Mbage 11
A leke fadeso gunda ti fini sese
1, 2. A lingbi na aprophétie ti Mbeti ti Nzapa, e baa nyen laso?
MBENI ye ti kpene nde: ayeke leke fadeso gunda ti fini sese ti Nzapa, na ngoi so ngbele sese ti Satan ayeke buba. Na gbe le ti e Nzapa abungbi azo ti amara kue na lo sala si ala ga gunda ti fini bungbi ti azo na ndo sese so na ya ngoi kete ayeke mu ande ndo ti sese ti so laso akangbi. Na ya Mbeti ti Nzapa, na 2 Pierre 3:13, ahiri fini bungbi ti azo so “fini sese”.
2 Prophétie ti Mbeti ti Nzapa atene nga: “Na la ti ndani [ngoi ti e], (...) fade azo mingi ague, ala tene: ‘I ga, zia e ma na hoto ti Jéhovah [taa lege ti vorongo], (...) na fade lo fa lege ti lo na e, na fade e tambela na lege ti lo.’ ” — Esaïe 2:2, 3.
3. a) Prophétie ti Esaïe aga taa tene na popo ti azo wa? b) Tanga ti abuku ti Mbeti ti Nzapa atene nyen na ndoni?
3 Prophétie so aga taa tene na ngoi ti laso na popo ti ala so ayeda na ‘alege ti Nzapa na atambela na ndo alege ti lo’. Tanga ti buku ti Mbeti ti Nzapa asala tene ti mbeni bungbi ti ndo le sese ti azo so andoyee siriri na a hiri ala “azo mingi so asi singo (...) ti amara kue, ti akete mara kue, ti azo nde nde kue, na ti yanga nde nde kue”, taa sewa ti ndo le sese kue so asala na Nzapa na be-oko. Na Mbeti ti Nzapa akiri atene: “Azo so ayeke ala so asigigi na ya kota ye ti vundu.” So aye ti tene fade ala so kua na hunzingo ti aye ti sioni ti fadeso. — Apocalypse 7:9, 14; Matthieu 24:3.
Taa sewa ti ndo le sese kue
4, 5. Ye nyen amu lege si sewa ti ndo le sese ti aTémoin ti Jéhovah aga taa ye?
4 A-Témoin ti Jéhovah kutu mingi ayeke sala ngangu na be ti ala kue ti tambela alingbi na atene nga na alege ti Nzapa. Ala zia beku ti ala ti fini ti lakue lakue na ndo ti fini sese ti Nzapa. Dutingo ti ala ti la oko oko alingbi na andia ti Nzapa na a fa so ala yeke na nzala ti yeda na yanga ti komande ti lo, laso nga na ya fini sese. Ataa ala duti na ndo wa, ataa yanga ti kodoro ti ala wala mara ti ala ayeke so wa, ala bata oko ndia ti tambelango ni, andia so Nzapa afa ni na ya Tene ti lo. A yeke ndani laa si ala duti mbeni taa sewa so amu ndo le sese kue, bungbi ti azo ti fini sese so Nzapa aleke ni. — Esaïe 54:13; Matthieu 22:37, 38; Jean 15:9, 14.
5 Tongana aTémoin ti Jéhovah aduti tongana mbeni sewa ti ndo le sese kue so ayeke nde mingi, ala mu gonda ni na ala mveni pepee. Ala hinga so a yeke lengo so yingo ti ngangu ti Nzapa ayeke sala na ndo azo so ayeda na andia ti lo (Kusala 5:29, 32; aGalate 5:22, 23). A yeke kusala ti Nzapa. Lege-oko na tene so Jésus atene giriri, “ye so azo alingbi sala pepee, Nzapa alingbi sala”. (Luc 18:27.) Nzapa so asala si nda-gigi aduti nzoni mingi, a sala nga si bungbi ti azo so ayeke ga ande azo ti fini sese aduti nzoni.
