na ngoi ti e, Nzapa amu mbage ti lo polele na ya aye ti sese. Tongana ti so mbage 9 ti mbeti so ayeke fa ande ni nzoni, aprophétie ti Mbeti ti Nzapa afa so aleke Royaume ti Nzapa na ti Christ na ngu 1914 na ala yeke fadeso ndulu ti buba aye kue ti Satan. Royaume so ayeke ndulu ti ‘komande na popo ti awato ti Christ’. — Psaume 110:2.

¹³ Prophétie ti Daniel 2:44 asala tene so na ndoni: “Na la ti agbia so [so aduti laso], fade Nzapa ti yayu ayeke leke mbeni royaume [na nduzu] so ayeke buba la oko pepee, na fade lo zia royaume ni na maboko ti mbeni mara nde pepee [fade azia lege na yanga ti komande ti azo mbeni pepee]. Fade lo [Royaume ti Nzapa a] neka aroyaume so kue, si ala we, na fade lo mveni angba teti lakue lakue.”

14. Diko ambeni nzoye so ayeke si ande tongana yanga ti komande ti azo ahon.

¹⁴ Teti so alungula yanga ti komande kue so aduti nde na Nzapa, fade Royaume ti Nzapa akomande ndo le sese kue. Teti so lo yeke na nduzu, zo alingbi ti buba lege ni la oko pepee. Fade yanga ti komande ayeke duti na ndo so lo yeke da kozoni giriri, na nduzu, na tele ti Nzapa. Na teti so yanga ti komande ti Nzapa ayeke duti ande na ndo le sese kue, fade lege ti vorongo ti wataka, asenge ndara ti azo wala atene ti poroso ayeke handa zo mbeni pepee. Fade ayeke zia lege pepee na aye so ti duti mbeni. — Matthieu 7:15-23; Apocalypse, chapitre 17 asi na 19.

[Kete tene na gbe ni]

[Foto na lembeti 18]

Na ngoi so lo duti na ndo sese, Jésus asava azo ti kobela na lo yaa akinda ti fa ye so lo yeke sala ande na ya fini sese.

[Foto na lembeti 19]

Fade Royaume ti Nzapa so ayeke na yayu ayeke buba ayanga ti komande kue so aduti nde na lo.