6. Ngbanga ti nyen e lingbi ti sala tene ti sewa ti aTémoin ti Jéhovah tongana mbeni ye ti kpene ti ngoi ti e?
6 Tongaso e lingbi ti baa na lege wa Jéhovah ayeke mu ande li ni na ya fini sese na bango aye so lo yeke sala na ya ye so ayeke gunda ti fini sese, gunda ni so aleke na ngoi ti e. Na e lingbi ti tene na mbeni mbage so, ye so lo sala na aTémoin ti lo ayeke ye ti kpene ti ngoi ti e. Tongana nyen? Ngbanga ti so lo sala si aTémoin ti Jéhovah aga taa sewa ti ndo le sese kue, mbeni sewa so alingbi ti fa ya ni pepee na lege ti aye ti kangbi tongana tene ti kodoro, ti mara wala ti lege ti vorongo. Ataa wungo ti aTémoin ahon kutu mingi na ala duti na ya akodoro ahon ngbangbo use, ala duti na be-oko na lege ti mbeni kamba so alingbi ti fa pepee. Sewa ti ndo le sese, so ayeke nde na ya Mbaï kue, ayeke biani ye ti kpene ti ngoi ti e — mbeni ye so Nzapa asala. — Esaïe 43:10, 11, 21; Kusala 10:34, 35; aGalate 3:28.
Tongana nyen e lingbi ti hinga mara ti Nzapa
7. Na lege ti Jésus tongana nyen a lingbi ti hinga ataa disciple ti lo?
7 Mbeni lege nde wa e yeke na ni ti hinga mara so Nzapa asala kusala na ni tongana gunda ti fini sese ti lo? Zo wa asala ye alingbi na atene ti Jésus so ayeke na Jean 13:34, 35? “Mbi mu na i fini komandema: i ndoyee tele ti i na popo ti i, lege-oko tongana mbi ndoyee i, a lingbi i ndoyee tele ti i na popo ti i nga. Na lege so, fade azo kue ahinga i yeke adisciple ti mbi: tongana i ndoyee tele ti i na popo ti i.” A-Témoin ti Jéhovah ayeda na atene ti Jésus so na ala sala ye alingbi na ni. Tongana ti so Tene ti Nzapa ahunda ni, ala yeke “na taa ndoyee teti ambeni na popo ti ala”. (1 Pierre 4:8.) Ala ‘yu ndoyee, teti a yeke kamba so alingbi kue’. (aColossien 3:14.) Tongaso ndoyee teti aita ayeke “kamba” so atingbi ala oko na ya sese kue.
8. Mbeni tene wa 1 Jean 3:10-12 amu ni ti hinga na awakua ti Nzapa?
8 Lege-oko, kozo mbeti ti Jean 3:10-12 atene: “A hinga amolenge ti Nzapa na amolenge ti Diable na lege so: zo kue so asala mbilimbili lakue pepee, na lo so andoyee ita ti lo pepee, alondo na Nzapa pepee. Teti so a yeke tene so e ma atondani giriri kozoni: ti tene e ndoyee tele ti e na popo ti e; na e sala tongana Caïn pepee, lo so alondo na wato sioni na lo fa go ti ita ti lo ti koli.” A yeke tongaso si awakua ti Nzapa ayeke mbeni sewa ti ndo le sese so asala ye na lege ti ngangu pepee.
Mbeni fa nde
9, 10. a) Kusala wa alingbi mu lege ti hinga awakua ti Nzapa na la ti ndani? b) A-Témoin ti Jéhovah asala si Matthieu 24:14 aga taa tene tongana nyen?
9 Mbeni lege ayeke nga da ti hinga na awakua ti Nzapa. Na ya prophétie ti lo na ndo la ti ndani, Jésus asala tene ti aye mingi so ayeke si ande na la ti ndani (baa mbage 9). A fa mbeni oko ti akpengba ye so na ya prophétie so ayeke na Matthieu 24:14: “Fade afa nzo tene ti royaume so na sese kue so azo ayeke da, tongana tene ti témoin na amara kue; na pekoni, fade ndani aga.”
10 E baa gango taa tene ti prophétie so? Biani, teti alondo na tongo nda ti la ti ndani na ngu 1914, aTémoin ti Jéhovah afa nzo tene ti Royaume ti Nzapa na ndo le sese kue alingbi na yanga so Jésus amu, so ti tene na bango azo na da ti ala (Matthieu 10:7, 12; Kusala 20:20). A-Témoin kutu mingi ayeke gue na azo na ya akodoro kue ti fa na ala tene ti fini sese. A yeke tongaso si mo wara mbeti so, teti kusala ti aTémoin ti Jéhovah andu salango na kangbingo abuku ngbundangbu mingi so asala tene ti Royaume ti Nzapa. Mo hinga mbeni mara so ayeke fa tene ti Royaume ti Nzapa da na da, na ndo le sese kue? Marc 13:10 afa nga so a lingbi ti sala kusala ti fango tene na ti fango ye so “kozoni” si ndani asi.
Kiringo tene na kota hundango tene use ni
11. A-Témoin ti Jéhovah asala si mbeni ye wa aga taa tene tongana ala yeda na yanga ti komande ti Nzapa?
11 Teti so ala yeda na andia na akpengba tene ti Nzapa, aTémoin ti Jéhovah asala si mbeni ye nde aga taa tene: ala fa so Satan atene mvene tongana lo fa so azo alingbi ti duti be-taa-zo pepee na Nzapa na ya tara, na lege so ala mu kiringo tene na kota hundango tene use ni, so andu dutingo be-taa-zo ti azo (Job 2:1-5). Na be-oko, aTémoin, so ayeke na ya bungbi ti azo kutu mingi ti amara kue, afa dutingo be-taa-zo ti ala na yanga ti komande ti Nzapa. Ataa so ala yeke mbilimbili kue pepee, ala mu mbage ti Nzapa na ya tene ti yanga ti komande ti nda-gigi kue, ataa Satan asala ngangu na ala.
12. A-Témoin amanda azo wa na lege ti mabe ti ala?
12 Laso, aTémoin ti Jéhovah kutu mingi so akiri azia tene ti témoin ti ala na ndo tene ti yongoro molongo ti ambeni témoin ti giriri so afa be-taa-zo ti ala na Nzapa. Tongana e ye ti diko ambeni oko oko, Abel, Noé, Job, Abraham, Sara, Isaac, Jacob, Déborah, Ruth, David na Daniel ayeke na popo ti ala (aHébreu, chapitre 11). Tongana ti so Mbeti ti Nzapa atene, ala yeke ‘atémoin mingi mingi so ayeke be-taa-zo’. (aHébreu 12:1.) Azo so, nga na ambeni, so na popo ni adisciple ti Jésus ayeke da, angba be-taa-zo na Nzapa. Na mbage, Jésus lo mveni amu pendere tapande mingi ahon tongana lo bata dutingo be-taa-zo ti lo mbilimbili kue.
13. Tene wa ti Jésus na ndo ti Satan aga taa tene?
13 Ye so afa so Jésus atene taa tene tongana, na ngoi so lo yeke sala tene na amokonzi ti nzapa, lo tene na ndo ti Satan: “Me fadeso i gi lege ti fa mbi, mbi so mbi tene taa tene na i, tene so mbi ma na yanga ti Nzapa. (...) I yeke ti baba ti i Diable, na i ye ti sala ye so baba ti i aye. Lo yeke wafango zo na la ni so lo tondani, na lo gbu taa tene ngangu pepee, ngbanga ti so taa tene ayeke na ya lo pepee. Tongana lo tene mvene, lo tene gi ye so be ti lo aye, ngbanga ti so lo yeke wamvene na baba ti mvene.” — Jean 8:40, 44.
Fade mo mu mbage wa?
14. Ye nyen asi laso na gunda ti fini sese?
14 Gunda ti fini sese so Nzapa aleke fadeso na ya bungbi ti azo ti ndo le sese kue ti aTémoin ti Jéhovah akpengba lakue ti gue na li ni. Na ya ngu oko oko, azo saki mingi asala kusala na ngangu ti sala ye ti be ti ala mveni, so aluti na ndo taa hingango ndo, ti yeda na yanga ti komande ti Nzapa. Ala li na ya bungbi ti azo ti fini sese, ala mu mbage ti Nzapa na ya tene ti yanga ti komande ti nda-gigi kue na ala fa so Satan ayeke wamvene.
15. Kusala wa ti kangbingo azo Jésus asala ni laso?
15 Ngbanga ti so ala mu mbage ti yanga ti komande ti Nzapa, Christ, so akangbi “angasangbaga” na “angasa”, abaa so ala lingbi ti duti “na koti ti lo”. Na ya prophétie ti lo na ndo la ti ndani, Jésus atene: “Fade amara kue abungbi na gbele lo, na fade lo kangbi popo ti azo lege-oko tongana berger akangbi popo ti angasangbaga na angasa. Na fade lo zia angasangbaga na mbage ti lo ti koti, na angasa na mbage ti lo ti gati.” Angasangbaga ayeke azo ti taa-be-ti-molenge so abungbi na aita ti Christ na amu maboko na ala, na tongaso ala yeda na yanga ti komande ti Nzapa. Angasa ayeke azo ti kpengba li so ake aita ti Christ na asala ye oko pepee ti gbu tene ti yanga ti komande ti Nzapa. Fade ye nyen asi na pekoni? Jésus akiri tene: “Fade alungula ala so kue [angasa] teti lakue lakue, me fade azo ti mbilimbili [angasangbaga] awara fini ti lakue lakue.” — Matthieu 25:31-46.
16. A lingbi mo sala nyen tongana mo ye ti duti na ya Paradis so ayeke ga?
16 Biani, Nzapa abi be ti lo na ndo ti e! Na ya ngoi kete, lo yeke leke mbeni pendere paradis na ndo le sese. Mo ye ti duti na ya Paradis so? Tongaso fa kiringo na singila ti mo teti aye so Nzapa aleke: manda ti hinga lo na sala ye alingbi na ye so mo yeke manda. “I gi Jéhovah tongana i lingbi wara lo. I di iri ti lo tongana lo yeke ndulu. Zia zo ti sioni ake lege ti lo, na zo ti kirikiri ake bibe ti lo; zia lo kiri na Jéhovah, na fade lo sala be nzoni na lo!” — Esaïe 55:6, 7.
17. Ngbanga ti nyen ngoi ayeke da mbeni pepee teti soro lo so e ye ti sala na lo?
17 Ngoi angba mbeni pepee. Nda ti ngbele ye ti fadeso aga ndulu mingi. Tene ti Nzapa amu wango so: “I ndoyee sese so pepee na aye kue ti sese so nga pepee. Tongana mbeni zo andoyee sese so, ndoyee ti Baba ayeke na ya lo pepee (...). Na sese ni ayeke hon, na nzala ni nga, me zo so asala ye so be ti Nzapa aye, lo ngba lakue lakue.” — 1 Jean 2:15-17.
18. Ye wa ayeke mu ande lege na mo ti duti na taa beku ti ngba na fini na ya pendere fini sese ti Nzapa?
18 Tongaso aleke laso mveni awakua ti Nzapa teti fini ti lakue lakue na ya fini sese. Ala yeke wara hingango ye na lege ti yingo wala na mbeni lege nde, so ahunda ti leke na paradis. E wa mo mingi ti mu mbage ti Nzapa tongana Gbia na ti mu maboko na kusala ti songo zo so lo mu na azo ti sala ni laso na ndo le sese kue. Manda Mbeti ti Nzapa na aTémoin ti Jéhovah, na manda ti hinga Nzapa so abi be ti lo biani na ndo mo na so ayeke lungula ande pasi. Na lege so, fade mo nga mo lingbi ti ga mbage ti gunda ti fini sese. Tongaso mo lingbi ande ti duti na taa beku ti wara be nzoni ti Nzapa na ti duti teti lakue lakue na ya pendere fini sese so lo yeke leke ande.
[Foto na lembeti 31]
A-Témoin ti Jéhovah ayeke na taa songo na ndo le sese kue.
[Foto na lembeti 32]
A yeke leke fadeso gunda ti fini sese ti Nzapa.